ຕອນເຊົ້າຂອງວັນທີ 15 ພຶດສະພາ 2024 ທີ່ສຳນັກງານສະພາປະຊາຊົນແຂວງຄໍາມ່ວນ, ທ່ານ ຄໍາຈັນ ໂສຕາປະເສີດ ກຳມະການຄະນະປະຈໍາສະພາແຫ່ງຊາດ ປະທານກຳມາທິການບັນດາເຜົ່າສະພາແຫ່ງຊາດ ພ້ອມດ້ວຍຄະນະໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ວຽກງານກ່ຽວກັບການຈັດຕັ້ງປະຕິບັດບັນດາຄາດໝາຍຂອງວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຢູ່ແຂວງຄໍາມ່ວນ; ເຂົ້າຮ່ວມຕິດຕາມ ແລະເຮັດວຽກໂດຍມີ ທ່ານ ນາງ ບັງອອນ ໄຊຍະສິດ ກຳມະການປະຈໍາພັກແຂວງ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 12 ແຂວງຄໍາມ່ວນ, ທ່ານ ນາງ ກ້ອນແກ້ວ ຫຼວງໄຊມຸງຄຸນ ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນຂັ້ນແຂວງ, ມີບັນດາທ່ານ ຄະນະປະຈໍາສະພາປະຊາຊົນຂັ້ນແຂວງ, ອົງການຈັດຕັ້ງຂັ້ນແຂວງ, ຫົວໜ້າພະແນກ/ຮອງຫົວໜ້າພະແນກ, ຄະນະກອງບັນຊາການ ປກຊ-ປກສ ແຂວງ, ພ້ອມດ້ວຍແຂກຖືກເຊີນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມໄດ້ຮັບຟັງການລາຍງານ ຕາມຄຳຖາມເຈາະຈິ້ມຂອງ ກຳມາທິການບັນດາເຜົ່າ ຂອງສະພາແຫ່ງຊາດ ເປັນຕົ້ນ: ການຈັດຕັ້ງປະຕິບັດ 09 ຄາດໝາຍ ຕາມມະຕິ 82/ສພຊ, ລົງວັນທີ 30 ທັນວາ 2022 ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປະຈໍາປີ 2022 ແລະ ທິດທາງແຜນການ ປະຈໍາປີ 2023; ການປະເມີນມາດຖານພົ້ນທຸກ ແລະ ມາດຖານພັດທະນາຕາມດຳລັດ 348/ ລບ, ລົງວັນທີ 16 ພະຈິກ 2017, ເພື່ອຈັດຕັ້ງປະຕິບັດບັນດາຄາດໝາຍຂອງແຜນ ປີ 2024 ໃຫ້ສຳເລັດ ແລະ ກ່ຽວກັບການແກ້ໄຂປະກົດການຫຍໍ້ທໍ້ທາງສາສະໜາ ແລະ ບັນດາເຜົ່າ ຢູ່ພາຍໃນແຂວງ; ພ້ອມນັ້ນ, ປະທານກອງປະຊຸມ, ໄດ້ມີຄໍາຊັກຖາມເຈາະຈີ້ມບາງບັນຫາໃນການຈັດຕັ້ງປະຕິບັດວຽກງານ, ບັນດາຜູ້ເຂົ້າຮ່ວມໄດ້ພ້ອມກັນແລກປ່ຽນຄໍາຄິດ-ຄໍາເຫັນ ແລະ ຕອບຂໍ້ຊັກຖາມຢ່າງກົງໄປກົງມາ ໃນການຈັດຕັ້ງປະຕິບັດວຽກງານຕົວຈິງໃນໄລຍະຜ່ານມາ ຍົກໃຫ້ເຫັນດ້ານດີ, ດ້ານອ່ອນ ແລະ ຂໍ້ຄົງຄ້າງ, ເປັນຂໍ້ມູນພື້ນຖານ ເພື່ອຊອກຫາວິທີການ ແລະ ມາດຕະການແກ້ໄຂ ລາຍງານຕໍ່ຄະນະປະຈໍາສະພາແຫ່ງຊາດມີທິດຊີ້ນໍາໃນຂັ້ນຕໍ່ໄປ ແລະ ເພື່ອເຮັດໃຫ້ການຈັດຕັ້ງປະຕິບັດວຽກງານບັນດາເຜົ່າພາຍໃນທົ່ວແຂວງຄໍາມ່ວນ, ຖຶກຕ້ອງຕາມແນວທາງຂອງພັກ ແລະ ລະບຽບກົດໝາຍຂອງລັດ.
