(ສພຊ) ໃນວັນທີ 24 ມີນາ 2023 ນີ້, ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມບໍລິສັດ ໄຟຟ້ານໍ້າເທີນ1 ຈໍາກັດ ຢູ່ເມືອງປາກກະດິງ ແຂວງບໍລິຄໍາໄຊ.
ໂອກາດດັ່ງກ່າວ ຄະນະ ໄດ້ຮັບຟັງການລາຍງານວຽກງານໂຄງການເຂື່ອນໄຟຟ້ານໍ້າເທີນ1 ໂດຍຫຍໍ້. ຈາກນັ້ນ, ຄະນະຕິດຕາມ ໄດ້ມີຄໍາຖາມເຈາະຈີ້ມ ແລະ ແລກປ່ຽນຄຳຄິດຄໍາເຫັນເຊິ່ງກັນ ແລະ ກັນ.
ຈາກນັ້ນ, ທ່ານ ປະທານສະພາແຫ່ງຊາດ ໄດ້ມີຄໍາເຫັນ ເພື່ອໃຫ້ທິດຊີ້ນໍາຕໍ່ບໍລິສັດດັ່ງກ່າວ ເຊິ່ງກ່ອນອື່ນ ທ່ານ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດບັນດາກິດຈະກຳຂອງບໍລິສັດດັ່ງກ່າວ ແລະ ມີຄໍາເຫັນເນັ້ນຕໍ່ບໍລິສັດ ເອົາໃຈໃສ່ບັນຫາຜົນກະທົບຕໍ່ສິ່ງແວດລ້ອມ, ການຈັດສັນທີ່ຢູ່ອາໄສໃຫ້ປະຊາຊົນ, ການສ້າງວຽກເຮັດງານທຳ, ການທ່ອງທ່ຽວ, ການສ້າງບຸກຄະລາກອນສືບທອດ.
ຫຼັງຈາກນັ້ນ, ຄະນະ ກໍໄດ້ຢ້ຽມຊົມພື້ນທີ່ໂຄງການຕົວຈິງ.
