(ສພຊ) ວັນສຸກ ທີ 4 ມັງກອນ 2018 ທີ່ສະພາປະຊາຊົນແຂວງ (ສພຂ) ຊຽງຂວາງ, ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ພ້ອມດ້ວຍຄະນະ ປະກອບມີ ປະທານກໍາມາທິການວັດທະນະທໍາ-ສັງຄົມ, ຮອງປະທານກໍາມາທິການແຜນການ ການເງິນ ແລະ ການກວດສອບ, ຮອງປະທານກໍາມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ ໄດ້ເຄື່ອນໄຫວຕິດຕາມກວດກາ ສພຂ ແລະ ບັນດາພະແນກການແຂວງຊຽງຂວາງ, ໂດຍການຕ້ອນຮັບຂອງທ່ານ ນາງ ແສງຄໍາ ຊົ່ງຊະນະ ປະທານຄະນະ ສສຊ ປະຈໍາເຂດເລືອກຕັ້ງທີ 9 ແຂວງຊຽງຂວາງ, ເຂົ້າຮ່ວມມີທ່ານ ບຸນຕົ້ນ ຈັນທະພອນ ເຈົ້າແຂວງໆຊຽງຂວາງ ທັງເປັນ ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງ, ມີຕາງໜ້າບັນດາພະແນກການຂອງແຂວງ, ສສຊ ປະຈໍາເຂດເລືອກຕັ້ງ, ເລຂາ-ຮອງເລຂາທິການ ສພຂ,​ ຕະຫລອດຮອດພະນັກງານພາຍໃນ ສພຂ ຊຽງຂວາງ.

ທ່ານ ບຸນຕົ້ນ ຈັນທະພອນ ໄດ້ລາຍງານໂດຍຫຍໍ້ກ່ຽວກັບຜົນຂອງການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ແລະ ຜົນງົບປະມານປະຈໍາປີ 2018 ພາຍໃນແຂວງຊຽງຂວາງ ໃນໄລຍະຜ່ານມາ ແມ່ນສະແດງໃຫ້ເຫັນວ່າ ແຂວງຊຽງຂວາງສາມາດບັນລຸໄດ້ຫລາຍຄາດໝາຍ, ແຕ່ກໍມີບາງຄາດໝາຍຍັງບໍ່ທັນ ສາມາດບັນລຸໄດ້.