ໃນຕອນທ້າຍກອງປະຊຸມ ທ່ານ ຄໍາຈັນ ໂສຕາປະເສີດ ປະທານກຳມາທິການບັນດາເຜົ່າສະພາແຫ່ງຊາດ ເຊິ່ງທ່ານໄດ້ມີຄໍາເຫັນ ແລະ ກ່າວສະແດງຄວາມຍ້ອງຍໍຊົມເຊີຍຕໍ່ ສະພາປະຊາຊົນແຂວງຄໍາມ່ວນ ທີ່ປະສານສົມທົບເປັນຂົວຕໍ່ໄປຍັງພະແນກການຂອງແຂວງ ແລະ ເມືອງ ໃນການເຂົ້າຮ່ວມລົງເຄື່ອນໄຫວວຽກງານຕິດຕາມກວດກາ, ຊຸກຍູ້ວຽກງານໃນຂົງເຂດບັນດາເຜົ່າຄັ້ງນີ້, ທ່ານຍັງໄດ້ສະແດງຄວາມຂອບໃຈ ບັນດາພະແນກການຂອງແຂວງ, ຂະແໜງການທີ່ກ່ຽວຂ້ອງ ທີ່ໄດ້ໃຫ້ການຮ່ວມມື ແລະ ສະໜອງຂໍ້ມູນຮອບດ້ານໃຫ້ຄະນະທີ່ໄດ້ລົງມາເຄື່ອນໄຫວຕິດຕາມກວດກາ ແລະ ຊຸກຍູ້ເຊິ່ງຈະເປັນຂໍ້ມູນພື້ນຖານອັນສຳຄັນ, ເປັນບ່ອນອີງທີ່ຈະສັງລວມລາຍງານຕໍ່ ຄະນະປະຈໍາສະພາແຫ່ງຊາດ ພິຈາລະນາ ແລະ ໃຫ້ທິດຊີ້ນໍາໃນການຈັດຕັ້ງປະຕິບັດວຽກງານດັ່ງກ່າວໃນຕໍ່ໜ້າ; ພ້ອມນັ້ນ ທ່ານຍັງໄດ້ຮຽກຮ້ອງໃຫ້ທຸກພາກສ່ວນເຮັດໜ້າທີ່ຕາມພາລະບົດບາດຂອງຕົນດ້ວຍຄວາມເອົາໃຈໃສ່, ຍົກສູງຄວາມຮັບຜິດຊອບໜ້າທີ່ການເມືອງຂອງຕົນ, ເອົາໃຈ ໃສ່ສຶກສາອົບຮົມພໍ່ແມ່ປະຊາຊົນໃຫ້ເຊື່ອມຊືມເຂົ້າໃຈແຈ້ງ ແລະ ກຳແໜ້ນຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມະຕິຂອງກອງປະຊຸມສະພາແຫ່ງຊາດ, ມະຕິຂອງຄະນະປະຈໍາສະພາແຫ່ງຊາດ, ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ໃຫ້ມີປະສິດທິພາບ ແລະ ປະສິດທິຜົນ; ໃກ້ສິດຕິດແທດ, ພົບປະ-ຮັບຕ້ອນປະຊາຊົນ, ເກັບກໍາ ແລະ ນໍາເອົາຄໍາຄິດຄໍາເຫັນ ແລະ ຄໍາສະເໜີຂອງປະຊາຊົນ ເພື່ອສະເໜີຕໍ່ສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ພາກສ່ວນອື່ນທີ່ກ່ຽວຂ້ອງ ພິຈາລະນາ, ແກ້ໄຂ ທັງຕິດຕາມຜົນຂອງການແກ້ໄຂ, ລວມທັງມີການສະຫຼຸບລາຍງານການເຄື່ອນໄຫວວຽກງານໃນເຂດເລືອກຕັ້ງຂອງຕົນຢ່າງເປັນປົກກະຕິ, ຕໍ່ເນື່ອງ ແລະ ທັນກຳນົດເວລາ; ເພີ່ມທະວີການພົວພັນ, ປະສານສົມທົບກັນທັງພາຍໃນ ແລະ ພາຍນອກ, ລະຫວ່າງສູນກາງ ແລະ ທ້ອງຖິ່ນ ກັບພາກສ່ວນທີ່ກ່ຽວຂ້ອງ ເພື່ອເປັນທ່າແຮງຕໍ່ການຊຸກຍູ້ ແລະ ຕິດຕາມການປະຕິບັດວຽກງານຂອງຂະແໜງການ ໃນຂົງເຂດບັນດາເຜົ່າໃຫ້ມີຜົນສຳເລັດ.
ການເຄື່ອນໄຫວວຽກງານຄັ້ງນີ້, ທ່ານ ປະທານກຳມາທິການບັນດາເຜົ່າສະພາແຫ່ງຊາດ ພ້ອມດ້ວຍຄະນະຈະໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ວຽກງານຢູ່ 2 ເມືອງຄື: ເມືອງບົວລະພາ ແລະ ເມືອງຫີນບູນ, ວັນທີ 16-17 ພຶດສະພາ 2024ຈິ່ງຈະສຳເລັດ.
ໂດຍ: ເອື້ອ ມະໂນສິງ