(ສພຊ) ໃນວັນທີ 20 ກຸມພາ 2023 ທີ່ຫໍສະພາແຫ່ງຊາດ, ນະຄອນຫຼວງວຽງຈັນ ທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ ແລະ ທ່ານ ທັນຕາ ກອງຜາລີ ຮອງປະທານກໍາມາທິການແຜນການ, ການເງິນ ແລະ ການກວດສອບ ຕາງໜ້າຄະນະປະຈໍາສະພາແຫ່ງຊາດ ແຫ່ງ ສປປລາວ ພົບປະສອງຝ່າຍກັບທ່ານ ນາງ ເກບບຣີເລ ກາສມາເລັກ (Gabriele KATZMAREK) ສະມາຊິກສະພາແຫ່ງຊາດ, ປະທານກຸ່ມລັດຖະສະພາອາຊຽນ ພ້ອມດ້ວຍຄະນະ ໃນໂອກາດມາຢ້ຽມຢາມ ແລະ ເຮັດວຽກ ຢູ່ ສປປລາວ ໃນລະຫວ່າງວັນທີ 19-21 ກຸມພາ 2022.
ໃນການພົບປະຄັ້ງນີ້, ທ່ານ ສັນຍາ ປຣະເສີດ ໄດ້ສະແດງຄວາມຍິນດີຕ້ອນຮັບ ທ່ານ ນາງ ເກບບຣີເລ ກາສມາເລັກ ພ້ອມດ້ວຍຄະນະ ແລະ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສອງປະເທດລາວ ແລະ ເຢຍລະມັນ ເວົ້າລວມ, ເວົ້າສະເພາະ ແມ່ນສອງອົງການນິຕິບັນຍັດ. ທ່ານ ນາງ ເກບບຣີເລ ກາສມາເລັກ ໄດ້ສະແດງຄວາມພາກພູມໃຈທີ່ໄດ້ມາຢ້ຽມຢາມ ແລະ ເຮັດວຽກ ຢູ່ ສປປລາວ, ໄດ້ແຈ້ງໃຫ້ຊາບຈຸດປະສົງຂອງການມາເຮັດວຽກໃນຄັ້ງນີ້ ແລະ ໄດ້ຍົກໃຫ້ເຫັນຜົນສຳເລັດການຮ່ວມມື ລະຫວ່າງ ສອງປະເທດ ລາວ-ເຢຍລະມັນ ໃນໄລຍະຜ່ານມາ ເປັນຕົ້ນ: ການພັດທະນາຊົນນະບົດ, ການກໍ່ສ້າງພື້ນຖານໂຄງລ່າງ, ວຽກງານອາຊີວະສຶກສາ, ການອະນຸລັກສິ່ງແວດລ້ອມ, ການພັດທະນາເສດຖະກິດແບບຍືນຍົງ ແລະ ການສົ່ງເສີມພາກທຸລະກິດ-ເອກະຊົນ ເຊິ່ງເປັນການປະກອບສ່ວນອັນສຳຄັນໃນການພັດທະນາເສດຖະກິດ-ສັງຄົມ ຂອງ ສປປລາວ.
ໃນໂອກາດນີ້, ທ່ານປະທານກໍາມາທິການການຕ່າງປະເທດ ໄດ້ຕີລາຄາສູງຕໍ່ການພົວພັນຮ່ວມມື ສະພາແຫ່ງຊາດລາວ ແລະ ລັດຖະສະພາເຢຍລະມັນ ທີ່ໄດ້ຮັບການພັດທະນາຢ່າງປົກກະຕິ ແລະ ຕໍ່ເນື່ອງ ເຊິ່ງສະແດງອອກໃນການແລກປ່ຽນການຢ້ຽມຢາມ ຂອງຄະນະຜູ້ແທນນໍາກັນຢ່າງເປັນປົກກະຕິ. ພ້ອມດຽວກັນນີ້, ທ່ານປະທານກໍາມາທິການການຕ່າງປະເທດ ໄດ້ແຈ້ງໃຫ້ຊາບກ່ຽວກັບສະພາບພົ້ນເດັ່ນ ຂອງ ສປປລາວ ແລະ ການເຄື່ອນໄຫວໂດຍຫຍໍ້ ຂອງສະພາແຫ່ງຊາດລາວ ໃຫ້ຝ່າຍເຢຍລະມັນຮັບຊາບ. ສອງຝ່າຍໄດ້ປຶກສາຫາລື ແລະ ຊອກຫາວິທີທາງ ເພື່ອເຮັດໃຫ້ສອງປະເທດສືບຕໍ່ແລກປ່ຽນຄະນະຜູ້ແທນໃນຕໍ່ໜ້າ ແລະ ຊຸກຍູ້ການຮ່ວມມືໃນຂົງເຂດເສດຖະກິດ, ການຄ້າ, ການລົງທຶນ ແລະ ອື່ນໆ ຂອງສອງປະເທດໃຫ້ຫຼາຍຂຶ້ນກວ່າເກົ່າ. ນອກຈາກນີ້, ສອງຝ່າຍຍັງແລກປ່ຽນຄໍາຄິດຄຳເຫັນກ່ຽວກັບການເສີມຂະຫຍາຍການພົວພັນຮ່ວມມື ລະຫວ່າງ ສອງອົງການນິຕິບັນຍັດຂອງສອງປະເທດ ໂດຍສະເພາະການແລກປ່ຽນຢ້ຽມຢາມຂອງຄະນະຜູ້ແທນ, ການແລກປ່ຽນຂໍ້ມູນ-ຂ່າວສານກ່ຽວກັບການຈັດຕັ້ງປະຕິບັດພາລະບົດບາດຂອງອົງການນິຕິບັນຍັດ ແລະ ການຮ່ວມມື ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ. ການພົບປະສອງຝ່າຍ ໄດ້ດໍາເນີນໄປດ້ວຍບັນຍາກາດທີ່ສະໜິດສະໜົມ ແລະ ກົງໄປກົງມາ ເຊິ່ງເປັນການເສີມສ້າງສາຍພົວພັນມິດຕະພາບ ແລະການຮ່ວມມືຂອງສອງປະເທດໃຫ້ແໜ້ນແຟ້ນຂຶ້ນ.
ນອກຈາກການພົບປະເຮັດວຽກຢູ່ສະພາແຫ່ງຊາດແລ້ວ, ຄະນະຜູ້ແທນ ຍັງໄດ້ພົບປະເຮັດວຽກນໍາທ່ານ ເຈົ້າ ແຂວງແຂວງຫຼວງພະບາງ ແລະ ຢ້ຽມຢາມສະຖານທີ່ທ່ອງທ່ຽວວັດທະນະທຳຈໍານວນໜຶ່ງຢູ່ ນະຄອນຫຼວງວຽງຈັນ ແລະ ແຂວງຫຼວງພະບາງ.