(ສພຊ) – ວັນສຸກທີ 10 ພຶດສະພາ 2024 ທ່ານ ນາງ ທຸມມາລີ ວົງພະຈັນ ຄະນະປະຈຳສະພາແຫ່ງຊາດ, ປະທານກຳມາທິການວັດທະນະທຳ-ສັງຄົມ ໄດ້ຕ້ອນຮັບການເຂົ້າຢ້ຽມຂ່ຳນັບອຳລາຂອງທ່ານ ໂກບາຢາຊິ ເຄນອິຈິ (KOBAYASHI Kenichi) ເອກອັກຄະລາຊະທູດແຫ່ງຍີ່ປຸ່ນ ປະຈຳ ສປປລາວ ໃນໂອກາດທີ່ໄດ້ສຳເລັດພາລະໜ້າທີ່ທາງການທູດຢູ່ ສປປລາວ.

ທ່ານ ນາງ ທຸມມາລີ ວົງພະຈັນ ໃນນາມປະທານຄະນະມິດຕະພາບລັດຖະສະພາ ລາວ-ຍີ່ປຸ່ນ ຂອງສະພາແຫ່ງຊາດຊຸດທີ IX ແລະ ໃນນາມສ່ວນຕົວ ໄດ້ສະແດງຄວາມຍ້ອງຍໍຊົມເຊີຍ, ຂອບອົກຂອບໃຈ ແລະ ຕີລາຄາສູງຕໍ່ການປະກອບສ່ວນອັນໃຫຍ່ຫຼວງຂອງທ່ານທູດ ເຂົ້າໃນການເສີມສ້າງສາຍພົວພັນມິດຕະພາບທີ່ເປັນມູນເຊື້ອອັນດີງາມ ແລະ ການຮ່ວມມືລະຫວ່າງສອງອົງການນິຕິບັນຍັດ ກໍຄືສອງຄະນະມິດຕະພາບລັດຖະສະພາ ລາວ-ຍີ່ປຸ່ນ, ຍີ່ປຸ່ນ-ລາວ; ດ້ວຍການປະກອບສ່ວນ, ຊຸກຍູ້ ແລະ ອຳນວຍຄວາມສະດວກໃນຕະຫຼອດໄລຍະຜ່ານມາ ຈຶ່ງເຮັດໃຫ້ສາຍພົວພັນຮ່ວມມືດັ່ງກ່າວ ໂດຍສະເພາະແມ່ນການເຄື່ອນໄຫວວຽກງານຂອງຄະນະມິດຕະພາບລັດຖະສະພາຂອງສອງປະເທດ ມີບັນຍາກາດອັນໃໝ່ທີ່ດີຂຶ້ນ, ມີຜົນງານດີເດັ່ນຫຼາຍດ້ານ ແລະ ມີຜົນສຳເລັດໃຫຍ່ຫຼວງກວ່າເກົ່າ. ຕໍ່ຜົນງານດັ່ງກ່າວ, ຄະນະປະຈຳສະພາແຫ່ງຊາດ, ຄະນະມິດຕະພາບລັດຖະສະພາ ລາວ-ຍີ່ປຸ່ນ ໄດ້ຕີລາຄາສູງ, ຍ້ອງ ຍໍຊົມເຊີຍເປັນພິເສດ ແລະ ຫວັງຢ່າງຍິ່ງວ່າ ທ່ານຈະສືບຕໍ່ໃຫ້ການຮ່ວມມື, ຊ່ວຍເຫຼືອ ແລະ ປະກອບສ່ວນ ຕາມພາລະບົດບາດ ແລະ ຄວາມຮັບຜິດຊອບຂອງທ່ານ ເຂົ້າໃນການຊ່ວຍສະໜັບສະໜູນການພົວພັນຮ່ວມມືລະຫວ່າງ ສອງອົງການນິຕິບັນຍັດ ກໍຄືສອງຄະນະມິດຕະພາບລັດຖະສະພາ ລາວ-ຍີ່ປຸ່ນ, ຍີ່ປຸ່ນ-ລາວ ໃນຕໍ່ໜ້າ. ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການຊ່ວຍເຫຼືອແກ່ ສປປລາວ ໃນໄລຍະຜ່ານມາ ເຊິ່ງເປັນການປະກອບສ່ວນອັນສຳຄັນເຂົ້າໃນການພັດທະນາ ແລະ ສ້າງສາປະເທດຊາດຂອງພວກຂ້າພະເຈົ້າ.

ທ່ານ ໂກບາຢາຊິ ເຄນອິຈິ ໄດ້ສະແດງຄວາມຂອບໃຈຕໍ່ທ່ານປະທານກຳມາທິການວັດທະນະທຳ-ສັງຄົມ ທີ່ໄດ້ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງສະແດງຄວາມຂອບໃຈຕໍ່ທຸກພາກສ່ວນຂອງສະພາແຫ່ງຊາດ ທີ່ໄດ້ໃຫ້ການພົວພັນຮ່ວມມື, ສະໜັບສະໜູນ, ອຳນວຍຄວາມສະດວກ ແລະ ຊ່ວຍເຫຼືອຕົນເອງຕະຫຼອດໄລຍະທີ່ປະຕິບັດໜ້າທີ່ການທູດຢູ່ ສປປລາວ ເຮັດໃຫ້ມີຜົນສຳເລັດຕາມຄາດໝາຍທີ່ວາງໄວ້ ແລະ ຈະສືບຕໍ່ປະກອບສ່ວນ ເຮັດໃຫ້ການພົວພັນຮ່ວມມືລະຫວ່າງ ລາວ ແລະ ຍີ່ປຸ່ນ ໄດ້ຮັບການຂະຫຍາຍຕົວຍິ່ງໆຂຶ້ນ.

(ພາບ-ຂ່າວ: ອານຸສອນ ພູມມີທອນ)