(ສພຊ) ວັນທີ 7 ມັງກອນ 2020, ທີ່ສະພາແຫ່ງຊາດ (ສພຊ) ນະຄອນຫລວງວຽງຈັນ, ສະຫາຍ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກປະຊາຊົນປະຕິວັດລາວ, ປະທານ ສພຊ ໄດ້ຕ້ອນຮັບສະຫາຍ ເລ ມິງ ຈີ ກຳມະການສູນກາງພັກກອມມູນິດຫວຽດນາມ, ຫົວໜ້າອົງການໄອຍະການປະຊາຊົນສູງສຸດ ແຫ່ງ ສສ.ຫວຽດນາມ ເນື່ອງໃນໂອກາດເດີນທາງມາຢ້ຽມຢາມ ສປປລາວ ເພື່ອເຂົ້າຮ່ວມສະເຫລີມສະຫລອງວັນສ້າງ ຕັ້ງອົງການໄອຍະການປະຊາຊົນ ຄົບຮອບ 30 ປີ ໃນລະຫວ່າງວັນທີ 7-9 ມັງກອນ 2020.

ສະຫາຍ ນາງ ປານີ ຢາທໍ່ຕູ້ ຕາງໜ້າໃຫ້ສະພາແຫ່ງຊາດລາວ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ຕໍ່ສະຫາຍ ເລ ມິງ ຈີ ພ້ອມດ້ວຍຄະນະຜູ້ແທນຂັ້ນສູງອົງການໄອຍະການປະຊາຊົນສູງສຸດ ແຫ່ງ ສສ.ຫວຽດນາມ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢ່າງເປັນທາງການຢູ່ນະຄອນຫລວງວຽງຈັນ ສປປລາວ ໃນຄັ້ງນີ້, ເຊິ່ງເປັນການປະກອບສ່ວນເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການ ຮ່ວມມືຮອບດ້ານລະຫວ່າງສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ມີມາແຕ່ດົນແລ້ວນານ ໃຫ້ນັບມື້ເພີ່ມພູນຄູນສ້າງ ແລະ ແຕກດອກອອກຜົນງອກງາມຍິ່ງໆຂຶ້ນ.

ໂອກາດດຽວກັນ ສະຫາຍ ເລ ມິງ ຈີ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຂອງທ່ານປະທານສະພາແຫ່ງຊາດ ແຫ່ງ ສປປລາວ ໃນຄັ້ງນີ້, ພ້ອມທັງແຈ້ງໃຫ້ຊາບກ່ຽວກັບ ຜົນການມາຢ້ຽມຢາມ ແລະ ເຮັດວຽກຢູ່ ສປປລາວ ໃນຄັ້ງນີ້ ເພື່ອເປັນການສືບຕໍ່ຮັດແໜ້ນຄວາມສາມັກພິເສດ ແລະ ການຮ່ວມມື ຮອບດ້ານ ໃຫ້ນັບມື້ມີບາດກ້າວອັນໃໝ່ ໂດຍໄດ້ມີການພົບປະແລກປ່ຽນ ຖອດຖອນບົດຮຽນເຊິ່ງກັນ ແລະ ກັນ ເປັນຕົ້ນຕີລາຄາການຮ່ວມມືໃນໄລຍະຜ່ານມາ ແລະ ວາງທິດທາງການຮ່ວມມືທາງດ້ານວິຊາການໃນຕໍ່ໜ້າ ເພື່ອເປັນຜົນປະໂຫຍດອັນລ້ຳຄ່າ ແລະ ເປັນຮູບປະທຳຂຶ້ນເປັນກ້າວໆ.