(ສພຊ) ໃນວັນທີ 22 ກຸມພາ 2023, ທີ່ສະພາແຫ່ງຊາດ ນະຄອນຫຼວງວຽງຈັນ ສະຫາຍ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບການເຂົ້າຢ້ຽມຂຳ່ນັບຂອງສະຫາຍ ເລ ຮວາຍ ຈຸງ ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ກອມມູນິດຫວຽດນາມ ພ້ອມດ້ວຍຄະນະ ໂອກາດເຄື່ອນໄຫວເຮັດວຽກຢູ່ ສປປລາວ ໃນລະຫວ່າງວັນທີ 21-22 ກຸມພາ 2023.

ໂອກາດນີ້, ສະຫາຍ ປະທານສະພາແຫ່ງຊາດລາວ ໄດ້ກ່າວສະແດງຄວາມຍິນດີຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ການຢ້ຽມຢາມ ສປປລາວ ຂອງສະຫາຍ ເລ ຮວາຍ ຈຸງ ແລະ ຄະນະ ເຊິ່ງເປັນການປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ເຂົ້າສູ່ລວງເລິກ ໃນທຸກຂົງເຂດວຽກງານ ຢ່າງບໍ່ຢຸດຢັ້ງ ແລະ ນຳເອົາຜົນປະໂຫຍດຕົວຈິງ ມາສູ່ປະຊາຊົນສອງຊາດ ນັບມື້ນັບຫຼາຍຂຶ້ນ. ສະແດງຄວາມຊົມເຊີຍຜົນສໍາເລັດອັນໃຫຍ່ຫຼວງ ແລະ ຮອບດ້ານ ທີ່ພັກ, ລັດ ແລະ ປະຊາຊົນຫວຽດນາມ ອ້າຍນ້ອງ ຍາດມາໄດ້ ພາຍໃຕ້ການນໍາພາອັນຖືກຕ້ອງ, ສະຫຼາດສ່ອງໃສ ແລະ ມີໄຫວພິກຂອງພັກກອມມູນິດຫວຽດນາມ ໂດຍມີສະຫາຍເລຂາທິການໃຫຍ່ ຫງວຽນ ຟູ ຈ້ອງ ເປັນຜູ້ນໍາໜ້າ ໃນຕະຫຼອດໄລຍະຜ່ານມາ ໂດຍສະເພາະໝາກຜົນໃນການຈັດຕັ້ງປະຕິບັດແນວທາງປ່ຽນແປງໃໝ່ ກໍຄືການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ, ອັນເຮັດໃຫ້ ສສ.ຫວຽດນາມ ມີສະຖຽນລະພາບທາງດ້ານການເມືອງຢ່າງໝັກແໜ້ນ, ວຽກງານປ້ອງກັນຊາດ, ປ້ອງກັນຄວາມສະຫງົບມີຄວາມເຂັ້ມແຂງ, ມີຜົນສໍາເລັດໃນການປ້ອງກັນ-ຕ້ານພະຍາດ ແລະ ຟື້ນຟູການພັດທະນາເສດຖະກິດ-ສັງຄົມ, ສ້າງພື້ນຖານເສດຖະກິດ ເອກະລາດ, ເປັນເຈົ້າຕົນເອງ ໂດຍຕິດພັນກັບຄວາມເປັນເຈົ້າການ, ຕັ້ງໜ້າເຊື່ອມໂຍງຢ່າງກວ້າງຂວາງ ແລະ ມີປະສິດທິຜົນ ອັນໄດ້ເຮັດໃຫ້ ເສດຖະກິດຂະຫຍາຍຕົວຢ່າງຕໍ່ເນື່ອງ ແລະ ເພີ່ມຂຶ້ນ, ຊີວິດການເປັນຢູ່ຂອງປະຊາຊົນ ໄດ້ຮັບການຍົກສູງຂຶ້ນເປັນກ້າວໆ.

ພ້ອມນັ້ນ ສະຫາຍ ປະທານສະພາແຫ່ງຊາດລາວ ຍັງໄດ້ຕີລາຄາສູງ ແລະ ຊົມເຊີຍຕໍ່ຜົນການພົບປະເຮັດວຽກ ລະຫວ່າງ ສະຫາຍ ກັບ ສະຫາຍ ທອງສະຫວັນ ພົມວິຫານ ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ; ຕີລາຄາສູງຕໍ່ການປະກອບສ່ວນຂອງ ຄະນະພົວພັນຕ່າງປະເທດ ຂອງສອງສູນກາງພັກ ລາວ-ຫວຽດນາມ ໃນໄລຍະຜ່ານມາ ໃນການປະຕິບັດໜ້າທີ່ເປັນເສນາທິການ ໃຫ້ແກ່ສູນກາງພັກ ໃນການປະສານງານ, ຕິດຕາມ, ຊຸກຍູ້ ການຈັດຕັ້ງຜັນຂະຫຍາຍ ບົດບັນທຶກຂໍ້ຕົກລົງສອງກົມການເມືອງ, ອໍານວຍຄວາມສະດວກດ້ານຕ່າງໆ ໃຫ້ແກ່ການຢ້ຽມຢາມເຊິ່ງກັນ ແລະ ກັນ ຂອງບັນດາການນໍາຂັ້ນສູງຂອງສອງຝ່າຍ ໃນໄລຍະຜ່ານມາ, ມີການປະກອບສ່ວນເຂົ້າໃນຜົນສໍາເລັດ ຂອງການພົບປະ ລະຫວ່າງ ສອງກົມການເມືອງ ລາວ-ຫວຽດນາມ, ຈັດຕັ້ງກິດຈະກໍາສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ, ປະສານສົມທົບໃນການຈັດຊຸດບໍາລຸງສໍາລັບການນໍາຂັ້ນສູງ, ຈັດກອງປະຊຸມສໍາມະນາທິດສະດີ ແລະ ອື່ນໆ ໃນໄລຍະຜ່ານມາ. ຫວັງວ່າ 2 ຄະນະພົວພັນຕ່າງປະເທດສູນກາງພັກ ຈະສືບຕໍ່ພົວພັນຮ່ວມມື ແລະ ສະໜັບສະໜູນເຊິ່ງກັນ ແລະກັນ ຢ່າງສະໜິດແໜ້ນ, ໃກ້ຊິດກັນໃນເວທີພາກພື້ນ ແລະ ສາກົນ.

ຈາກນັ້ນ, ສະຫາຍ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ພ້ອມທັງເເຈ້ງໃຫ້ຊາບກ່ຽວກັບຜົນສຳເລັດໃນການເຄື່ອນໄຫວເຮັດວຽກຢູ່ ສປປລາວ ໃນຄັ້ງນີ້ ແລະ ຈະສືບຕໍ່ເພີ່ມທະວີການພົວພັນຮ່ວມມືສອງຝ່າຍ ປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ ໃຫ້ເຂົ້າສູ່ລວງເລິກ ແລະ ນັບມື້ເກີດດອກອອກຜົນຢ່າງບໍ່ຢຸດຢັ້ງ.