ຈາກນັ້ນ, ທ່ານ ນາງ  ປານີ ຢາທໍ່ຕູ້ ໄດ້ມີຄໍາເຫັນເຈາະຈີ້ມ ແລະ ໃຫ້ທິດຊີ້ນໍາແກ່ ສພຂ, ອົງການປົກຄອງແຂວງ ແລະ ບັນດາພະແນກການຂອງແຂວງ; ເຊິ່ງທ່ານໄດ້ເນັ້ນໃຫ້ມີການຕີລາຄາ ໃຫ້ມີການເຊັດເຈນກວ່າເກົ່າກ່ຽວກັບສາເຫດທີ່ບັນລຸໄດ້ຕາມຄາດໝາຍ ແລະ ສາເຫດທີ່ບໍ່ສາມາດບັນລຸໄດ້ ຕາມຄາດໝາຍ ເປັນຕົ້ນ ສາຍເຫດນອກຕົວແມ່ນໄພວິບັດທີ່ກະທົບຕໍ່ຫລາຍທ້ອງຖິ່ນຂອງແຂວງ ໃນໄລຍະລະດູຝົນ ຜ່ານມາ; ທ່ານຍັງໄດ້ຕັ້ງຄໍຖາມຂຶ້ນວ່າ ການທີ່ບໍ່ບັນລຸໄດ້ຕາມຄາດໝາຍນັ້ນ ແມ່ນຍ້ອນສາຍເຫດນອກຕົວທັງໝົດບໍ? ຫລືວ່າຍັງມີສາເຫດໃນຕົວໃນຂອດການຈັດຕັ້ງປະຕິບັດ ຂອງບັນດາພະແນກການ; ເຊິ່ງອາດຈະຍັງບໍ່ທັນມີກົນໄກ, ມາດຕະການ ແລະ ການປະສານສົມທົບ ໃນການຈັດຕັ້ງປະຕິບັດແຜນ ໂດຍສະເພາະການເກັບລາຍຮັບເຂົ້າງົບປະມານ, ຖ້າເຮັດດີກວ່ານີ້ ອາດສາມາດເກັບໄດ້ ຫລາຍກວ່ານີ້; ທັ້ງນີ້ກໍເພື່ອສາມາດກໍານົດເຂົ້າແຜນໃນ ປະຈໍາປີ 2019.  ສໍາລັບຄາດໝາຍທາງດ້ານສັງຄົມ ເຊັ່ນ: ສຶກສາທິການ ແລະ ສາທາລະນະສຸກ ເຫັນວ່າຍັງບໍ່ສາມາດບັນລຸໄດ້ ແມ່ນຍ້ອນສາເຫດການກໍານົດແຜນສູງໂພດ ຫລື ຍ້ອນຂອດການຈັດຕັ້ງປະຕິບັດ ຂອງຂະແໜງການທີ່ກ່ຽວຂ້ອງ ເຊິ່ງທາງສູນກາງໄດ້ສະຫນອງດ້ານງົບປະມານໃຫ້ໝົດແລ້ວ; ວຽກງານສຶກສາ ກໍຄືການສ້າງຊັບພະຍາກອນມະນຸດ ແມ່ນວຽກງານທີ່ສໍາຄັນຕໍ່ການສັາງສາພັດທະນາປະເທດຊາດໃນອະນາຄົດ, ສະນັ້ນ ການທີ່ບໍ່ບັນລຸໄດ້ຕາມຄາດໝາຍ ແມ່ນຍ້ອນວາງຄາດໝາຍສູງເກີນໄປ ຫລືຍ້ອນຫານຈັດຕັ້ງປະຕິບັດ ແລະ ການຊີ້ນໍາຢ່າງໃກ້ຊິດຕິດແທດ ຂອງພະແນການທີ່ກ່ຽວຂ້ອງ, ພວກເຮົາຕ້ອງວິເຄາະວິໄຈໃຫ້ເຫັນບັນຫາ, ຕ້ອງກ້າເວົ້າຄວາມຈິງ ເພື່ອແກ້ໄຂບັນຫາ;  ສໍາລັບການສໍາຫລວດທີ່ດິນ ແລະ ການເຮັດໃບຕາດິນ ແມ່ນເຫັນວ່າສາມາດປະຕິບັດໄດລື່ນຄາດໝາຍ ແລ້ວພາກສ່ວນການເງິນໄດ້ອີງໃສ່ແຜນດັ່ງກ່າວເພື່ອໄປເກັບຄ່າທໍານຽມທີ່ດິນ ໂດຍສົມທົບກັບບັນດາບ້ານ ແລ້ວບໍ່?  ທ່ານຍັງໄດ້ໃຫ້ທິດວ່າ ເພື່ອກະກຽມໃສ່ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຊຽງຂວາງ, ໃຫ້ບັນດາພະແນກການຂອງແຂວງ ຕີລາຄາຄືນໃໝ່ ສາເຫດທີ່ບັນລຸໄດ້ແມ່ນຍ້ອນຫຍັງ ແລະ ສາເຫດທີ່ບໍ່ສາມາດບັນລຸໄດ້ຍ້ອນຫຍັງ, ໃນນັ້ນ ຂະແໜງການທີ່ກ່ຽວຂ້ອງຕ້ອງເປັນຜູ້ຮັບຜິດຊອບຫລັກ; ນອກຈາກນັ້ນ ໃຫ້ເບິ່ງຄືນກົນໄກການປະສານງານ ແລະ ອື່ນ.

ກ່ອນຫນ້ານີ້, ທ່ານ ນາງ ປານີ ຢາທໍ່ຕູ້ ພ້ອມດ້ວຍຄະນະ ຍັງໄດ້ຢ້ຽມຢາມປະຊາຊົນບ້ານຜາແວ່ນ ເມືອງຫນອງແຮດ, ເຊິ່ງເຫັນໄດ້ວ່າປະຊາຊົນມາຄວາມຫ້າວຫັນໃນການຜະລິດກະສິກໍາປູກຝັງເປັນສິນຄ້າ ໂດຍສະເພາະແມ່ນຜັກກາດຕີນຫມີ ສາມາດສ້າງລາຍຮັບໃຫ້ແກ່ຄອບຄົວ ເຮັດໃຫ້ຊີວິດການເປັນຢູ່ນັບມື້ນັບດີຂຶ້ນ.

ໃນໂອກາດດຽວກັນນີ້, ທ່ານປະທານສະພາແຫ່ງຊາດ ຍັງໄດ້ນໍາພາຄະນະ ວາງກະຕ່າດອກໄມ້ ຕໍ່ໜ້າອານຸສາວະລີ ຂອງບັນດາອະດີດຜູ້ນໍາປະຕິວັດລຸ່ນທໍາອິດ ແລະ ບັນດາວິລະບູລຸດໃນສະໄໝຕໍ່ສູ້ກູ້ຊາດຕ້ານຈັກກະພັດຜູ້ຮຸກຮານ ເຊັ່ນ: ອານຸສາວະລີ ທ່ານ ພູມີ ວົງວິຈິດ ແລະ ອານຸສາວະລີ ທ່ານ ຕູຢາ ໄຊຈູ ທີ່ເທດສະບານ ແຂວງຊຽງຂວາງ ແລະ ອານຸສາວະລີ ທ່ານ ໄຟດ່າງ ລໍເບລຍຢາວ ທີ່ເມືອງຫນອງແຮດ ເພື່ອເປັນການລະນຶກເຖິງຄຸນງາມຄວາມດີຂອງບັນດາທ່ານທີ່ໄດ້ອຸທິດຕົນເພື່ອພາລະກິດຕໍ່ສູ້ປົດປ່ອຍຊາດ.