(ສພຊ) ສະຫາຍ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ສະຫາຍ ລູເບັນ ຣິມິກີໂອ ເຟີໂລ ປະທານສານປະຊາຊົນສູງສຸດ ແຫ່ງ ສ.ກູບາ ພ້ອມດ້ວຍຄະນະ ໃນວັນທີ 16 ພະຈິກ 2023 ທີ່ຫໍປະຊຸມສະພາແຫ່ງຊາດລາວ ນະຄອນຫຼວງວຽງຈັນ ໃນໂອກາດທີ່ນໍາພາຄະນະຜູ້ແທນສານປະຊາຊົນສູງສຸດ ແຫ່ງ ສ.ກູບາ ຢ້ຽມຢາມ ສປປລາວ ຢ່າງເປັນທາງການ ໃນລະຫວ່າງວັນທີ 15-18 ພະຈິກ 2023.
ໂອກາດນີ້, ສະຫາຍ ປອ. ໄຊສົມພອນ ພົມວິຫານ ໄດ້ຕີລາຄາສູງຕໍ່ການຢ້ຽມຢາມ ຂອງສະຫາຍ ແລະ ຄະນະ ໃນຄັ້ງນີ້ ເປັນການປະກອບສ່ວນອັນສໍາຄັນໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອເປັນເວລາຍາວນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ ໃຫ້ໄດ້ຮັບການເສີມຂະຫຍາຍ ແລະ ນັບມື້ນັບເຂົ້າສູ່ລວງເລິກ. ພ້ອມນັ້ນ, ກໍໄດ້ແຈ້ງສະພາບການພົ້ນເດັ່ນຂອງ ສປປລາວ ໃຫ້ສະຫາຍ ແລະ ຄະນະ ຊາບວ່າ: ເຖິງວ່າສະພາບການພາກພື້ນ ແລະ ສາກົນ ຍັງສືບຕໍ່ຜັນແປຢ່າງໄວວາ, ສັບສົນ ແລະ ຄາດເດົາໄດ້ຍາກ, ອັນເປັນການກະທົບຕໍ່ການພັດທະນາເສດຖະກິດຂອງຫຼາຍປະເທດໃນໂລກ, ສະເພາະ ສປປລາວ ກໍມີຄວາມຫຍຸ້ງຍາກດ້ານເສດຖະກິດ-ການເງິນ, ບວກກັບຜົນກະທົບຂອງພະຍາດໂຄວິດ-19 ເຮັດໃຫ້ເກີດມີບັນຫາໄພເງິນເຟີ້, ລາຄາສິນຄ້າເພີ່ມຂຶ້ນ, ອັດຕາແລກປ່ຽນເໜັງຕີງແຮງ, ຊີວິດການເປັນຢູ່ຂອງພະນັກງານ, ລັດຖະກອນ ໄດ້ຮັບຜົນກະທົບບໍ່ໜ້ອຍ. ຕໍ່ໜ້າສະພາບການດັ່ງກ່າວ ພັກ, ລັດຖະບານ ແລະ ສະພາແຫ່ງຊາດ ກໍໄດ້ເອົາໃຈໃສ່ຊີ້ນໍາ-ນໍາພາ, ປຸກລະດົມທົ່ວປວງຊົນເຂົ້າຮ່ວມການພັດທະນາປະເທດ ຕາມມະຕິຂອງກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ແລະ ປະຕິບັດບັນດາມາດຕະການຕ່າງໆ ສາມາດເຮັດໃຫ້ ສປປລາວ ຍັງສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ເສດຖະກິດ ສືບຕໍ່ຂະຫຍາຍໂຕໃນທາງບວກ ແລະ ຊີວິດການເປັນຢູ່ຂອງປະຊາຊົນ ຄ່ອຍໆໄດ້ຮັບການແກ້ໄຂດີຂຶ້ນເປັນກ້າວໆ; ປັດຈຸບັນ, ສປປລາວ ພວມສຸມໃສ່ປະຕິບັດ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ເຊິ່ງໄດ້ປະຕິບັດມາ 3 ປີ ແລະ ໄດ້ບັນລຸຜົນສໍາເລັດໃນຫຼາຍດ້ານ; ໄດ້ເອົາໃຈໃສ່ປະຕິບັດນະໂຍບາຍເຊື່ອມໂຍງເຊື່ອມຈອດ ເພື່ອຫັນປ່ຽນຈາກເປັນປະເທດ ບໍ່ມີທາງອອກສູ່ທະເລ ເປັນປະເທດເຊື່ອມຈອດໃນພາກພື້ນ ແລະ ສາກົນ ໂດຍຖືເອົາເສັ້ນທາງລົດໄຟດ່ວນ ລາວ-ຈີນ ເປັນທ່າແຮງໃນການຂົນສົ່ງສິນຄ້າ ແລະ ການທ່ອງທ່ຽວ ຈາກບັນດາປະເທດອາຊຽນ ໄປສູ່ ສປຈີນ ແລະ ປະເທດອື່ນໆ. ພ້ອມນີ້, ກໍມີແຜນຈະສ້າງເສັ້ນທາງລົດໄຟ, ທາງດ່ວນ ຈາກນະຄອນຫຼວງວຽງຈັນ ໄປສູ່ພາກກາງ ແລະ ພາກໃຕ້ ຂອງ ສປປລາວ ແລະ ເຊື່ອມຕໍ່ໃສ່ ຣາຊະອານາຈັກກໍາປູເຈຍ ແລະ ປະເທດໃກ້ຄຽງ ເພື່ອສາມາດນໍາໃຊ້ທ່າແຮງດ້ານພູມສາດ ເປັນປະເທດເຊື່ອມຈອດໃນອານຸພາກພື້ນ. ສະເພາະໃນປີ 2024 ສປປລາວ ຈະເປັນປະທານອາຊຽນ, ສະພາແຫ່ງຊາດ ຈະເປັນປະທານໄອປາ 45 ແລະ ຈະເປີດປີທ່ອງທ່ຽວ ເພື່ອດຶງດູດນັກທ່ອງທ່ຽວເຂົ້າມາລາວໃຫ້ນັບມື້ນັບຫຼາຍຂຶ້ນ ແລະ ສ້າງລາຍຮັບໃຫ້ແກ່ປະເທດຊາດ.
ສະພາແຫ່ງຊາດລາວ ຊຸດທີ IX ໄດ້ຮັບການເລືອກຕັ້ງໃນປີ 2021 ແລະ ຈະມີອາຍຸການຮອດ ປີ 2025. ສປປລາວ ມີສະພາສອງຂັ້ນຄື: ສະພາແຫ່ງຊາດ ແລະ ສະພາປະຊາຊົນຂັ້ນແຂວງ. ສະພາແຫ່ງຊາດ ມີສະມາຊິກທັງໝົດ 164 ທ່ານ, ຍິງ 36 ທ່ານ ກວມເອົາ 21,95%, ສະພາປະຊາຊົນຂັ້ນແຂວງ ຊຸດທີ II ມີສະມາຊິກທັງໝົດ 492 ທ່ານ, ຍິງ 150 ທ່ານ ກວມເອົາ 30,48%.
ສະພາແຫ່ງຊາດ ຊຸດທີ IX ປັດຈຸບັນ ຢູ່ໃນໄລຍະດໍາເນີນກອງປະຊຸມສະໄໝສາມັນ ເທື່ອທີ 6 ຂອງຕົນ ເຊິ່ງກອງປະຊຸມຄັ້ງນີ້ ໄດ້ພິຈາລະນາ ແລະ ຮັບຮອງເອົາບົດລາຍງານການຈັດຕັ້ງປະຕິບັດແຜນການພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາ ຂອງລັດຖະບານ ແລະ ການປະຕິບັດໜ້າທີ່ ຂອງສະພາແຫ່ງຊາດ ກາງສະໄໝ, ຜົນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ໄລຍະ 3 ປີ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງລັດຖະບານ, ອົງການຕຸລາການ, ອົງການກວດສອບແຫ່ງລັດ, ອົງການກວດກາແຫ່ງລັດ ແລະ ສະພາແຫ່ງຊາດ; ໄດ້ພິຈາລະນາຮັບຮອງເອົາການສ້າງ ແລະ ປັບປຸງກົດໝາຍ ຈໍານວນ 8 ສະບັບ. ພິເສດ, ກອງປະຊຸມສະໄໝສາມັນຄັ້ງນີ້ ໄດ້ມີການທາບທາມຄວາມໄວ້ວາງໃຈ ໃນການປະຕິບັດໜ້າທີ່ ຂອງບຸກຄະລາກອນ ທີ່ສະພາແຫ່ງຊາດໄດ້ເລືອກຕັ້ງ ແລະ ຮັບຮອງເອົາການແຕ່ງຕັ້ງ; ສະພາແຫ່ງຊາດລາວ ແລະ ສະພາແຫ່ງຊາດອໍານາດປະຊາຊົນກູບາ ໃນໄລຍະຜ່ານມາ ໄດ້ມີການພົວພັນປົກກະຕິມາໂດຍຕະຫຼອດ ເຊິ່ງມີການແລກປ່ຽນການຢ້ຽມຢາມຂອງຜູ້ແທນລະດັບປະທານສະພາ ແລະ ຄະນະມິດຕະພາບລັດຖະສະພາ ລາວ-ກູບາ ນໍາກັນ ຢ່າງເປັນປົກກະຕິ ມີທັງການພົບປະເຮັດວຽກແບບເຊິ່ງໜ້າ ແລະ ແບບທາງໄກ, ມີການຈັດກອງປະຊຸມປາຖະກະຖາເລົ່າມູນເຊື້ອ ໃນໂອກາດວັນສໍາຄັນຕ່າງໆ ເພື່ອຫວນຄືນການພົວພັນຮ່ວມມືສອງປະເທດ, ມູນເຊື້ອການຕໍ່ສູ້ຂອງປະຊາຊົນກູບາ, ແລກປ່ຽນສະພາບການພົ້ນເດັ່ນໃນການພັດທະນາເສດຖະກິດ-ສັງຄົມໃຫ້ກັນຊາບ. ສອງຝ່າຍໄດ້ລົງນາມບົດບັນທຶກຊ່ວຍຈໍາ (MOU) ວ່າດ້ວຍການຮ່ວມມື ລະຫວ່າງ ສອງອົງການນິຕິບັນຍັດນຳກັນ ເພື່ອຮັດແໜ້ນ ແລະ ເສີມຂະຫຍາຍການພົວພັນຮ່ວມມື ລະຫວ່າງ ສອງອົງການນິຕິບັນຍັດ ແລະ ປະກອບສ່ວນອັນສໍາຄັນໃຫ້ແກ່ການເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືອັນດີຍາວນານ ລະຫວ່າງ ສອງປະເທດ ໃຫ້ເຂົ້າສູ່ລວງເລິກ. ພ້ອມດຽວກັນນັ້ນ, ສະຫາຍປະທານສະພາແຫ່ງຊາດລາວ ຍັງຫວັງຢ່າງຍິ່ງວ່າ ສານປະຊາຊົນສູງສຸດ ສ.ກູບາ ຈະສືບຕໍ່ພົວພັນຮ່ວມມືກັບ ສານປະຊາຊົນສູງສຸດ ສປປລາວ ເພື່ອເພີ່ມພູນຄູນສ້າງການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ ໃຫ້ໄດ້ຮັບການເສີມຂະຫຍາຍ ແລະ ນັບມື້ນັບເຂົ້າສູ່ລວງເລິກ. ຖືໂອກາດນີ້ ສະແດງຄວາມຂອບໃຈ ມາຍັງພັກ, ລັດ ກໍຄື ປະຊາຊົນກູບາອ້າຍນ້ອງ ທີ່ໄດ້ໃຫ້ການສະໜັບສະໜູນຊ່ວຍເຫຼືອອັນລໍ້າຄ່າແກ່ພາລະກິດປະຕິວັດຂອງປະຊາຊົນລາວ ທັງໃນໄລຍະຕໍ່ສູ້ປົດປ່ອຍຊາດໃນເມື່ອກ່ອນ ກໍຄື ໄລຍະປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ.
ໃນຕອນທ້າຍ, ສະຫາຍ ປະທານສະພາແຫ່ງຊາດລາວ ໄດ້ອວຍພອນໃຫ້ສະຫາຍ ລູເບັນ ຣິມິກີໂອ ເຟີໂລ ພ້ອມດ້ວຍຄະນະ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ມີຜົນສຳເລັດອັນຈົບງາມໃນການຢ້ຽມຢາມ ສປປລາວ ແລະ ເດີນທາງກັບດ້ວຍຄວາມສະຫວັດດີພາບ.