ປະມວນການເຄື່ອນໄຫວຄະນະຜູ້ແທນສະພາແຫ່ງຊາດລາວ ທີ່ໄດ້ສຳເລັດການເຄື່ອນໄຫວຢ້ຽມຢາມ, ເຮັດວຽກ ແລະ ເຂົ້າຮ່ວມກອງປະຊຸມສຳມະນາແລກບົດຮຽນ ໃນຂົງເຂດເສດຖະກິດ, ການເງິນ ແລະ ງົບປະມານ ທີ່ ສສ. ຫວຽດນາມ ແຕ່ວັນທີ 7-14 ກໍລະກົດ 2022.

ຄະນະຜູ້ແທນ ຂອງສະພາແຫ່ງຊາດ ລາວ ຊຶ່ງນໍາໂດຍ ທ່ານ ສົມມາດ ພົລເສນາ, ກຳມະການສູນກາງພັກ, ຮອງປະທານສະພາແຫ່ງຊາດລາວ, ພ້ອມດ້ວຍຄະນະ ຈໍານວນ 16 ທ່ານ ໃນນັ້ນມີ ບັນດາທ່ານປະທານສະພາປະຊາຊົນແຂວງ, ສະມາຊິກສະພາແຫ່ງຊາດ, ກຳມະທິການຂອງກຳມາທິການ ຈາກ 3 ເຂດ ( ອຸດົມໄຊ, ຄໍາມ່ວນ, ສາລະວັນ ) ຈໍານວນ 3 ທ່ານ ແລະຊຶ່ງ ແຂວງຄໍາມ່ວນ ເຂົ້າຮ່ວມໂດຍ ທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ.

1. ຈຸດປະສົງຂອງການເຄື່ອນໄຫວຢ້ຽມຢາມ ແລະ ເຮັດວຽກໃນຄັ້ງນີ້:

1)       ເພື່ອຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນຫຍິ່ງໃຫ່ຍ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະ ລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດຫວຽດນາມ;

2)       ເພື່ອປະກອບສ່ວນເຂົ້າໃນຂະບວນການສະເຫລີມສະຫລອງ ສອງວັນປະຫວັດສາດ ແຫ່ງ ປີສາມັກຄີມິດຕະພາບ ລະຫວ່າງ ລາວ-ຫວຽດນາມ-ລາວ ປີ 2022 ຄື ວັນ ຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດ ແລະ ວັນ ຄົບຮອບ 45 ປີ ແຫ່ງການເຊັນສັນຍາມິດຕະພາບ ແລະ ການຮ່ວມມື ລະຫວ່າງ ລາວ-ຫວຽດນາມ

3)       ເພື່ອຜັນຂະຫຍາຍຜົນການຢ້ຽມຢາມສັນຖະວະໄມຕີຢ່າງເປັນທາງການຂອງຂອງ ທ່ານປະທານສະພາແຫ່ງຊາດ ລາວ ກັບ ທ່ານໃນໄລຍະ ວັນທີ 6-8 ທັນວາ 2021 ຜ່ານມາ;

4)       ເພື່ອແລກປ່ຽນບົດຮຽນກັບສະພາແຫ່ງຊາດຫວຽດນາມໃນຫົວຂໍ້: ບົດຮຽນການພິຈາລະນາຮັບຮອງແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ, ໂດຍສະເພາະ ແຜນການຈັດສັນງົບປະມານໂຄງການລົງທຶນຂອງລັດ (ການຕິດຕາມກວດກາໃນຂົງເຂດແຜນການ, ການເງິນ ແລະ ກວດສອບ) ແລະ ບົດຮຽນກ່ຽວກັບການແກ້ໄຂ ຄໍາຮ້ອງ, ຂໍ້ສະເໜີ ຂອງລັດຖະບານ, ນັກລົງທຶນ ແລະ ປະຊາຊົນ.

( ຂໍຂອບໃຈພາບຈາກ ຂ່າວສານ ສສ.ຫວຽດນາມ )