(ສພຊ) – ຕອນເຊົ້າວັນທີ 10 ທັນວານີ້, ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ທ່ານ ນາງ ອາລີ ວົງໜໍ່ບຸນທຳ ປະທານຄະນະບໍລິຫານງານສູນກາງສະຫະພັນແມ່ຍິງລາວ ໄດ້ສະເໜີປັບປຸງກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ, ເຊິ່ງຜ່ານການທົບທວນ ແລະ ປະເມີນການຈັດຕັ້ງປະຕິບັດກົດໝາຍ ເຫັນວ່າຍັງມີບາງດ້ານບໍ່ແທດເໝາະກັບສະພາບການຂະຫຍາຍຕົວທາງດ້ານເສດຖະກິດ-ສັງຄົມ ແລະ ການເຊື່ອມໂຍງກັບພາກພື້ນ ແລະ ສາກົນ ເປັນຕົ້ນ: ເນື້ອໃນກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ ມີລັກສະນະກວມລວມ, ສັ້ນກະທັດຮັດ ເຮັດໃຫ້ມີຄວາມຊັກຊ້າ ແລະ ຫຍຸ້ງຍາກໃນການຈັດຕັ້ງປະຕິບັດ; ສະພາບການໃນພາກພື້ນ ແລະ ສາກົນ ມີການປ່ຽນແປງ ລວມທັງການພັດທະນາເສດຖະກິດ- ສັງຄົມ ມີການຂະຫຍາຍຕົວຢ່າງວ່ອງໄວ, ປາກົດການຫຍໍ້ທໍ້ໃນສັງຄົມມີຫຼາຍອັນ ໃໝ່ເກີດຂຶ້ນ ມີສິ່ງທ້າທາຍຫຼາຍປະການ, ສະນັ້ນ ກົດໝາຍກໍມີຄວາມຈໍາເປັນຕ້ອງໄດ້ຮັບການປັບປຸງໃຫ້ແທດເໝາະກັບສະພາບການຕົວຈິງໃນໄລຍະໃໝ່ນີ້; ບາງມາດຕະການທາງອາຍາທີ່ກຳນົດໄວ້ໃນກົດໝາຍສະບັບນີ້ ບໍ່ສອດຄ່ອງກັບປະມວນກົດໝາຍອາຍາ; ມີຄວາມຈຳເປັນຕ້ອງໄດ້ເພີ່ມຕື່ມບາງເນື້ອໃນ ແລະ ປັບປຸງໃຫ້ສອດຄ່ອງ; ພາລະບົດບາດ ແລະ ຂັ້ນຕອນໃນການປົກປ້ອງສິດຜົນປະໂຫຍດອັນຊອບທຳຂອງແມ່ຍິງ ແລະ ເດັກນ້ອຍລາວບັນດາເຜົ່າຂອງການຈັດຕັ້ງສະຫະພັນແມ່ຍິງ ຍັງບໍ່ທັນລະອຽດເທົ່າທີ່ຄວນ ເຮັດໃຫ້ການຈັດຕັ້ງປະຕິບັດວຽກງານຕົວຈິງຢູ່ທ້ອງຖິ່ນ ມີຄວາມຫຍຸ້ງຍາກ.

ທ່ານ ນາງ ອາລີ ວົງໜໍ່ບຸນທຳ ໃຫ້ຮູ້ວ່າ: ພາຍຫຼັງຮ່າງກົດໝາຍສະບັບນີ້ໄດ້ຮັບການຮັບຮອງ ຈະເຮັດໃຫ້ມີບ່ອນອີງດ້ານນິຕິກຳ ໃນການຄຸ້ມຄອງ, ຕິດຕາມກວດກາການເຄື່ອນໄຫວວຽກງານພັດທະນາ ແລະ ປົກປ້ອງແມ່ຍິງ ໄດ້ເປັນຢ່າງດີ ທັງເປັນການຍົກສູງບົດບາດການຈັດຕັ້ງສະຫະພັນແມ່ຍິງລາວ ສູງຂຶ້ນ ແລະ ເຮັດໃຫ້ແມ່ຍິງໄດ້ຮັບການພັດທະນາ, ປົກປ້ອງ ແລະ ຊ່ວຍເຫຼືອຈາກການຈັດຕັ້ງທີ່ກ່ຽວຂ້ອງທັງພາກລັດ ແລະ ເອກະຊົນ ເພື່ອປະກອບສ່ວນໃນການແກ້ໄຂປາກົດການຫຍໍ້ທີ່ເກີດຂຶ້ນກັບເອື້ອຍນ້ອງແມ່ຍິງ.