(ສພຊ) ໃນຕອນເຊົ້າຂອງວັນທີ 6 ມີນາ 2023 ທີ່ສະພາແຫ່ງຊາດ ສະຫາຍ ຄໍາຈັນ ໂສຕາປະເສີດ ປະທານກໍາມາທິການບັນດາເຜົ່າ ສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບການມາພົບປະເຮັດວຽກ ຂອງສະຫາຍ ອີ ແທັງ ຮ່າ ນຽກ ເກີດຳ ກໍາມະການສູນກາງພັກກອມມູນິດຫວຽດນາມ, ປະທານສະພາຊົນຊາດ ສະພາແຫ່ງຊາດ ແຫ່ງ ສສ.ຫວຽດນາມ ພ້ອມດ້ວຍຄະນະ ເນື່ອງໃນໂອກາດທີ່ສະຫາຍ ມາຢ້ຽມຢາມ ແລະ ເຮັດວຽກຢູ່ ສປປລາວ ພ້ອມດ້ວຍຄະນະຝ່າຍລາວ ເຂົ້າຮ່ວມການພົບປະ 2 ຝ່າຍໃນຄັ້ງນີ້.
ໃນໂອກາດດັ່ງກ່າວ ສະຫາຍ ຄຳຈັນ ໂສຕາປະເສີດ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ມີຄຳຄິດເຫັນ ຕໍ່ສະຫາຍ ອີ ແທັງ ຮ່າ ນຽກ ເກີດຳ ພ້ອມດ້ວຍຄະນະ ໃນໂອກາດທີ່ມາຢ້ຽມຢາມ ແລະ ເຮັດວຽກ ຢູ່ ສປປລາວ ຄັ້ງນີ້ວ່າ: ການພົບປະປຶກສາຫາລືໃນຄັ້ງນີ້ ເປັນການປະຕິບັດເນື້ອໃນຈິດໃຈບົດບັນທຶກການຮ່ວມມືລະຫວ່າງ ກຳມາທິການບັນດາເຜົ່າ ສະພາແຫ່ງຊາດລາວ ກັບ ສະພາຊົນຊາດ ສະພາແຫ່ງຊາດ ສສ.ຫວຽດນາມ ເພື່ອຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ-ສອງລັດ, ປະຊາຊົນສອງຊາດ ກໍຄືສອງອົງການນິຕິບັນຍັດເວົ້າລວມ, ເວົ້າສະເພາະ ແມ່ນສອງພາກສ່ວນ ໃຫ້ນັບມື້ນັບຂະຫຍາຍຕົວຍິ່ງໆຂຶ້ນ ແລະ ປະກອບສ່ວນເຂົ້າໃນກິດຈະກຳສະເຫຼີມສະຫຼອງ ການສ້າງຕັ້ງສາຍພົວພັນການທູດ ຄົບຮອບ 60 ປີ ແລະ ວັນເຊັນສັນຍາມິດຕະພາບ ແລະ ການຮ່ວມມືລະຫວ່າງສອງປະເທດ ລາວ-ຫວຽດນາມ ຄົບຮອບ 45 ປີ ເຊິ່ງຫາກໍສໍາເລັດລົງ ໃນປີ 2022 ຜ່ານມາ, ການມາຢ້ຽມຢາມ ແລະ ເຮັດວຽກ ຢູ່ ສປປລາວ ໃນຄັ້ງນີ້ ຂອງສະຫາຍ ແລະ ຄະນະ ເຊິ່ງເປັນໂອກາດດີໃຫ້ສອງຝ່າຍ ໄດ້ມີການແລກປ່ຽນຄຳຄິດຄຳເຫັນ ແລະ ຖອດຖອນບົດຮຽນນໍາກັນ ກ່ຽວກັບບັນຫາຕ່າງໆ ທີ່ຕິດພັນກັບການເຄື່ອນໄຫວວຽກງານຂອງກຳມາທິການບັນດາເຜົ່າ ສະພາແຫ່ງຊາດລາວ ຊຸດທີ IX ແລະ ສະພາຊົນຊາດ ສະພາແຫ່ງຊາດ ສສ.