(ສພຊ) ລະຫວ່າງວັນທີ 22-23 ຕຸລາ 2020 ທີ່ຫ້ອງປະຊຸມຫ້ອງວ່າການປົກຄອງແຂວງໄຊສົມບູນ ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ (ສພຊ) ໄດ້ເຂົ້າຮ່ວມກອງປະຊຸມໃຫຍ່ຜູ້ແທນອົງຄະນະພັກແຂວງໄຊສົມບູນ ຄັ້ງທີ I ໂດຍການເປັນປະທານຂອງສະຫາຍ ພົນຕີ ຄໍາລຽງ ອຸທະໄກສອນ ເລຂາພັກແຂວງ ເຈົ້າແຂວງໄຊສົມບູນ, ມີບັນດາສະຫາຍຈາກຄະນະຈັດຕັ້ງສູນກາງພັກ, ຄະນະກວດກາສູນກາງ, ຫ້ອງວ່າການສູນກາງພັກ, ຄະນະພັກກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ຄະນະຮັບຜິດຊອບພັດທະນາເຂດຈຸດສຸມໃຈກາງກອງພົນທີ 1 ກອງພັນໃຫຍ່ 101 ແລະ ກອງພັນໃຫຍ່ 584, ອະດີດການນຳ, ພະນັກງານປະຕິວັດອາວຸໂສ, ນັກວິລະຊົນແຫ່ງຊາດ, ນັກຮົບແຂ່ງຂັນ, ຜູ້ຊົງຄຸນວຸດທິ, ແຂກຖືກເຊີນ, ຜູ້ແທນສົມບູນທີ່ເປັນຕົວແທນໃຫ້ແກ່ສະມາຊິກພັກເຂົ້າຮ່ວມ.

ໃນພິທີເປີດ ສະຫາຍພົນຕີ ຄໍາລຽງ ອຸທະໄກສອນ ໄດ້ກ່າວວ່າ: ກອງປະຊຸມໃຫຍ່ຄັ້ງນີ້ ຈະໄດ້ພ້ອມກັນຕີລາຄາກ່ຽວກັບຜົນສໍາເລັດການຈັດຕັ້ງປະຕິບັດແນວທາງຂອງພັກ, ມະຕິກອງປະຊຸມຕົວແທນສະມາຊິກພັກຂອງແຂວງ  ໃນໄລຍະ 5 ປີຜ່ານມາ, ຍົກໃຫ້ເຫັນຈຸດດີຜົນສໍາເລັດ, ຈຸດອ່ອນ-ຄົງຄ້າງ, ສາເຫດທີ່ພາໃຫ້ມີຈຸດອ່ອນ ແລະ  ບາງບົດຮຽນທີ່ຖອດຖອນໄດ້ ແລະ ຈະໄດ້ພ້ອມກັນຄົ້ນຄວ້າ, ຕົກລົງເປັນເອກະພາບຮັບຮອງເອົາທິດທາງແຜນການໃນ 5 ປີຕໍ່ໜ້າ (2021-2025)  ນອກຈາກນີ້ ກອງປະຊຸມໃຫຍ່ ຈະໄດ້ດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກຊຸດໃໝ່ ເພື່ອສືບຕໍ່ຊີ້ນໍາ-ນໍາພາວຽກງານຮອບດ້ານຕາມແນວທາງນະໂຍບາຍຂອງພັກ; ປ່ອນບັດຄັດເລືອກເອົາຜູ້ແທນສົມບູນ, ສໍາຮອງ ໄປຮ່ວມກອງປະຊຸມໃຫຍ່ ຄັ້ງທີ XI ຂອງພັກ ທີ່ຈະໄຂຂຶ້ນໃນຕໍ່ໜ້າ ແລະ ຮັບຟັງການໂອ້ລົມຂອງສະຫາຍ ນາງ ປານີ ຢາທໍ່ຕູ້ ເພື່ອເປັນເຂັມຊີ້ທິດເຍືອງທາງໃຫ້ແກ່ຄະນະພັກແຂວງຊຸດໃໝ່, ສະມາຊິກພັກ, ພະນັກງານ, ທະຫານ, ຕໍາຫລວດ ແລະ ປະຊາຊົນບັນດາເຜົ່າ ສືບຕໍ່ຈັດຕັ້ງປະຕິບັດ 2 ໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາແຂວງໄຊສົມບູນໃຫ້ກ້າວຂຶ້ນເທື່ອລະກ້າວ.

ໂອກາດດັ່ງກ່າວ, ສະຫາຍ ນາງ ປານີ ຢາທໍ່ຕູ້ ກໍໄດ້ມີຄໍາເຫັນໂອ້ລົມຕໍ່ກອງປະຊຸມບາງຕອນສໍາຄັນວ່າ: ຄະນະພັກແຕ່ລະຂັ້ນ ຕ້ອງເພີ່ມທະວີການນຳພາຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານໃຫ້ດີກວ່າເກົ່າ ເຮັດໃຫ້ແຂວງໄຊສົມບູນ ມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍດີ; ສຸມໃສ່ຈັດຕັ້ງປະຕິບັດແຜນພັດທະນາເສດຖະກິດ–ສັງຄົມ ທີ່ວາງອອກໃນຊຸມປີຕໍ່ໜ້າ ໃຫ້ບັນລຸຜົນເປັນຈິງ ຖືກກັບທິດທາງແຜນພັດທະນາລວມຂອງປະເທດ ກໍຄືສອດຄ່ອງກັບສະພາບຈຸດພິເສດ, ທ່າແຮງບົ່ມຊ້ອນຂອງແຂວງ, ຜັນຂະຫຍາຍຈັດຕັ້ງປະຕິບັດ ດໍາລັດ 414/ລບ ວ່າດ້ວຍນະໂຍບາຍພັດທະນາເສດຖະກິດແຂວງໄຊສົມບູນ ຕາມ 5 ທ່າແຮງຂອງແຂວງ (ດ້ານກະສິກໍາ, ການທ່ອງທ່ຽວ, ບໍ່ແຮ່, ໄຟຟ້າ, ການເຊື່ອມຈອດ-ເຊື່ອມໂຍງ) ໃຫ້ເຂົ້າສູ່ລວງເລິກ ແລະ ປາກົດຜົນເປັນຈິງ. ໃນນີ້ ໃຫ້ສຸມໃສ່ຊຸກຍູ້, ສົ່ງເສີມການຜະລິດເປັນສິນຄ້າຂອງປະຊາຊົນໃຫ້ຫລາຍຂຶ້ນ; ເອົາໃຈໃສ່ນໍາພາວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ ແລະ ລຶບລ້າງຄວາມທຸກຍາກຂອງປະຊາຊົນໃຫ້ແຂງແຮງກວ່າເກົ່າ ຕິດພັນກັບວຽກງານແຂ່ງຂັນຮັກຊາດ ແລະ ພັດທະນາ ຊຸກຍູ້ວຽກງານ 3 ສ້າງ ໂດຍສະເພາະແມ່ນປັບປຸງບູລະນະລະບົບການເມືອງຢູ່ຮາກຖານບ້ານ ໃຫ້ໜັກແໜ້ນ, ເຂັ້ມແຂງ ສາມາດເຄື່ອນໄຫວປະຕິບັດພາລະບົດບາດຂອງບ້ານໃຫ້ດີກວ່າເກົ່າ; ພ້ອມກັບການພັດທະນາເສດຖະກິດ-ສັງຄົມຂອງບ້ານ ແນໃສ່ແກ້ໄຂຄອບຄົວທຸກຍາກຢູ່ແຕ່ລະບ້ານ ໃຫ້ຫລຸດນ້ອຍຖອຍລົງເທື່ອລະກ້າວ; ສືບຕໍ່ເອົາໃຈໃສ່ພັດທະນາຊັບພະຍາກອນມະນຸດ ທາງດ້ານປະລິມານ ແລະ ຄຸນນະພາບ ສົມຄູ່ກັບການພັດທະນາເສດຖະກິດ–ສັງຄົມ ໂດຍສະເພາະແມ່ນການສ້າງຄົນລຸ້ນໜຸ່ມ, ຄົນລຸ້ນໃໝ່ ໃຫ້ມີລະດັບຄວາມຮູ້ຄວາມສາມາດ, ມີຄວາມສີວິໄລທາງດ້ານຈິດໃຈ, ມີແນວຄິດຮັກຊາດ, ຮັກລະບອບໃໝ່, ມີຄຸນສົມບັດສິນທຳປະຕິວັດ; ປົກປັກຮັກສາ ແລະ ເສີມຂະຫຍາຍວັດທະນະທໍາຮີດຄອງປະເພນີອັນດີງາມຂອງເຜົ່າ, ຂອງຊາດ ຕິດພັນກັບການທ່ອງທ່ຽວ ເອົາໃຈໃສ່ຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (SDG) ຂອງຂະແໜງສຶກສາທິການ ແລະ ສາທາລະນະສຸກ ໃຫ້ສໍາເລັດໂດຍພື້ນຖານ, ເປັນຕົ້ນ ການແກ້ໄຂບັນຫາໂຮງຮຽນ-ຫ້ອງຮຽນ, ຄູ-ອາຈານ, ອຸປະກອນການຮຽນ-ການສອນບໍ່ພຽງພໍ; ປັບປຸງຍົກລະດັບຄຸນນະພາບການບໍລິການປິ່ນປົວຮັກສາສຸຂະພາບໃຫ້ດີຂຶ້ນກວ່າເກົ່າ; ເອົາໃຈໃສ່ຄົ້ນຄວ້າ, ປະຕິບັດນະໂຍບາຍຕໍ່ຜູ້ທີ່ມີຜົນງານ ແລະ ຄຸນງາມຄວາມດີຕໍ່ປະເທດຊາດຢ່າງເໝາະສົມ; ເພີ່ມທະວີການເຄື່ອນໄຫວຂອງອົງການແນວລາວສ້າງຊາດ ແລະ ອົງການພາຄີ ຕາມພາລະບົດບາດ, ສິດ ແລະ ໜ້າທີ່ຂອງຕົນໃຫ້ແຂງແຮງກວ່າເກົ່າ ໂດຍສະເພາະການສຶກສາອົບຮົມ, ປຸກລະດົມເຕົ້າໂຮມຄວາມສາມັກຄີປອງດອງຂອງປະຊາຊົນບັນດາເຜົ່າ, ຊັ້ນຄົນ, ສາສະໜາ ໃຫ້ເປັນປຶກແຜ່ນແໜ້ນໜາ ພາຍໃຕ້ການນໍາພາຂອງພັກ, ເສີມຂະຫຍາຍມູນເຊື້ອຮັກຊາດ, ມູນເຊື້ອດຸໝັ່ນ, ພິລະອາດຫານ ຂອງປະຊາຊົນບັນດາເຜົ່າ ເພື່ອສ້າງກໍາລັງແຮງສັງລວມຂອງມະຫາຊົນ ເຂົ້າຮ່ວມໃນການປົກປັກຮັກສາ ແລະ ສ້າງສາພັດທະນາແຂວງໄຊສົມບູນ ໃຫ້ກ້າວຂຶ້ນດ້ວຍບາດກ້າວທີ່ໜັກແໜ້ນ; ເພີ່ມທະວີນໍາພາວຽກງານກໍ່ສ້າງພັກ–ກໍ່ສ້າງພະນັກງານໃຫ້ເລິກເຊິ່ງກວ່າເກົ່າ ໂດຍສຸມໃສ່ປັບປຸງກໍ່ສ້າງພັກ ໃຫ້ປອດໃສ, ເຂັ້ມແຂງ, ໜັກແໜ້ນ ທາງດ້ານການເມືອງ–ແນວຄິດ, ການຈັດຕັ້ງ ແລະ ແບບແຜນການນໍາພາ, ໃຫ້ສາມາດເປັນແກນນໍາໃນລະບົບການເມືອງຢູ່ແຕ່ລະຂັ້ນ, ຍົກສູງຄຸນທາດການເມືອງ,  ຄຸນສົມບັດສິນທໍາປະຕິວັດ, ຄວາມຈົງຮັກພັກດີ, ຄວາມຮູ້ຄວາມສາມາດ, ເປັນແບບຢ່າງນໍາໜ້າ ຂອງຄະນະພັກແຕ່ລະຂັ້ນ, ສະມາຊິກພັກ, ຄະນະພັກແຕ່ລະຂັ້ນ ສືບຕໍ່ເພີ່ມທະວີຊີ້ນໍາ-ນໍາພາວຽກງານກວດກາ ໃຫ້ແທດເຖິງກວ່າເກົ່າ, ທັງເປັນມາດຕະການ ເພື່ອຈໍາກັດສິ່ງຫຍໍ້ທໍ້ຕ່າງໆ ທີ່ເກີດຂຶ້ນໃນຖັນແຖວກົງຈັກຂອງພັກ–ລັດ, ສະມາຊິກພັກ, ພະນັກງານ-ລັດຖະກອນ ຕາມກົດລະບຽບພັກ ແລະ ກົດໝາຍຂອງລັດ; ຕິດຕາມ, ກວດກາ ບັນດາໂຄງການລົງທຶນຂອງລັດ ແລະ ເອກະຊົນໃຫ້ເຂັ້ມງວດກວ່າເກົ່າ ເພື່ອຮັບປະກັນຄວາມຖືກຕ້ອງ, ແຈ່ມແຈ້ງ, ຍຸຕິທໍາ, ຊອກໃຫ້ເຫັນດ້ານຕັ້ງໜ້າ ເພື່ອເສີມຂະຫຍາຍ ແລະ ດ້ານອ່ອນເພື່ອປັບປຸງແກ້ໄຂ.

