ໃນລະຫວ່າງວັນທີ 14-16 ກຸມພາ 2024, ທ່ານ ທອງສີ ເສົາສຸລິພົມ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2, ປະທານສະພາປະຊາຊົນແຂວງ ພ້ອມດ້ວຍຄະນະທີມງານສະມາຊິກສະພາປະຊາຊົນແຂວງ (ສສຂ) ປະຈໍາເມືອງບຸນເໜືອ ມີ ທ່ານ ໄຊນະພາບ ສຸຈັນ ຮອງເລຂາພັກເມືອງ, ຫົວໜ້າຄະນະ ສສຂ ປະຈໍາເມືອງບຸນເໜືອ, ທ່ານ ໄຊລັງ ຄໍາຜາສຸກ ແລະ ທ່ານ ນາງ ວັນຄໍາ ນະຄອນສຸກ ສສຂ ປະຈໍາເມືອງບຸນເໜືອ ໄດ້ສໍາເລັດການລົງເຜີຍແຜ່ເນື້ອໃນຜົນສໍາເລັດ ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ທີ່ເມືອງບຸນເໜືອ ແຂວງຜົ້ງສາລີ, ເຊິ່ງປະກອບມີ 10 ຈຸດ: 1. ຈຸດເທດສະບານ; 2. ບ້ານໃໝ່ລົງທົ່ງ, 3. ບ້ານອະແປຄໍ ແລະ ແສນດາວໃຕ້, 4. ບ້ານຍອດບຸນ, 5. ບ້ານບໍ່ໃໝ່, 6. ບ້ານນໍ້າຮອຍ, 7. ບ້ານສົມບູນ, 8. ບ້ານຫ້ວຍສູງ, 9. ກອງຮ້ອຍ 112 ແລະ 10. ກອງຮ້ອຍ 117; ທີ່ຈຸດເທດສະບານແມ່ນໄດ້ຮ່ວມກັນເປັນປະທານກອງປະຊຸມຂອງ ສສຊ ແລະ ບັນດາທ່ານ ສສຂ ເປັນກຽດເຂົ້າຮ່ວມຮັບຟັງມີ ມີບັນດາທ່ານຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ອົງການທຽບເທົ່າ, ພະນັກງານ-ລັດຖະກອນອ້ອມຂ້າງເມືອງ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ, ເຂົ້າຮ່ວມ 213 ທ່ານ, ຍິງ 104 ທ່ານ.

ບັນດາບ້ານ, ກອງຮ້ອຍ ທີ່ຢູ່ເຂດຫ່າງໄກສອກຫຼີກຈາກເທດສະບານ ແມ່ນໄດ້ແບ່ງອອກເປັນ 2 ທີມງານ ເພື່ອລົງພົບປະກັບປະຊາຊົນຜູ້ມີສິດເລືອກຕັ້ງ, ການເຄື່ອນໄຫວໃນແຕ່ລະຈຸດມີເລຂາຄະນະພັກຮາກຖານກຸ່ມ, ນາຍບ້ານ, ອໍານາດການປົກຄອງບ້ານທີ່ກ່ຽວຂ້ອງ ພ້ອມດ້ວຍພໍ່ແມ່ປະຊາຊົນຜູ້ມີສິດເລືອກຕັ້ງໃນແຕ່ລະຈຸດ ເຂົ້າຮ່ວມ 473 ທ່ານ, ຍິງ 184 ທ່ານ.

ການລົງພົບປະກັບປະຊາຊົນຜູ້ມີສິດເລືອກຕັ້ງໃນຄັ້ງນີ້ ແມ່ນເພື່ອນໍາເອົາເນື້ອໃນຈິດໃຈຜົນສໍາເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II, 2 ວາລະແຫ່ງຊາດ, ຕິດພັນກັບ ເອກະສານມູນເຊື້ອກອງທັບປະຊາຊົນລາວ ຄົບຮອບ 75 ປີ ແລະ ເພື່ອປະຕິບັດພາລະບົດບາດ, ສິດ ແລະ ໜ້າທີ່ ໃນການເປັນຕົວແທນແຫ່ງສິດ ແລະ ຜົນປະໂຫຍດອັນຊອບທຳຂອງປະຊາຊົນບັນດາເຜົ່າ ທັງເປັນການຫັນລົງຮາກຖານ, ເກັບກໍາບັນດາສະພາບການ, ຄໍາຄິດຄໍາເຫັນ, ຄໍາສະເໜີຕ່າງໆ ຂອງຜູ້ມີສິດເລືອກຕັ້ງ ແລະ ທັງເປັນການຢ້ຽມຢາມຖາມຂ່າວປະຊາຊົນເຂດຫ່າງໄກສອກຫຼີກ. ໃນການລົງເຜີຍແຜ່ຄັ້ງນີ້, ໄດ້ຮັບຟັງການລາຍງານສະພາບລວມ, ການພັດທະນາເສດຖະກິດ-ສັງຄົມ, ຂໍ້ສະດວກ, ຂໍ້ຫຍຸ້ງຍາກ ຈາກຫົວໜ້າກຸ່ມບ້ານ, ນາຍບ້ານ ຂອງແຕ່ລະບ້ານ, ຫົວໜ້າກອງຮ້ອຍ ໂດຍຫຍໍ້ ແລະ ຄໍາສະເໜີຕ່າງໆຈາກປະຊາຊົນ ແລະ ນາຍທະທານ ພ້ອມດຽວກັນນັ້ນ, ທ່ານ ປະທານສະພາປະຊາຊົນແຂວງ ແລະ ສສຂ ກໍໄດ້ຊີ້ແຈງອະທິບາຍຕໍ່ບາງຄຳສະເໜີດັ່ງກ່າວໃຫ້ປະຊາຊົນຮັບຮູ້ເຂົ້າໃຈ ແລະ ເກັບກໍາ, ນໍາເອົາບາງຄຳສະເໜີ ທີ່ຍັງເຫັນວ່າມີຄວາມຫຍຸ້ງຍາກ ໂດຍສະເພາະແມ່ນກ່ຽວກັບພື້ນຖານໂຄງລ່າງ, ການປະຕິບັດນະໂຍບາຍ ເພື່ອນໍາມາຄົ້ນຄວ້າ, ພິຈາລະນາ ແລະ ສັງລວມສົ່ງໃຫ້ພາກສ່ວນກ່ຽວຂ້ອງ ໃຫ້ຮີບຮ້ອນແກ້ໄຂຕາມຄວາມເໝາະສົມ, ຖືກຕາມລະບຽບກົດໝາຍ ແລະ ທັນຕາມກຳນົດເວລາ.

ນອກຈາກນີ້, ທ່ານປະທານສະພາປະຊາຊົນແຂວງ ພ້ອມດ້ວຍຄະນະທີມງານ ສສຂ ປະຈໍາເມືອງ ຍັງໄດ້ນໍາເອົາເຄື່ອງອຸປະໂພກ-ບໍລິໂພກ, ເຄື່ອງນຸ່ງຫົ່ມ, ອຸປະກອນກິລາປະເພດບານຕີ ແລະ ວັດຖຸປັດໄຈ ຈໍານວນໜຶ່ງ ມອບໃຫ້ນາຍ ແລະ ພົນທະຫານ ຂອງກອງຮ້ອຍ 112, ກອງຮ້ອຍ 117 ແລະ ອໍານາດການປົກຄອງບ້ານໃນແຕ່ລະບ້ານ

  ພາບ-ຂ່າວ: ສູນທອງ