ຫວຽດນາມ ຊຸດທີ XV, ຂໍອວຍພອນໄຊອັນປະເສີດໃຫ້ສະຫາຍ ອີ ແທັງ ຮ່າ ນຽກ ເກີດຳ ພ້ອມດ້ວຍຄະນະ ຈົ່ງມີພາລານາໄມສົມບູນ ມີຄວາມຜາສຸກໃນຄອບຄົວ, ສ່ວນຕົວ ແລະ ປະສົບຜົນສຳເລັດໃນໜ້າທີ່ວຽກງານອັນມີກຽດຂອງບັນດາສະຫາຍ; ອວຍພອນການມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງຄະນະໃນຄັ້ງນີ້ ຈົ່ງປະສົບຜົນສຳເລັດ. ພ້ອມທັງສືບຕໍ່ໃນການເປັນຂົວຕໍ່ທີ່ດີໃຫ້ແກ່ການພົວພັນ ແລະ ຮ່ວມມື ລະຫວ່າງ ສອງອົງການນິຕິບັນຍັດ ລາວ-ຫວຽດນາມ ໃຫ້ນັບມື້ເຂົ້າສູ່ລວງເລິກ; ອວຍພອນແດ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ຈົ່ງໝັ້ນຄົງຂະໜົງແກ່ນຊົ່ວກາລະນານ.
ຈາກນັ້ນ ສະຫາຍ ອີ ແທັງ ຮ່າ ນຽກ ເກີດຳ ໄດ້ກ່າວສະແດງຄວາມຂອບໃຈ ຕໍ່ສະຫາຍ ປະທານກຳມາທິການບັນດາເຜົ່າ ສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະ ທີ່ໄດ້ສະຫຼະເວລາອັນມີຄ່າຕ້ອນຮັບຄະນະຢ່າງອົບອຸ່ນ ແລະ ໄດ້ລາຍງານຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ ສປປລາວ ລະຫວ່າງ ວັນທີ 5-8 ມີນາ 2023 ໃນຄັ້ງນີ້ ໃຫ້ສະຫາຍ ປະທານກຳມາທິການບັນດາເຜົ່າ ພ້ອມດ້ວຍຄະນະ ໄດ້ຮັບຊາບວ່າ: ກ່ຽວກັບການເມືອງ, ເສດຖະກິດ-ສັງຄົມ ກໍຄືບັນຫາສໍາຄັນຂອງຊາດ, ກອງປະຊຸມສະພາສະໄໝສາມັນເທື່ອທີ V ໄດ້ຜ່ານກົດໝາຍ ມີ 12 ຮ່າງກົດໜາຍ ທີ່ສໍາຄັນ ແລະ ມີການຕັດສິນ ໂດຍສະເພາະແມ່ນ ກົດໝາຍການປິ່ນປົວ, ກົດໝາຍທີ່ດິນ, ກົດໝາຍການຄ້າ ແລະ ກົດໝາຍໃຊ້ຄວາມຮຸນແຮງໃນຄອບຄົວ, ກົດໝາຍທີ່ໃຫ້ຄວາມສໍາຄັນກວ່າໝູ່ແມ່ນກົດໝາຍທີ່ດິນ ເຊິ່ງໄດ້ມີການປັບປຸງໃໜ່ໃຫ້ແທດເໝາະກັບການດໍາລົງຊີວິດໃນປັດຈຸບັນ, ຫຼັງຈາກນັ້ນ ສະຫາຍ ອີ ແທັງ ຮ່າ ນຽກ ເກີດຳ ພ້ອມດ້ວຍຄະນະ ຍັງໄດ້ທ່ຽວຊົມຫ້ອງປະຊຸມໃຫຍ່ ຂອງສະພາແຫ່ງຊາດລາວ, ຈາກນັ້ນ ຄະນະກໍເດີນທາງຢ້ຽມຂໍ່ານັບ ປະທານສູນກາງແນວລາວສ້າງຊາດ ແລະ ລັດຖະມົນຕີກະຊວງພາຍໃນ ແລະ ໄດ້ເດີນທາງທ່ອງທ່ຽວ ທີ່ແຂວງຫຼວງພະບາງ ເມືອງມໍລະດົກໂລກອີກດ້ວຍ.
