(ສພຊ) ວັນທີ 11 ຕຸລາ 2023 ທີ່ຫ້ອງຮັບແຂກສະພາແຫ່ງຊາດ, ທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບການເຂົ້າຢ້ຽມຂຳ່ນັບຂອງທ່ານ ນາງ ຄາມິກາວະ ໂຢໂກະ ລັດຖະມົນຕີກະຊວງການຕ່າງປະເທດ ແຫ່ງ ປະເທດຍີ່ປຸ່ນ ພ້ອມດ້ວຍຄະນະ; ໃນໂອກາດທີ່ມາຢ້ຽມຢາມ ແລະ ເຮັດວຽກຢູ່ ສປປລາວ ໃນລະຫວ່າງວັນທີ 11-12 ຕຸລາ 2023.
ໂອກາດນີ້, ທ່ານ ປອ. ໄຊສົມພອນ ພົມວິຫານ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມ ສປປລາວ ຂອງທ່ານ ນາງ ຄາມິກາວະ ໂຢໂກະ ໃນເທື່ອນີ້, ພ້ອມທັງຝາກຄວາມຢື້ຢາມຖາມຂ່າວ ເຖິງ ທ່ານ ຮິໂຣຢູກິ ໂຮໂຊດາ (Hosoda Hiroyuki) ປະທານສະພາຜູ້ແທນລາສະດອນ (ສະພາຕໍ່າ) ແຫ່ງ ປະເທດຍີ່ປຸ່ນ ແລະ ທ່ານ ຮິເດຮິສະ ໂອສຶຈິ (Hidehisa OTSUJI), ປະທານສະພາສູງ ແຫ່ງ ປະເທດຍີ່ປຸ່ນ. ທ່ານໄດ້ກ່າວສະແດງຄວາມປິຕິຍິນດີເປັນຢ່າງຍິ່ງ ທີ່ເຫັນວ່າ ຕະຫຼອດໄລຍະຜ່ານມາ ສາຍພົວພັນມິດຕະພາບ ແລະ ການຮ່ວມມືແບບຄູ່ຮ່ວມຍຸດທະສາດ ລະຫວ່າງ ສອງປະເທດ ລາວ-ຍີ່ປຸ່ນ ກໍຄື ລະຫວ່າງ ສອງອົງການນິຕິບັນຍັດ ແມ່ນໄດ້ຮັບການເສີມຂະຫຍາຍຢ່າງຕໍ່ເນື່ອງ, ເຂົ້າສູ່ລວງເລິກນັບມື້ນັບຫຼາຍຂຶ້ນ, ນັບແຕ່ໄດ້ມີການຍົກລະດັບການພົວພັນຮ່ວມມື ຈາກຄູ່ຮ່ວມມືຮອບດ້ານ ມາເປັນຄູ່ຮ່ວມຍຸດທະສາດ ໃນປີ 2015 ເຊິ່ງສະແດງອອກສອງປະເທດ ໄດ້ມີການແລກປ່ຽນຢ້ຽມຢາມຂອງຄະນະຜູ້ແທນຂັ້ນສູງ ແລະ ຂັ້ນຕ່າງໆ ນັບແຕ່ສູນກາງລົງຮອດທ້ອງຖິ່ນນຳກັນຢ່າງເປັນປົກກະຕິ; ສປປ ລາວ ຍາມໃດກໍຕີລາຄາສູງ ແລະ ສະແດງຄວາມຂອບໃຈເປັນຢ່າງສູງຕໍ່ ລັດຖະບານຍີ່ປຸ່ນທີ່ໄດ້ໃຫ້ການຊ່ວຍເຫຼືອ ແລະ ສະໜັບສະໜູນ ສປປລາວ ໃນການພັດທະນາດ້ານພື້ນຖານໂຄງລ່າງ, ດ້ານເສດຖະກິດ, ວັດທະນະທໍາ, ການສຶກສາ, ສາທາລະນະສຸກ ແລະ ແຮງງານ.
