(ສພຊ) – ວັນທີ 22 ພະຈິກນີ້ ທີ່ສະພາແຫ່ງຊາດ, ສະຫາຍ ຄຳແພງ ວິລະພັນ ປະທານກໍາມາທິການກົດໝາຍ ໄດ້ພົບປະກັບສະຫາຍ ເຫີ ທຽນຊາຍ ຮອງປະທານຄະນະປະຈໍາສະພາຜູ້ແທນປະຊາຊົນແຂວງຊານຊີ ແຫ່ງ ສປຈີນ ພ້ອມດ້ວຍຄະນະ ໃນໂອກາດມາຢ້ຽມຢາມ ແລະ ເຮັດວຽກຢູ່ ສປປລາວ ລະຫວ່າງວັນທີ 21-23 ພະຈິກ 2024 ເຊິ່ງເປັນການປະກອບສ່ວນຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ແລະ ການເປັນຄູ່ຮ່ວມຊາຕາກໍາສັງຄົມນິຍົມ ລາວ-ຈີນ, ຈີນ-ລາວ ໃຫ້ນັບມື້ເປັນຮູບປະທຳ ແລະ ນຳເອົາຜົນປະໂຫຍດສູງສຸດມາສູ່ປະຊາຊົນສອງຊາດ.

ໃນການພົບປະ, ສອງຝ່າຍໄດ້ແຈ້ງສະພາບການທີ່ພົ້ນເດັ່ນຂອງອົງການນິຕິບັນຍັດ ແລະ ການເຄື່ອນໄຫວວຽກງານຂອງກໍາມາທິການກົດໝາຍ ແລະ ສະພາຜູ້ແທນປະຊາຊົນແຂວງຊານຊີ ໃຫ້ກັນແລະກັນຊາບໂດຍຫຍໍ້ ພ້ອມທັງຮ່ວມກັນຕີລາຄາສູງຕໍ່ຜົນຂອງການພົບປະເຮັດວຽກລະຫວ່າງສະພາປະຊາຊົນແຂວງຫຼວງພະບາງ ແລະ ສະພາຜູ້ແທນປະຊາຊົນແຂວງຊານຊີ ໂດຍໄດ້ຮ່ວມກັນປຶກສາຫາລືສ້າງບົດບັນທຶກການຮ່ວມມືລະຫວ່າງສະພາປະຊາຊົນແຂວງຫຼວງພະບາງ ກັບ ສະພາຜູ້ແທນປະຊາຊົນແຂວງຊານຊີ ແນໃສ່ເພີ່ມທະວີ ແລະ ຊຸກຍູ້ການພົວພັນຮ່ວມມື, ການແລກປ່ຽນຄະນະຜູ້ແທນ, ການປະສານງານ, ການແລກປ່ຽນຂໍ້ມູນຂ່າວສານ ແລະ ບົດຮຽນເຊິ່ງກັນແລະກັນ ລະຫວ່າງສອງອົງການນິຕິບັນຍັດຂັ້ນທ້ອງຖິ່ນ ໃຫ້ເປັນຮູບປະທຳ ແລະ ນໍາເອົາປະໂຫຍດມາສູ່ປະຊາຊົນຢ່າງແທ້ຈິງ. ສຳລັບທິດທາງການຮ່ວມມືໃນຕໍ່ໜ້າ, ກໍາມາທິການກົດໝາຍ ແລະ ສະພາຜູ້ແທນປະຊາຊົນແຂວງຊານຊີ ຈະເປັນເສນາທິການໃນການຈັດຕັ້ງຜັນຂະຫຍາຍຂໍ້ຕົກລົງວ່າດ້ວຍການຮ່ວມມືລະຫວ່າງສະພາແຫ່ງຊາດລາວ ກັບ ສະພາຜູ້ແທນປະຊາຊົນທົ່ວປະເທດຈີນ ໂດຍສະເພາະສືບຕໍ່ແລກປ່ຽນຄະນະຜູ້ແທນຂັ້ນຕ່າງໆ ທີ່ຕິດພັນກັບການແລກປ່ຽນບົດຮຽນ ແລະ ປະສົບການກ່ຽວກັບການປະຕິບັດພາລະບົດບາດນິຕິບັນຍັດ; ຝ່າຍຈີນຈະສືບຕໍ່ໃຫ້ການຊ່ວຍເຫຼືອ ແລະ ພັດທະນາຊັບພະຍາກອນມະນຸດແກ່ສະພາແຫ່ງຊາດ ແລະ ສະພາປະຊາຊົນຂັ້ນທ້ອງຖິ່ນຂອງ ສປປລາວ.

ຄະນະຜູ້ແທນສະພາຜູ້ແທນປະຊາຊົນແຂວງຊານຊີ ຍັງໄດ້ເຂົ້າຢ້ຽມຂໍ່ານັບສະຫາຍ ຄຳໃບ ດຳລັດ ຮອງປະທານສະພາແຫ່ງຊາດ, ພົບປະເຮັດວຽກກັບສະຫາຍ ປອ. ອານຸພາບ ຕຸນາລົມ ປະທານສະພາປະຊາຊົນນະຄອນຫຼວງວຽງຈັນ, ຢ້ຽມຊົມຫໍພິພິທະພັນ ແລະ ປູຊະນີຍະສະຖານສຳຄັນຢູ່ນະຄອນຫຼວງວຽງຈັນ.

(ນາງ ອາລິນ ສຸພິມມະປະດິດ)