ໃນວັນທີ 22 ກັນຍາ 2023 ນີ້ ທ່ານ ສາຍທອງ ໄຊຍະວົງ ຮອງເລຂາພັກແຂວງ, ປະທານສະພາປະຊາຊົນແຂວງ, ທັງເປັນປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ແຂວງຈໍາປາສັກ ແລະ ທ່ານ ສົມສີ ມະນີນິນ ກຳມະການພັກແຂວງ, ຮອງປະທານສະພາປະຊາຊົນແຂວງ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຈໍາປາສັກ ສົມທົບກັບ ທ່ານ ສີຈະເລີນໄຊ ສີລາເພັດ ຮອງເລຂາພັກເມືອງ ຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຈໍາປາສັກ, ທ່ານ ນາງ ເຂັມຄໍາ ກິດຕີພັນ ຮອງປະທານຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຈໍາປາສັກ ໄດ້ສໍາເລັດການເຄື່ອນໄຫວພົບປະຢ້ຽມຢາມປະຊາຊົນຜູ້ມີສິດເລືອກຕັ້ງຢູ່ບັນດາບ້ານຂອງເຂດເລືອກຕັ້ງເມືອງຈໍາປາສັກ.
ພາຍຫຼັງທີ່ຄະນະຂອງທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງຈໍາປາສັກ ໄດ້ເລີ່ມເຄື່ອນໄຫວມາແຕ່ວັນທີ 18 ກັນຍາເປັນຕົ້ນມາ ຢູ່ບັນດາຈຸດບ້ານ ແລະກົມກອງອ້ອມຂ້າງຂອງເຂດເລືອກຕັ້ງເມືອງຈໍາປາສັກ ຄື: ບ້ານທ່າຕານ, ບ້ານດອນຕະລາດ, ບ້ານໜອງຫໍ, ບ້ານຄໍາຈະເລີນ, ບ້ານໂນນທາຍ, ບ້ານວັດຫຼວງເກົ່າ, ບ້ານທາງຄົບ, ບ້ານຂອນແກ່ນ ແລະ ສໍານັກງານອົງການປົກຄອງເມືອງຈໍາປາສັກ.
ການເຄື່ອນໄຫວໃນແຕ່ຈຸດໄດ້ຮັບການຕ້ອນຮັບຈາກຄະນະນໍາອົງການປົກຄອງເມືອງ, ອົງການປົກຄອງບ້ານ ແລະ ພໍ່ແມ່ປະຊາຊົນຢ່າງອົບອຸ່ນ. ການເຄື່ອນໄຫວຄະນະໄດ້ດໍາເນີນກອງປະຊຸມພົບປະກັບອົງການປົກຄອງເມືອງ, ອົງການປົກຄອງບ້ານ ແລະພໍ່ແມ່ປະຊາຊົນຜູ້ມີສິດເລືອກຕັ້ງ, ໄດ້ຮັບຟັງການລາຍງານຫຍໍ່ກ່ຽວກັບສະພາບລວມຂອງການຈັດຕັ້ງປະຕິບັດວຽກງານຂອງແຕ່ລະພາກສ່ວນໃນໄລຍະຜ່ານມາ ເຊິ່ງສາມາດເຫັນໄດ້ໝາກຜົນຜົນງານທີ່ພົ້ນເດັ່ນ ແລະຂໍ້ຄົງຄ້າງບາງດ້ານທີ່ອົງການປົກຄອງເມືອງ ແລະ ປະຊາຊົນແຕ່ລະບ້ານຈະຕ້ອງໄດ້ສືບຕໍ່ສຸມໃສໃນການຈັດຕັ້ງປະຕິບັດໃຫ້ມີຜົນສໍາເລັດໃນຕໍ່ໜ້າ. ພ້ອມນັ້ນ, ທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງຈໍາປາສັກ, ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ມີຄໍາເຫັນໂອ້ລົມໂດຍໄດ້ສະເໜີບາງເນື້ອໃນຜົນສໍາເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຈໍາປາສັກ ຊຸດທີ II ທີ່ໄດ້ພິຈາລະນາ ຮັບຮອງ ຫຼາຍບັນຫາສໍາຄັນພື້ນຖານຂອງຊາດ ແລະຂອງແຂວງຈໍາປາສັກ ເຜີຍແຜ່ໃຫ້ພໍ່ແມ່ປະຊາຊົນຜູ້ມີສິດເລືອກຕັ້ງໄດ້ຮັບຮູ້ເຊື່ອມຊຶມເຂົ້າໃຈຢ່າງເລິກເຊິ່ງ ແລະໄດ້ຮຽກຮ້ອງໃຫ້ປະຊາຊົນຜູ້ມີສິດເລືອກຕັ້ງມີສ່ວນຮ່ວມໃນການຈັດຕັ້ງປະຕິບັດວຽກງານ ການສ້າງສາພັດທະນາເສດຖະກິດ-ສັງຄົມ ແລະ ດຳລົງຊີວິດບົນພື້ນຖານການປະຢັດມັດທະຍັດ ພ້ອມກັນສູ້ຊົນຜ່ານຜ່າສະພາບຄວາມຫຍຸ້ງຍາກທີ່ກຳລັງປະເຊີນຢູ່ໃຫ້ສໍາເລັດ. ພ້ອມນີ້, ການພົບປະຍັງໄດ້ເປີດໂອກາດໃຫ້ພໍ່ແມ່ປະຊາຊົນຜູ້ມີສິດເລືອກຕັ້ງໄດ້ປະກອບຄໍາຄິດເຫັນ, ຄໍາສະເໜີ ຕໍ່ຄະນະຜູ້ແທນ ເຊິ່ງຜ່ານການຮັບຟັງຄໍາສະເໜີສາມາດສັງລວມໄດ້ຫຼາຍບັນຫາທີ່ພົວພັນເຖິງການຄຸ້ມຄອງບໍລິຫານລັດ, ການພັດທະນາເສດຖະກິດ-ສັງຄົມ, ການພັດທະນາທີ່ມີຜົນກະທົບຕໍ່ສັງຄົມ, ສິ່ງແວດລ້ອມ ແລະ ຊີວີດການເປັນຢູ່ຂອງປະຊາຊົນ. ຕໍ່ກັບຄໍາສະເໜີຂອງປະຊາຊົນ ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ ໄດ້ຊີ້ແຈ້ງອະທິບາຍຕໍ່ບາງບັນຫາຄໍາສະເໜີໃຫ້ປະຊາຊົນໄດ້ເຂົ້າໃຈ ສ່ວນຄໍາສະເໜີທີ່ເປັນບັນຫາໃຫຍ່ ແລະພົວພັນກັບຂະແໜ່ງການຂອງພາກລັດ ແລະເອກະຊົນ ກອງເລຂາກອງປະຊຸມໄດ້ບັນທຶກສັງລວມ ເພື່ອນໍາໄປລາຍງານຕໍ່ຄະນະປະຈໍາສະພາປະຊາຊົນແຂວງຈໍາປາສັກ ກໍຄືຄະນະປະຈໍາສະພາແຫ່ງຊາດ ຄົ້ນຄວ້າພິຈາລະນາ, ປະສານສົມທົບຊຸກຍູ້ໃຫ້ພາກສ່ວນກ່ຽວຂ້ອງແກ້ໄຂໃຫ້ຖືກຕ້ອງສອດຄ່ອງຕາມກົດໝາຍ ແລະ ລະບຽບການໃນຕໍ່ໜ້າ.
(ພາບ-ຂ່າວ: ສົມວິຈິດ ໄຊມົນຕີ)