ໃນວັນທີ 1 ສິງຫາ 2022 ທີ່ຜ່ານມາ ທ່ານ ປອ ກໍລະກັນ ພົມມະວົງ ຄະນະປະຈໍາ, ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ທ່ານ ສຸວິລັດ ພັນສຸເດດ ຮອງປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ພ້ອມດ້ວຍທີມງານ ໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ວຽກງານປະຈຳ 6 ເດືອນຕົ້ນປີ 2022 ຢູ່ນະຄອນ-ຫຼວງພະບາງ.
ໃນໂອກາດດັ່ງກ່າວ ໄດ້ຮັບຟັງການລາຍງານສະພາບລວມໂດຍຫຍໍ້ ຈາກທ່ານ ຮອງເຈົ້ານະຄອນ-ຫຼວງພະບາງ, ຫຼັງຈາກນັ້ນ ຍັງໄດ້ຮັບຟັງການຊີ້ແຈງບາງບັນຫາ ຕາມຄໍາຖາມເຈາະຈີ້ມ ທີ່ທາງຄະນະກຳມະການໄດ້ສົ່ງໃຫ້ກ່ອນໜ້ານັ້ນ ຈາກຜູ້ຕ່າງໜ້າ ບັນດາຫ້ອງທີ່ກ່ຽວຂ້ອງ ຂອງນະຄອນ ຊຶ່ງປະກອບຂົງເຂດເສດຖະກິດ, ແຜນການ ແລະ ການເງິນ, ຂົງເຂດວັດທະນະທຳ-ສັງຄົມ ແລະ ຂົງເຂດຕຸລາການ.
ການລົງເຄື່ອນໄຫວຕິດຕາມກວດກາ ແລະ ຊຸກຍູ້ວຽກງານຂອງຄະນະກຳມະການໃນຄັ້ງນີ້ ກໍ່ເພື່ອເປັນການເກັບກຳເອົາບັນດາການຈັດຕັ້ງປະຕິບັດຄາດໝາຍຕາງໆ , ຄໍາຄິດ-ຄຳເຫັນ ພ້ອມທັງຄຳສະເໜີ ຂອງແຕ່ລະຂົງເຂດວຽກງານ ເພື່ອລາຍງານຄະນະປະຈຳ ແລະ ເປັນສ່ວນໜຶ່ງປະກອບໃສ່ເນື້ອໃນບົດລາຍງານຕໍ່ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ທີ່ຈະເປີດຂຶ້ນໃນຕົ້ນເດືອນ ສິງຫາ 2022 ທີ່ຈະມາເຖິງນີ້.
ໃນໂອກາດທີ່ທ່ານ ຄະນະປະຈຳ, ປະທານ ແລະ ຮອງປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ຂອງສະພາປະຊາຊົນແຂວງ ໄດ້ລົງມາເຄື່ອນໄຫວເຮັດວຽກໃນຄັ້ງນີ້ ຕອນທ້າຍ ຍັງໄດ້ເນັ້ນໃຫ້ບັນດາຂົງເຂດວຽກງານຂອງນະຄອນ-ຫຼວງພະບາງ ຈົ່ງພ້ອມກັນສຸ່ມໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳ 6 ເດືອນທ້າຍປີ 2022 ທີ່ນະຄອນ ໄດ້ກຳນົດໄວ້ ແລະ ບັນດາຄາດໝາຍຕາງໆ ໃຫ້ບັນລຸຕາມຈຸດປະສົງ ແລະ ເປົ້າໝາຍທີ່ວາງໄວ້;
ໃຫ້ສືບຕໍ່ປົກປັກຮັກສາ ແລະ ຄຸ້ມຄອງນະຄອນ–ຫຼວງພະບາງ ໃຫ້ມີຄວາມເປັນລະບຽບຮຽບຮ້ອຍ ແລະ ສ້າງຄວາມປະທັບໃຈໃຫ້ແກ່ແຂກຕ່າງດ້າວ, ທ້າວຕາງແດນ ທີ່ເຂົ້າມາທ່ຽວຊົມພາຍໃນນະຄອນ-ຫຼວງພະບາງ ມາແລ້ວຢາກມາອີກຕໍ່ໆໄປ.
ຂຽນໂດຍ: ເພັດສະໜອນ ທຳມຸງຄຸນ