ໃນຕອນເຊົ້າ ຂອງວັນທີ 08 ພະຈິກ 2022 ທີ່ຜ່ານມານີ້, ທ່ານ ວົງສະຫວັນ ເທບພະຈັນ ຮອງເລຂາຄະນະບໍລິຫານງານພັກແຂວງ, ປະທານຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງ ທີ 6, ປະທານສະພາປະຊາຊົນແຂວງໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ເອກະສານຜົນສຳເລັດກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX, ສະພາປະຊາຊົນແຂວງ ຫຼວງພະບາງ ຊຸດທີ II ແລະ ບາງເນື້ອໃນ ເອກະສານ ມະຕິກອງປະຊຸມຄົບຄະນະ ຄັ້ງທີ 4 ຂອງຄະນະບໍລິຫານງານສູນກາງພັກ ສະໄໝທີ XI. ຢູ່ທີ່ຫ້ອງປະຊຸມໃຫຍ່ ກອງບັນຊາການປ້ອງກັນຄວາມສະຫງົບແຂວງ ຫຼວງພະບາງ. ມີຄະນະພັກ-ຄະນະນຳ, ຄະນະຫ້ອງ, ພະນັກງານ, ນັກຮົບ, ນາຍ ແລະ ພົນຕຳຫຼວດ ເຂົ້າຮ່ວມຮັບຟັງ ໃຫ້ກຽດຕ້ອນຮັບໂດຍສະຫາຍ ພັອ ຕູຊົງ ປັດໄຈ ຫົວໜ້າກອງບັນຊາການປ້ອງກັນຄວາມສະຫງົບແຂວງ.
ໂອກາດນີ້ ສະຫາຍ ພັທ ຄຳເພົ້າ ເດດບັນດິດ ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດໜ້າທີ່ວຽກງານ ໃນໄລຍະ 09 ເດືອນຜ່ານມາ ແລະ ທິດທາງແຜນການ ໃນ 03 ເດືອນຕໍ່ໜ້າຕິດພັນກັບ ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດຢູ່ແຂວງ ຫຼວງພະບາງ ເຊິ່ງທ່ານໄດ້ຍົກໃຫ້ເຫັນ ບາງຜົນສຳເລັດໃນການຈັດຕັ້ງປະຕິບັດ ເປັນຕົ້ນແມ່ນສາມາຮັກສາໄດ້ຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ ໂດຍພື້ນຖານ, ແຕ່ກໍຍັງມີປະກົດການຫຍໍ້ທໍ້ຈຳນວນໜຶ່ງ ທີ່ຍັງສືບຕໍ່ກໍ່ກວນຢູ່ທັງພາຍໃນ ແລະ ພາຍນອກ. ແຕ່ເຖິງຢ່າງໃດກໍຕາມພາຍໃຕ້ການນຳພາຂອງ
ຄະນະພັກ-ຄະນະນຳຂັ້ນເທິງ ຈຶ່ງເຮັດໃຫ້ບັນດາປະກົດການຫຍໍ້ທໍ້ຕ່າງໆ ນັບມື້ນັບຫຼຸດໜ້ອຍຖອຍລົງເທື່ອລະກ້າວ. ຫຼັງຈາກສຳເລັດການລາຍງານ, ທ່ານຮອງເລຂາຄະນະບໍລິຫານງານພັກແຂວງ, ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ທີ 6, ປະທານສະພາປະຊາຊົນແຂວງ ໄດ້ເຜີຍແຜ່ເອກະສານຜົນສຳເລັດ ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX, ສະພາປະຊາຊົນແຂວງ ຫຼວງພະບາງ ຊຸດທີ II ແລະ ບາງເນື້ອໃນ ເອກະສານ ມະຕິກອງປະຊຸມຄົບຄະນະ ຄັ້ງທີ 4 ຂອງຄະນະບໍລິຫານງານສູນກາງພັກ ສະໄໝທີ XI, ໃຫ້ບັນດາຄະນະພັກ-ຄະນະນຳ, ຄະນະຫ້ອງ, ພະນັກງານ, ນັກຮົບ, ນາຍ ແລະ ພົນຕຳຫຼວດ ໄດ້ຮັບຟັງ. ເຊິ່ງຜົນຂອງກອງປະຊຸມ ແມ່ນໄດ້ພິຈາລະນາ ແລະ ຮັບຮອງເອົາຫຼາຍໆ ບັນຫາທີ່ສໍາຄັນຂອງຊາດ ແລະ ຂອງແຂວງ. ຈຸດປະສົງຂອງການເຜີຍແຜ່ເອກະສານໃນຄັ້ງນີ້ ແມ່ນເພື່ອແນໃສ່ເຮັດໃຫ້ນາຍ ແລະ ພົນຕຳຫຼວດ ມີຄວາມຮັບຮູ້, ເຂົ້າໃຈ ແລະ ກຳແໜ້ນຕໍ່ແນວທາງ ນະໂຍບາຍຂອງພັກ, ຮັບຮູ້ເນື້ອໃນຜົນສໍາເລັດຂອງກອງປະຊຸມ ເພື່ອນໍາໄປຈັດຕັ້ງຜັນຂະຫຍາຍເຂົ້າສູ່ການດຳລົງຊີວິດ ແລະ ການຈັດຕັ້ງປະຕິບັດໜ້າທີ່ວຽກງານ ໃຫ້ຖືກຕ້ອງ, ສອດຄ່ອງ ແນວທາງຂອງພັກ ແລະ ຕາມລະບຽບ, ກົດໝາຍ ຂອງລັດ.
ພາບ ແລະ ຂ່າວໂດຍ: ໄວພົດ ເສລີພົງໄຊ