ກອງປະຊຸມໃຫຍ່ຜູ້ແທນອົງຄະນະພັກແຂວງໄຊສົມບູນເທື່ອນີ້ ເປັນຄັ້ງທໍາອິດໃນປະຫວັດສາດຂອງແຂວງ, ທັງເປັນເຫດການການເມືອງທີ່ສໍາຄັນຂອງພັກເຮົາ, ເປັນບັ້ນດໍາເນີນຊີວິດການເມືອງທີ່ສໍາຄັນຍິ່ງ ໃນການປັບປຸງ, ປົວແປງພາຍໃນພັກໃຫ້ມີການຫັນປ່ຽນໃໝ່ທີ່ຕັ້ງໜ້າ ແລະ ດີຂຶ້ນກວ່າເກົ່າ ວາລະດໍາເນີນກອງປະຊຸມ ຕີລາຄາໄດ້ວ່າມີບັນຍາກາດດີພໍສົມຄວນ ແລະ ກໍສໍາເລັດລົງຕາມຄາດໝາຍທີ່ວາງໄວ້ ສະເໜີໃຫ້ສືບຕໍ່ເພີ່ມຄວາມຮັບຜິດຊອບສູງຂຶ້ນກວ່າເກົ່າ ເພື່ອແບກຫາບພາລະໜ້າທີ່ອັນໜັກໜ່ວງ ໃນການຈັດຕັ້ງປະຕິບັດບັນດາທິດທາງ, ຄາດໝາຍ, ແຜນການແຕ່ລະດ້ານໃນຊຸມປີຕໍ່ໜ້າ ເຊິ່ງໄດ້ກໍານົດໄວ້ຢູ່ໃນມະຕິກອງປະຊຸມໃຫຍ່ຄັ້ງນີ້ ສະນັ້ນ ເພື່ອເຮັດໃຫ້ເນື້ອໃນ ແລະ ມະຕິກອງປະຊຸມເທື່ອນີ້ ບັນລຸຕາມຄາດໝາຍທີ່ວາງໄວ້  ພາຍຫລັງສໍາເລັດກອງປະຊຸມ ໃຫ້ຄະນະພັກແຕ່ລະຂັ້ນ ຮີບຮ້ອນເລີ່ມແຕ່ຫົວທີນໍາເອົາເນື້ອໃນຈິດໃຈມະຕິກອງປະຊຸມຄັ້ງນີ້ ໄປຈັດຕັ້ງເຜີຍແຜ່ເຊື່ອມຊຶມ ແກ່ສະມາຊິກພັກ, ພະນັກງານ, ທະຫານ, ຕໍາຫລວດ, ປະຊາຊົນບັນດາເຜົ່າ ໃຫ້ທົ່ວເຖິງ ແລະ ເລິກເຊິ່ງ ເພື່ອສ້າງຄວາມຮັບຮູ້, ເຂົ້າໃຈ ແລະ ມີຄວາມເປັນເອກະພາບສູງ, ພ້ອມທັງເປັນເຈົ້າການຜັນຂະຫຍາຍຈັດຕັ້ງປະຕິບັດໃຫ້ປາກົດຜົນເປັນຈິງ  ສະຫາຍຍັງຮຽກຮ້ອງໃຫ້ຄະນະພັກແຂວງຊຸດໃໝ່, ຜູ້ແທນກອງປະຊຸມ ຕະຫລອດຮອດທຸກພາກສ່ວນໃນທົ່ວແຂວງ ຈົ່ງເຊີດຊູຄວາມສາມັກຄີເປັນປຶກແຜ່ນ, ຄວາມຮັບຜິດຊອບຕໍ່ໜ້າທີ່ການເມືອງ, ສຸມທຸກສະຕິປັນຍາ, ເຫື່ອແຮງ ເຂົ້າໃນການປົກປັກຮັກສາ ແລະ ພັດທະນາແຂວງໄຊສົມບູນ ໃຫ້ກ້າວຂຶ້ນຢ່າງໜັກແໜ້ນ.

ແຫຼ່ງຂ່າວທີ່ມາ: ສະພາແຫ່ງຊາດ