(ສພຊ) ໃນຕອນບ່າຍ ຂອງວັນທີ 25 ເມສາ 2023 ທີ່ສະພາແຫ່ງຊາດ ທ່ານ ສັນຍາ ປຣະເສີດ, ປະທານກໍາມາທິການການຕ່າງປະເທດ ສະພາແຫ່ງຊາດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ Enna Esther Viant Valdes, ເອກອັກຄະລັດຖະທູດ ແຫ່ງ ສາທາລະນະລັດ ກູບາ ປະຈຳ ສປປ ລາວ.
ໃນໂອກາດດັ່ງກ່າວ, ທ່ານ ປະທານກຳມາທິການການຕ່າງປະເທດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຈິງໃຈຕໍ່ ທ່ານ ນາງ Enna Esther Viant Valdes ໃນການມາເຂົ້າຢ້ຽມຂໍ່ານັບ ຄັ້ງນີ້ ເພື່ອປຶກສາຫາລື ກ່ຽວກັບການຊຸກຍູ້ ແລະ ສົ່ງເສີມສາຍພົວພັນມິດຕະພາບທີ່ເປັນມູນເຊື້ອອັນດີງາມ ມາແຕ່ດົນນານ ລະຫວ່າງ ສອງປະເທດ ລາວ-ກູບາ ແລະ ສະແດງຄວາມຊົມເຊີຍ ຕໍ່ການມາດຳລົງຕຳແໜ່ງເປັນເອກອັກຄະລັດຖະທູດ ແຫ່ງ ສາທາລະນະລັດ ກູບາ ປະຈຳ ສປປ ລາວ ຊຶ່ງຈະເປັນຂົວຕໍ່ ໃນການເສີມຂະຫຍາຍການພົວພັນຮ່ວມມືຂອງສອງປະເທດ ສປປ ລາວ ແລະ ສ.ກູບາ ເປັນປະເທດເພື່ອນມິດຍຸດທະສາດ ທີ່ມີອຸດົມການສັງຄົມນິຍົມ ອັນດຽວກັນ; ຕະຫຼອດໄລຍະທີ່ຜ່ານມາ, ສອງປະເທດ ມີການພົວພັນຮ່ວມມື ອັນດີງາມນໍາກັນຢ່າງເປັນປົກກະຕິ ນັບແຕ່ໄດ້ສ້າງຕັ້ງສາຍພົວພັນທາງການທູດນຳກັນ ໃນປີ 1974.
ທ່ານປະທານກໍາມາທິການການຕ່າງປະເທດ ໄດ້ຕີລາຄາສູງຕໍ່ການພົວພັນຮ່ວມມື ຂອງສອງອົງການນິຕິບັນຍັດ ຂອງສອງປະເທດ ຊຶ່ງສະແດງອອກມີການແລກ ປ່ຽນການຢ້ຽມຢາມ ລະຫວ່າງ ຄະນະຜູ້ແທນຂັ້ນສູງ ຂອງສອງຝ່າຍຜ່ານມາ:
ໃນປີ 2007, ທ່ານປະທານສະພາອຳນາດປະຊາຊົນ ແຫ່ງ ກູບາ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ໃນເດືອນກຸມພາ 2019, ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ຊຸດທີ VIII ກໍໄດ້ຢ້ຽມຢາມສັນຖະວະໄມຕີ ທີ່ ສ.ກູບາ ຢ່າງເປັນທາງການ ຕາມຄຳເຊີນຂອງ ທ່ານ Esteban Lazo Hernández. ໃນໄລຍະການຢ້ຽມຢຽມດັ່ງກ່າວ ສອງສະພາແຫ່ງຊາດ ລາວ-ກູບາ; ທັງສອງຝ່າຍ ກໍ່ໄດ້ລົງນາມບົດບັນທຶກຊ່ວຍຈໍາ (MOU) ວ່າດ້ວຍການຮ່ວມມື ລະຫວ່າງ ສອງອົງການນິຕິບັນຍັດນຳກັນ. ນອກຈາກນີ້, ສອງອົງການນິຕິບັນຍັດ ຍັງມີການແລກປ່ຽນບົດຮຽນ ແລະ ຂໍ້ມູນ-ຂ່າວສານ, ສົ່ງສານຊົມເຊີຍ, ສານອວຍພອນ ເຊິ່ງກັນ ແລະ ກັນ ໃນໂອກາດວັນສຳຄັນຂອງຊາດ ແລະ ສະໜັບສະໜູນກັນ ໃນເວທີລັດຖະສະພາພາກພື້ນ ແລະ ສາກົນ. ພ້ອມກັນນີ້, ທ່ານປະທານກໍາມາທິການການຕ່າງປະເທດ ໄດ້ແຈ້ງສະພາບການປະຕິບັດພາລະບົດບາດ ແລະ ໜ້າທີ່ ຂອງກໍາມາທິການການຕ່າງປະເທດ ສະພາແຫ່ງຊາດ ໃຫ້ທ່ານເອກອັກຄະລັດຖະທູດ ແຫ່ງ ສາທາລະນະລັດ ກູບາ ຊາບ ແລະ ປຶກສາຫາລືທິດທາງ ແຜນການການພົວພັນຮ່ວມມື ລະຫວ່າງສອງອົງການນິຕິບັນຍັດໃນຕໍ່ໜ້າໂດຍຈະ ສືບຕໍ່ຊຸກຍູ້ ໃຫ້ສອງປະເທດ ກໍ່ຄື 2 ສະພາແຫ່ງຊາດ ມີການແລກປ່ຽນຄະນະຜູ້ແທນຢ້ຽມຢາມ, ໄປມາຫາສູ່ກັນ ໃຫ້ນັບມື້ຫຼາຍຂຶ້ນ; ສືບຕໍ່ສະໜັບສະໜູນ ແລະ ຮ່ວມມືກັນ ໃນການເຄື່ອນໄຫວໃນເວທີລັດຖະສະພາພາກພື້ນ ແລະ ສາກົນ ເພື່ອປະກອບສ່ວນເຂົ້າໃນການປົກປັກຮັກສາສັນຕິ ພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາແບບຍືນຍົງໃນພາກພື້ນ ແລະ ສາກົນ. ນອກນີ້, ຍັງສະ ເໜີໃຫ້ສອງອົງການນິຕິບັນຍັດ ສືບຕໍ່ຊຸກຍູ້ໃຫ້ສອງລັດຖະບານ ຂອງສອງປະເທດ ຈັດຕັ້ງປະຕິບັດບັນດາສັນຍາ, ສົນທິ ສັນຍາ ແລະ ນິຕິກໍາ ທີ່ໄດ້ລົງນາມຮ່ວມກັນ ໃຫ້ເປັນຮູບປະທຳ ເພື່ອນຳເອົາຜົນປະໂຫຍດ ຂອງສອງປະເທດຢ່າງແທ້ຈິງ.
ທ່ານເອກອັກຄະລັດຖະທູດ ແຫ່ງ ສາທາລະນະລັດ ກູບາ ກໍ່ໄດ້ກ່າວສະແດງຄວາມຂອບໃຈຕໍ່ ທ່ານປະທານກຳມາທິການການຕ່າງປະເທດ ທີ່ໄດ້ເສຍສະຫຼະເວລາອັນມີຄຸນຄ່າ ໃຫ້ການຕ້ອນຮັບໃນຄັ້ງນີ້ ແລະ ເຫັນດີ ຕໍ່ຄໍາຄິດຄຳເຫັນ ຂອງທ່ານ ປະທານກຳມາທິການການຕ່າງປະເທດ ທີ່ໄດ້ກ່າວມາແລ້ວນັ້ນ, ພ້ອມທັງ ໄດ້ແຈ້ງໃຫ້ທ່ານປະທານກຳມາທິການການຕ່າງປະເທດຊາບ ກ່ຽວກັບ ຜົນການເລືອກຕັ້ງ ແລະ ແຕ່ງຕັ້ງບຸກຄະລາກອນ ຂອງສະພາແຫ່ງຊາດອຳນາດຂອງປະຊາຊົນ ແຫ່ງ ສ.ກູບາ ທີ່ຫາກໍ່ສຳເລັດລົງ ໃນຕົ້ນເດືອນເມສາ 2023 ທີ່ຜ່ານມາ. ທ່ານເອກອັກຄະລັດຖະທູດ ກູບາ ໄດ້ຢັ້ງຢືນ ຈະສືບຕໍ່ປະຕິບັດໜ້າທີ່ ຂອງຕົນ ໃນຖານະທີ່ເປັນເອກອັກຄະລັດຖະທູດ ເພື່ອເສີມຂະຫຍາຍສາຍພົວ ພັນ ລະຫວ່າງ ສອງປະເທດ ກໍຄື ສອງພັກ, ສອງລັດ ເວົ້າສະເພາະ ກໍ່ຄືສອງອົງການນິຕິບັນຍັດ ໃຫ້ນັບມື້ນັບແໜ້ນແຟ້ນ ແລະ ເປັນຮູບປະທຳຫຼາຍຂຶ້ນກວ່າເກົ່າ.