(ສພຊ) ໃນວັນທີ 2 ເມສາຜ່ານມາ ທີ່ສະພາແຫ່ງຊາດ ນະຄອນຫລວງວຽງຈັນ, ສະຫາຍ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ພົບປະທາງໄກກັບສະຫາຍ ເວືອງ ດິງ ເຫວະ ກຳມະການກົມການເມືອງສູນກາງພັກກອມມູນິດຫວຽດນາມ, ປະທານສະພາແຫ່ງຊາດ ແຫ່ງ ສສ. ຫວຽດນາມ; ສະຫາຍປະທານສະພາແຫ່ງຊາດລາວ ໄດ້ສະແດງຄວາມຊົມເຊີຍຢ່າງຈິງໃຈ ທີ່ ສະຫາຍ ເວືອງ ດິງ ເຫວະ ໄດ້ຖືກເລືອກຕັ້ງເປັນປະທານສະພາແຫ່ງຊາດ ແຫ່ງ ສສ.ຫວຽດນາມ ຄົນໃໝ່ ໃນກອງປະຊຸມສະໄໝສາມັນເທື່ອທີ 11 ຂອງສະພາແຫ່ງຊາດ ຊຸດທີ XIV ທີ່ພວມດຳເນີນຢູ່, ການໄດ້ຮັບເລືອກຕັ້ງດັ່ງກ່າວ ໄດ້ເປັນການສະແດງເຖິງຄວາມເຊື່ອໝັ້ນ ແລະ ໄວ້ເນື້ອເຊື່ອໃຈຂອງພັກ, ລັດ ກໍຄືປະຊາຊົນຫວຽດນາມອ້າຍນ້ອງ ມອບໝາຍໜ້າທີ່ອັນສຳຄັນ ແລະ ມີກຽດສະຫງ່າໃຫ້ແກ່ສະຫາຍ; ພ້ອມທັງເຊື່ອໝັ້ນເປັນຢ່າງຍິ່ງວ່າ ພາຍໃຕ້ການຊີ້ນຳ-ນຳພາຂອງສະຫາຍ, ສະພາແຫ່ງຊາດຫວຽດນາມ ຈະສືບຕໍ່ຈັດຕັ້ງປະຕິບັດພາລະບົດບາດ ໃນນາມອົງການນິຕິບັນຍັດ ປະສົບຜົນສຳເລັດໃໝ່ໃຫຍ່ຫລວງກວ່າເກົ່າ ທັງເຮັດໃຫ້ຊື່ສຽງ ແລະ ຖານະບົດບາດຂອງສະພາແຫ່ງຊາດຫວຽດນາມ ພົ້ນເດັ່ນໃນເວທີພາກພື້ນ ແລະ ສາກົນ, ພ້ອມທັງເປັນການສືບຕໍ່ຮັດແໜ້ນ, ເສີມຂະຫາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ; ຫວຽດນາມ-ລາວ ໃຫ້ເຕີບໃຫຍ່ຂະຫຍາຍຕົວ, ເຂົ້າສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ.
ການພົບປະຄັ້ງນີ້ ແມ່ນຢູ່ໃນບັນຍາກາດທີ່ສອງພັກ ຫາກໍສຳເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ແລະ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII ຂອງພັກກອມມູນິດຫວຽດນາມ, ສະພາແຫ່ງຊາດລາວ ໄດ້ສຳເລັດກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ IX ດ້ວຍຜົນສຳເລັດອັນຈົບງາມ ແລະ ສະພາແຫ່ງຊາດຫວຽດນາມ ກຳລັງດຳເນີນກອງປະຊຸມສະໄໝສາມັນ ເທື່ອທີ 11 ຂອງສະພາແຫ່ງຊາດ ຊຸດທີ XIV.
ສະຫາຍ ໄຊສົມພອນ ພົມວິຫານ ໄດ້ແຈ້ງໃຫ້ສະຫາຍຊາບໂດຍຫຍໍ້ ກ່ຽວກັບຜົນສໍາເລັດການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ແລະ ການຈັດກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ IX ເຊິ່ງໄດ້ພິຈາລະນາ ແລະ ຮັບຮອງເອົາບັນດາບັນຫາສຳຄັນຂອງຊາດ.
