(ສພຊ) ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ເມິງຄ໌ບາທາຣ໌ ລັກຄະວາ ຮອງປະທານສະພາຄູຣານໃຫຍ່ມົງໂກລີ ພ້ອມດ້ວຍຄະນະ ໃນວັນທີ 14 ພະຈິກນີ້ ທີ່ຫໍປະຊຸມສະພາແຫ່ງຊາດ ນະຄອນຫຼວງວຽງຈັນ ໃນໂອກາດທີ່ຄະນະຜູ້ແທນດັ່ງກ່າວ ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ລະຫວ່າງວັນທີ 12-14 ພະຈິກ 2023 ນີ້.

ໂອກາດນີ້, ທ່ານ ປອ. ໄຊສົມພອນ ພົມວິຫານ ກໍໄດ້ຕາງໜ້າໃຫ້ສະພາແຫ່ງຊາດ ແຫ່ງ ສປປລາວ ສະແດງຄວາມຍິນດີຕ້ອນຮັບທ່ານ ເມິງຄ໌ບາທາຣ໌ ລັກຄະວາ ພ້ອມດ້ວຍຄະນະ ທີ່ມາຢ້ຽມຢາມເຮັດວຽກ ແລະ ເຂົ້າຮ່ວມການມອບ-ຮັບຜ້າພົມຂອງສະພາຄູຣານໃຫຍ່ມົງໂກລີ ໃຫ້ແກ່ສະພາແຫ່ງຊາດລາວ ໃນຄັ້ງນີ້ ເຊິ່ງເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ ອັນເປັນມູນເຊື້ອ ແລະ ການຮ່ວມມືທີ່ດີ ລະຫວ່າງ ສປປລາວ ແລະ ມົງໂກລີ ກໍຄື ລະຫວ່າງ ສອງອົງການນິຕິບັນຍັດ ໃຫ້ໄດ້ຮັບການເສີມຂະຫຍາຍ ແໜ້ນແຟ້ນຍິ່ງໆຂຶ້ນ. ພ້ອມນີ້, ກໍໄດ້ກ່າວຊົມເຊີຍຕໍ່ການພົບປະ ລະຫວ່າງ ຮອງປະທານສະພາແຫ່ງຊາດລາວ ແລະ ຮອງປະທານສະພາຄູຣານໃຫຍ່ມົງໂກລີ ທີ່ໄດ້ຮັບໝາກຜົນສໍາເລັດຢ່າງຈົບງາມ ໄດ້ມີການປຶກສາຫາລື ແລະ ແລກປ່ຽນຄຳເຫັນນຳກັນຫຼາຍບັນຫາ ໂດຍສະເພາະແມ່ນການຊຸກຍູ້ ແລະ ສົ່ງເສີມການພົວພັນຮ່ວມມືສອງຝ່າຍທີ່ດີຢູ່ເເລ້ວນັ້ນ ໃຫ້ໄດ້ຮັບການເພີ່ມພູນຄູນສ້າງຂຶ້ນໄປເລື້ອຍໆ. ພ້ອມກັນນີ້, ສອງຝ່າຍໄດ້ສໍາເລັດການ ມອບ-ຮັບ ຜ້າພົມ ເຊິ່ງເປັນຂອງຂວັນທີ່ມີຄວາມໝາຍອັນສຳຄັນ ຂອງສະພາຄູຣານໃຫຍ່ມົງໂກລີ ໃຫ້ແກ່ສະພາແຫ່ງຊາດລາວ.

ທ່ານ ປະທານສະພາແຫ່ງຊາດລາວ ຍັງໃຫ້ຮູ້ຕື່ມວ່າ: ສາຍພົວພັນມິດຕະພາບ ແລະ ການຮ່ວມມືສອງຊາດ ກໍຄື ສອງອົງການນິຕິບັນຍັດ ຍັງສືບຕໍ່ໄດ້ຮັບການເສີມຂະຫຍາຍຢ່າງເປັນປົກກະຕິ ແລະ ເຂົ້າສູ່ລວງເລິກຂຶ້ນເປັນກ້າວໆ ເຊິ່ງສະແດງອອກໃນການແລກປ່ຽນການຢ້ຽມຢາມ ຂອງຄະນະຜູ້ແທນຂັ້ນສູງ ແລະ ຂັ້ນຕ່າງໆ, ມີການພົວພັນຮ່ວມມືທັງໃນຂອບສອງຝ່າຍ ແລະ ໃນເວທີລັດຖະສະພາພາກພື້ນ ແລະ ສາກົນ. ໃນໂອກາດທີ່ ຄະນະຜູ້ແທນສະພາແຫ່ງຊາດລາວ ໄດ້ໄປຢ້ຽມຢາມມົງໂກລີຢ່າງເປັນທາງການ ໃນເດືອນກັນຍາຜ່ານມາ, ສອງຝ່າຍ ໄດ້ເປັນເອກະພາບກັນ ແລະ ສຳເລັດການລົງນາມບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ລະຫວ່າງ ສອງອົງການນິຕິບັນຍັດ, ເປັນນິຕິກຳອັນສຳຄັນ ເພື່ອຮັດແໜ້ນ ແລະ ເສີມຂະຫຍາຍສາຍພົວພັນຮ່ວມມື ລະຫວ່າງ ສອງອົງການນິຕິບັນຍັດ ໃຫ້ນັບມື້ນັບໄດ້ຮັບການພັດທະນາຍິ່ງໆຂຶ້ນ.

ທ່ານ ປະທານສະພາແຫ່ງຊາດລາວ ຍັງໄດ້ຝາກຄວາມຢື້ຢາມຖາມຂ່າວ ອັນອົບອຸ່ນ ໄປຍັງ ພະນະທ່ານ ຊັງຕັງຊາທາຣ໌ ກອມບໍຈາວ ປະທານສະພາຄູຣານໃຫຍ່ ແຫ່ງ ມົງໂກລີ. ພ້ອມດຽວກັນນີ້, ກໍອວຍພອນທ່ານ ເມິງຄ໌ບາທາຣ໌ ລັກຄະວາ ພ້ອມດ້ວຍຄະນະ ຈົ່ງມີສຸຂະພາບແຂງແຮງ, ມີຄວາມຜາສຸກ ໃນຊີວິດສ່ວນຕົວ ແລະ ຄອບຄົວ ແລະ ມີຜົນສຳເລັດໃໝ່ໃຫຍ່ຫຼວງກວ່າເກົ່າ ໃນໜ້າທີ່ອັນມີກຽດສະຫງ່າ ຂອງບັນດາທ່ານ ແລະ ເດີນທາງກັບປະເທດດ້ວຍຄວາມສະຫວັດດີພາບທຸກປະການ.

ໃນໂອກາດດຽວກັນ, ທ່ານ ເມິງຄ໌ບາທາຣ໌ ລັກຄະວາ ກໍໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ລາຍງານຜົນການມາຢ້ຽມຢາມ, ເຮັດວຽກຢູ່ ສປປລາວ ຂອງຕົນ ພ້ອມດ້ວຍຄະນະ ແລະ ກ່າວສະແດງຄວາມຂອບໃຈ ທີ່ ສປປລາວ ໄດ້ມອບ ໂຕະຕັ່ງ ຈຳນວນ 50 ຊຸດ ໃຫ້ເປັນຂອງຂວັນແກ່ສະພາຄູຣານໃຫຍ່.