(ສປນວ) ວັນທີ 10 ພະຈິກ 2022 ນໍາພາໂດຍ ທ່ານ ອານຸພາບ ຕຸນາລົມ ປະທານ ສະພາປະຊາຊົນ ນວ ແລະ ທ່ານ ນາງ ສົມພຽນ ວົງໄຊ ປະທານ ຄະນະກຳມະການຍຸຕິທຳ ແລະ ປກຊ-ປກສ ສະພາປະຊາຊົນ ນວ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ ຢູ່ສານປະຊາຊົນ ເຂດ II ນວ ໂດຍການຕ້ອນຮັບຂອງ ທ່ານ ສັກກຸນາ ຍະພິຈິດ ປະທານ ສານປະຊາຊົນ ເຂດ II ແລະ ມີພະນັກງານຈໍານວນໜຶ່ງ ເຂົ້າຮ່ວມ.
ໃນການລົງເຮັດວຽກດັ່ງກ່າວໄດ້ຮັບຟັງການລາຍງານ ເຊິ່ງໃນໄລຍະຕົ້ນປີ 2022 ເຖີງປັດຈຸບັນ, ສານປະຊາຊົນ ເຂດ II ໄດ້ຍົກສູງຄຸນນະພາບໃນການດຳເນີນຄະດີຕາມຂະບວນການຍຸຕິທຳຕາມ ມະຕິ 112/ກມສພ ຂອງກົມການເມືອງສູນກາງພັກ ເຊິ່ງໃນໄລຍະ 9 ເດືອນຜ່ານມາ ສາມາດແກ້ໄຂຄະດີໄດ້ທັງໝົດ 270 ເລື່ອງ ໃນຈຳນວນ 358 ເລື່ອງ ເທົ່າກັບ 75%, ໄດ້ເອົາໃຈໃສ່ປັບປຸງກົນໄກການບໍລິຫານຄະດີພາຍໃນ ໂດຍຄະດີທີ່ເຂົ້າມາບໍ່ໃຫ້ມີຫຼາຍຂັ້ນຕອນ ແລະ ແກ່ຍາວເວລາຢູ່ພາຍໃນຫຼາຍ, ສ້າງສິ່ງອຳນວຍຄວາມສະດວກ, ສະພາບແວດລ້ອມທີ່ດີ ເປັນຕົ້ນ: ຫ້ອງຄົ້ນຄວ້າຄະດີ, ຫ້ອງສອບສວນລູກຄວາມ, ຫ້ອງຕັດສິນຄະດີ ໃຫ້ມີຄວາມພ້ອມຕະຫຼອດເວລາ, ໄດ້ເຜີຍແຜ່ວຽກງານຂອງສານປະຊາຊົນ ຕໍ່ການຈັດຕັ້ງທຸກພາກສ່ວນທີ່ກ່ຽວຂ້ອງຢູ່ຂັ້ນກຸ່ມ ແລະ ບ້ານ ຕາມໂຄງການທີ່ເມືອງໄຊທານີ ໄດ້ຮັບຮອງ ໂດຍລົງເຄື່ອນໄຫວເນັນ 4 ຈຸດປະສົງໃຫຍ່ ຄື: 1) ເຜີຍແຜ່ທີ່ຕັ້ງ, ພາລະບົດບາດ, ສິດ, ໜ້າທີ່ຂອງສານປະຊາຊົນ ແລະ ສານປະຊາຊົນເຂດ, 2) ຍົກບັນດາຄະດີຄວາມທີ່ມັກເກີດຂຶ້ນ ເຊັ່ນ: ທີ່ດິນ, ໜີ້ສິນ, ຢ່າຮ້າງ, ລັກຊັບ, ຊິງຊັບ, ປຸ້ນ, ອຸປະຕິເຫດ ແລະ ບັນຫາຢາເສບຕິດ; 3) ແລກປ່ຽນສົນທະນາວິທີແກ້ໄຂບັນຫາຕ່າງໆ; 4) ສັງລວມບັນຫາ, ກຳນົດຈຸດການມີສ່ວນຮ່ວມ ແລະ ຂອດການປະສານງານກັນ ເຊິ່ງໄດ້ສຳເລັດແລ້ວ 6 ກຸ່ມ ແລະ 53 ບ້ານ.
ໃນໂອກາດດັ່ງກ່າວ ບັນດາທ່ານຜູ້ເຂົ້າຮ່ວມ ກໍໄດ້ມີຄຳເຫັນແລກປ່ຽນເຊິ່ງກັນ ແລະ ກັນ ເພື່ອຊອກຫາວິທີແກ້ໄຂບັນດາຂໍ້ຄົງຄ້າງໃນການປະຕິບັດວຽກງານຂອງສານປະຊາຊົນເຂດ II ໃນໄລຍະຜ່ານມາ ແລະ ໃນຕອນທ້າຍ ທ່ານ ອານຸພາບ ຕຸນາລົມ ປະທານ ສະພາປະຊາຊົນ ນວ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະນຳຂອງສານປະຊາຊົນເຂດ II ທີ່ໄດ້ຕັ້ງໜ້າປະຕິບັດໜ້າທີ່ດ້ວຍຄວາມຮັບຜິດຊອບສູງ ແລະ ເນັ້ນໃຫ້ສານປະຊາຊົນເຂດ II ເອົາໃຈໃສ່ປະຕິບັດບັນດາຄາດໝາຍ ແລະ ທິດທາງໃນຕໍ່ໜ້າທີ່ກຳນົດໄວ້ໃຫ້ໄດ້ຮັບຜົນສຳເລັດຕາມແຜນການທີ່ວາງໄວ້. ( ນາງ ໂຮງທ່າວ ຊົງເຢີ )