ໃນໂອກາດດຽວກັນນີ້, ສະຫາຍປະທານສະພາແຫ່ງຊາດລາວ ໄດ້ມີຄວາມປິຕິຊົມຊື່ນເປັນຢ່າງຍິ່ງ ທີ່ເຫັນວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ; ຫວຽດນາມ-ລາວ ໄດ້ເຕີບໃຫຍ່ຂະຫຍາຍຕົວເຂົ້າສູ່ລວງເລິກ ແລະແຕກດອກອອກຜົນຍິ່ງໆຂຶ້ນ, ພ້ອມທັງຕີລາຄາສູງຕໍ່ການພົວພັນຮ່ວມມື ລະຫວ່າງສອງສະພາແຫ່ງຊາດລາວ ແລະ ຫວຽດນາມ ໃນໄລຍະຜ່ານມາ ເຊິ່ງເຫັນວ່າການນໍາຂອງສອງປະເທດ ໄດ້ເອົາໃຈໃສ່ຊຸກຍູ້ ແລະ ເພີ່ມທະວີການພົວພັນ-ຮ່ວມມື ນໍາກັນຢ່າງມີປະສິດທິຜົນ ແລະ ເຂົ້າສູ່ລວງເລິກ ເຊິ່ງສະແດງອອກມີການແລກປ່ຽນຄະນະຜູ້ແທນຢ່າງເປັນປົກກະຕິໃນທຸກລະດັບນັບແຕ່ສູນກາງ ຈົນຮອດທ້ອງຖິ່ນ; ຈັດຕັ້ງສະເຫລີມສະຫລອງສອງວັນປະຫວັດສາດ ກໍຄືວັນຄົບຮອບການສ້າງຕັ້ງສາຍພົວພັນການທູດ ແລະ ວັນຄົບຮອບເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ; ຈັດຕັ້ງກອງປະຊຸມສຳມະນາແລກປ່ຽນບົດຮຽນ ແລະ ປະສົບການ ກ່ຽວກັບການຈັດຕັ້ງປະຕິບັດພາລະບົດບາດ, ການສ້າງກົດໝາຍ, ການຕິດຕາມກວດກາ ແລະ ຫົວຂໍ້ວິທະຍາສາດອື່ນໆ. ພິເສດແມ່ນ ພັກ, ລັດ ແລະ ປະຊາຊົນຫວຽດນາມອ້າຍນ້ອງ ໄດ້ບິແບ່ງທຶນຮອນອັນຫລວງຫລາຍ ເພື່ອກໍ່ສ້າງຫໍສະພາແຫ່ງຊາດລາວຫລັງໃໝ່ ເຊິ່ງທ້າຍເດືອນມີນາຜ່ານມາ ກໍໄດ້ນໍາໃຊ້ເພື່ອດໍາເນີນກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ IX ມີຜົນສຳເລັດເປັນຢ່າງດີ.
ສະພາແຫ່ງຊາດລາວ ໄດ້ມີບາງຂໍ້ສະເໜີສຳລັບທິດທາງແຜນການຮ່ວມມື ລະຫວ່າງສອງສະພາແຫ່ງຊາດລາວ ແລະ ຫວຽດນາມ ໃນຕໍ່ໜ້າດັ່ງນີ້: ສືບຕໍ່ແລກປ່ຽນຄະນະຜູ້ແທນນໍາກັນ ໃນລະດັບປະທານສະພາແຫ່ງຊາດ, ຮອງປະທານສະພາ, ບັນດາກຳມາທິການ, ຄະນະເລຂາທິການ, ສະພາປະຊາຊົນແຂວງ ແລະ ບັນດາກົມທີ່ເປັນເສນາທິການ ຂອງສອງອົງການນິຕິບັນຍັດ; ສືບຕໍ່ຈັດຕັ້ງປະຕິບັດບົດບັນທຶກ ວ່າດ້ວຍການຮ່ວມມືລະຫວ່າງສອງສະພາແຫ່ງຊາດ ລາວ-ຫວຽດນາມ, ລະຫວ່າງສອງຫ້ອງວ່າການສະພາແຫ່ງຊາດ ທີ່ໄດ້ລົງນາມຮ່ວມກັນ ໃຫ້ປາກົດຜົນເປັນຈິງ ໂດຍສະເພາະແມ່ນການຮ່ວມກັນຈັດກອງປະຊຸມສຳມະນາ ເພື່ອລົງເລິກຄົ້ນຄວ້າໃນຫົວຂໍ້ວິທະຍາສາດຕ່າງໆ; ການເຝິກອົບຮົມເພື່ອສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ພະນັກງານວິຊາການ ຂອງສະພາແຫ່ງຊາດລາວ; ຕິດຕາມກວດກາ ແລະ ຊຸກຍູ້ການຮ່ວມມືທາງດ້ານເສດຖະກິດ ເປັນຕົ້ນແມ່ນການຄ້າ, ການລົງທຶນ, ການຈັດຕັ້ງປະຕິບັດສັນຍາ, ສົນທິສັນຍາ ແລະ ຂໍ້ຕົກລົງ ລະຫວ່າງ ສອງລັດຖະບານ ທີ່ໄດ້ລົງນາມຮ່ວມກັນ; ເຫັນດີເປັນເອກະພາບຮ່ວມກັນຈັດຕັ້ງການສະເຫລີມສະຫລອງປີສາມັກຄີມິດຕະພາບ ໃນປີ 2022 ກໍຄືການສະເຫລີມສະຫລອງ ຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດ ແລະຄົບຮອບ 45 ປີ ແຫ່ງການເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ; ຫວຽດນາມ-ລາວ ເພື່ອໃຫ້ຄົນຮຸ່ນໜຸ່ມທີ່ເປັນຜູ້ສືບທອດໄດ້ຮັບຮູ້ ແລະ ເຂົ້າໃຈ ຕໍ່ສາຍພົວພັນພິເສດດັ່ງກ່າວ; ສືບຕໍ່ຮ່ວມມື ແລະ ຊ່ວຍເຫລືອເຊິ່ງກັນແລະກັນ ໃນການເຄື່ອນໄຫວວຽກງານການຕ່າງປະເທດ ໃນເວທີລັດຖະສະພາພາກພື້ນ ແລະສາກົນ.
ແຫຼ່ງຂ່າວທີ່ມາ: ສະພາແຫ່ງຊາດ