(ສພຊ) – ວັນທີ 18 ຕຸລານີ້ ທີ່ສະພາແຫ່ງຊາດ, ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ຕ້ອນຮັບ ແລະ ພົບປະທ່ານ ເຊຍ ຄຽນ ເປັງ (Seah Kian Peng) ປະທານລັດຖະສະພາ ແຫ່ງ ສາທາລະນະລັດ ສິງກະໂປ ພ້ອມດ້ວຍຄະນະ ໃນໂອກາດເດີນທາງມາເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45.

ທ່ານ ປອ. ໄຊສົມພອນ ພົມວິຫານ ໄດ້ສະແດງຄວາມຍິນດີຕ້ອນຮັບ ພ້ອມທັງຕີລາຄາສູງຕໍ່ການພົບປະ ແລະ ການເຂົ້າຮ່ວມກອງປະຊຸມໄອປາຄັ້ງນີ້ ເຊິ່ງປີນີ້ແມ່ນຄົບຮອບ 50 ປີ ແຫ່ງການສ້າງຕັ້ງສາຍພົວພັນການທູດ ລາວ-ສິງກະໂປ (02/12/1974-02/12/2024) ເປັນການປະກອບສ່ວນເສີມຂະຫຍາຍ ແລະ ຮັດແໜ້ນສາຍພົວພັນມິດຕະພາບ ແລະ ການຮ່ວມມືທີ່ດີລະຫວ່າງສອງປະເທດ ລາວ-ສິງກະໂປ ກໍຄືລະຫວ່າງສອງອົງການນິຕິບັນຍັດ ໃຫ້ໄດ້ຮັບການພັດ ທະນາຍິ່ງໆຂຶ້ນ; ພ້ອມກັນນັ້ນ, ຍັງເປັນການສະໜັບສະໜູນ ແລະ ໃຫ້ກໍາລັງໃຈແກ່ສະພາແຫ່ງຊາດລາວ ເຮັດສໍາເລັດພັນທະສາກົນໃນການເປັນປະທານໄອປາ ກໍຄືເປັນເຈົ້າພາບກອງປະຊຸມໃຫຍ່ໄອປາຄັ້ງທີ 45.

ໃນການພົບປະ, ສອງຝ່າຍໄດ້ພ້ອມກັນຕີລາຄາຄືນການພົວພັນ ແລະ ຮ່ວມມືທີ່ດີນໍາກັນມາໂດຍຕະຫຼອດລະຫວ່າງສະພາແຫ່ງຊາດລາວ ແລະ ລັດຖະສະພາສິງກະໂປ ເຊິ່ງສະແດງອອກມີການແລກປ່ຽນຄະນະຜູ້ແທນຢ້ຽມຢາມເຊິ່ງກັນແລະກັນຢ່າງປົກກະຕິ; ນອກນັ້ນ, ສອງຝ່າຍກໍໄດ້ມີການແລກປ່ຽນບົດຮຽນດ້ານຂໍ້ມູນຂ່າວສານ, ການແລກປ່ຽນບົດຮຽນກ່ຽວກັບການຈັດຕັ້ງປະຕິບັດບົດບາດດ້ານນິຕິບັນຍັດ, ການພັດທະນາເສດຖະກິດ, ການລົງທຶນ, ການຄຸ້ມຄອງສະພາບແວດລ້ອມ. ສອງປະທານຂອງອົງການນິຕິບັນຍັດ ໄດ້ມີການສົ່ງສານຊົມເຊີຍ-ສານອວຍພອນ ເຊິ່ງກັນແລະກັນ ໃນໂອກາດວັນສໍາຄັນຕ່າງໆຂອງ 2 ປະເທດ; ພ້ອມທັງຮ່ວມມືສະໜັບສະໜູນ ແລະ ຊ່ວຍເຫຼືອເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ ເປັນຕົ້ນແມ່ນເວທີ AIPA, IPU, APPF ແລະ ອົງການອື່ນໆ. ພ້ອມກັນນັ້ນ, ສອງຝ່າຍໄດ້ສະເໜີສືບຕໍ່ແລກປ່ຽນຄະນະຜູ້ແທນຂັ້ນສູງ ແລະ ຂັ້ນຕ່າງໆ ລະຫວ່າງສະພາແຫ່ງຊາດລາວ ແລະ ລັດຖະສະພາສິງກະໂປ; ແລກປ່ຽນບົດຮຽນ, ຂໍ້ມູນຂ່າວສານ ແລະ ຮ່ວມກັນສຳມະນາ-ເຝິກອົບຮົມໃນຫົວຂໍ້ຕ່າງໆທີ່ສອງຝ່າຍມີຄວາມສົນໃຈ; ຮ່ວມກັນຊຸກຍູ້ໃຫ້ລັດຖະບານຂອງ 2 ປະເທດ ສືບຕໍ່ຈັດຕັ້ງປະຕິບັດບັນດາສັນຍາ, ສົນທິສັນຍາ, ບັນດາໂຄງການຮ່ວມມື ແລະ ໂຄງການລົງທຶນຕ່າງໆ ທີ່ສອງປະເທດໄດ້ລົງນາມຮ່ວມກັນ ໃຫ້ມີປະສິດທິພາບ ແລະ ປະສິດທິຜົນດີ; ສືບຕໍ່ຮ່ວມມື ແລະ ສະໜັບສະໜູນເຊິ່ງກັນແລະກັນໃນເວທີລັດຖະສະພາພາກພື້ນ ແລະ ສາກົນ.

(ນາງ ອາລິນ ສຸພິມມະປະດິດ)