ທ່ານປະທານສະພາແຫ່ງຊາດລາວ ໄດ້ກ່າວຕື່ມວ່າ: ໃນໂອກາດພົບປະຄັ້ງນີ້, ສອງປະທານສະພາແຫ່ງຊາດ ກໍໄດ້ຕີລາຄາຄືນການພົວພັນຮ່ວມມື ລະຫວ່າງ ສອງອົງການນິຕິບັນຍັດ ແລະ ຮ່ວມກັນປຶກສາຫາລືທິດທາງການພົວພັນຮ່ວມມືໃນຕໍ່ໜ້າ ໂດຍພ້ອມກັນສ້າງເງື່ອນໄຂໃຫ້ສອງອົງການນິຕິບັນຍັດແລກປ່ຽນຢ້ຽມຢາມ ຂອງຄະນະຜູ້ແທນຂັ້ນສູງ ແລະ ຂັ້ນຕ່າງໆ ນໍາກັນ. ໃນນັ້ນ, ຄະນະຜູ້ແທນຂັ້ນສູງຂອງສະພາແຫ່ງຊາດລາວ ກໍມີແຜນການຢ້ຽມຢາມປະເທດຍີ່ປຸ່ນ ຢ່າງເປັນທາງການໃນປີ 2024 ແລະ ຄາດວ່າຈະລົງນາມ ໃນບົດບັນທຶກຊ່ວຍຈໍາ ວ່າດ້ວຍການຮ່ວມມື ລະຫວ່າງ ສະພາແຫ່ງຊາດລາວ ແລະ ລັດຖະສະພາຍີ່ປຸ່ນ ເຊິ່ງສະພາແຫ່ງຊາດລາວ ກໍໄດ້ສົ່ງບົດບັນທຶກດັ່ງກ່າວໃຫ້ລັດຖະສະພາຍີ່ປຸ່ນພິຈາລະນາແລ້ວ ແລະ ສືບຕໍ່ຊຸກຍູ້ການພົວພັນຮ່ວມມືໃນເວທີລັດຖະສະພາພາກພື້ນ ແລະ ສາກົນ. ໂດຍສະເພາະປີ 2024 ທີ່ຈະມາເຖິງນີ້, ສປປລາວ ຈະເປັນປະທານອາຊຽນ ແລະ ສະພາແຫ່ງຊາດລາວ ຈະເປັນເຈົ້າພາບຈັດກອງປະຊຸມໃຫຍ່ສະມັດ ຊາລັດຖະສະພາ ລະຫວ່າງຊາດອາຊຽນ ຄັ້ງທີ 45 (AIPA-45) ແລະ ຫວັງຢ່າງຍິ່ງວ່າ ຍີ່ປຸ່ນຈະສືບຕໍ່ສະໜັບສະໜູນ ສປປ ລາວ ເຮັດສໍາເລັດໜ້າທີ່ດັ່ງກ່າວ.
ຈາກນັ້ນ, ທ່ານ ນາງ ຄາມິກາວະ ໂຢໂກະ ກໍໄດ້ກ່າວສະແດງຄວາມຂອບໃຈຕໍ່ ທ່ານປະທານສະພາແຫ່ງຊາດ ແຫ່ງ ສປປລາວ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມນັ້ນ, ຍັງໄດ້ລາຍງານໃຫ້ຮູ້ກ່ຽວກັບຈຸດປະສົງຂອງການມາຢ້ຽມຢາມ ສປປລາວ ໃນຄັ້ງນີ້ ແລະ ຜົນສຳເລັດໃນການພົບປະສອງຝ່າຍລະຫວ່າງ ກະຊວງການຕ່າງປະເທດ ແຫ່ງ ປະເທດຍີ່ປຸ່ນ ແລະ ກະຊວງການຕ່າງປະເທດ ແຫ່ງ ສປປລາວ ເຊິ່ງສອງຝ່າຍໄດ້ຮ່ວມກັນຕີລາຄາຄືນ ການພົວພັນຮ່ວມມື ລະຫວ່າງສອງກະຊວງການຕ່າງປະເທດ ໃນໄລຍະຜ່ານມາ ແລະ ກໍໍານົດທິດທາງແຜນການຮ່ວມມື ໃນຕໍ່ໜ້າ ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງລັດຖະບານ ກໍຄື ສອງກະຊວງການຕ່າງປະເທດ.