ວັນທີ 19 ກໍລະກົດ 2022 ທີ່ຫ້ອງວ່າການແຂວງເຊກອງ, ທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ (ສພຂ) ເຊກອງ ໄດ້ຕ້ອນຮັບການເຂົ້າຢ້ຽມຂໍານັບຂອງທ່ານ ຫງວຽນ ນາມ ຕ໋ຽນ ຄະນະປະຈໍາພັກແຂວງ, ປະທານແນວໂຮມແຫ່ງຊາດຫວຽດນາມ ແຂວງເທື່ອທຽນເຫວ້ ສສ ຫວຽດນາມ ພ້ອມຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກກັບຄະນະກໍາມະການແນວລາວສ້າງຊາດແຂວງເຊກອງ ລະຫວ່າງວັນທີ 18-19 ກໍລະກົດ 2022.          ໂອກາດນີ້, ທ່ານ ດົງເພັດ ພະຍົນ ໄດ້ກ່າວສະແດງຄວາມຕ້ອນຮັບ ແລະ ຕີລາຄາສູງຕໍ່ການມາເຄື່ອນໄຫວຢ້ຽມຢາມ ແລະ ເຮັດວຽກຂອງຄະນະຜູ້ແທນແນວໂຮມແຫ່ງຊາດຫວຽດນາມແຂວງເທື່ອທຽນເຫວ້ຄັ້ງນີ້, ໃນທ່າມກາງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມເວົ້າລວມ ກໍຄືແຂວງເຊກອງ ກໍາລັງກະກຽມ ແລະ ສ້າງຂະບວນການຕ່າງໆ ເພື່ອສະເຫຼີມສະຫຼອງ 2 ວັນປະຫວັດ ລາວ-ຫວຽດນາມ ຄື: ວັນເຊັນສົນທິສັນຍາ ແລະ ການຮ່ວມມືຮອບດ້ານ ຄົບຮອບ 45 ປີ (18/7/1977-18/7/2022) ແລະ ວັນສ້າງຕັ້ງສາຍພົວພັນການທູດ ຄົບຮອບ 60 ປີ (5/9/1962-5/9/2022) ໃຫ້ເຕັມໄປດ້ວຍບັນຍາກາດຟົດຟຶ້ນ ແລະ ມີຄວາມໝາຍສໍາຄັນ ເຊິ່ງການມາຢ້ຽມຢາມ ແລະ ເຮັດວຽກຂອງຄະນະນໍາແນວໂຮມແຫ່ງຊາດຫວຽດນາມແຂວງເທື່ອທຽນເຫວ້ຄັ້ງນີ້ ເປັນກິດຈະກໍາໜຶ່ງໃນການສະເຫຼີມສະຫຼອງສອງວັນດັ່ງກ່າວ ທີ່ຄະນະກໍາມະການແນວລາວສ້າງຊາດ ແຂວງເຊກອງ ສປປ ລາວ ແລະ ຄະນະກໍາມະການແນວໂຮມແຫ່ງຊາດຫວຽດນາມແຂວງເທື່ອທຽນເຫວ້ ສສ ຫວຽດນາມ ຈະໄດ້ພ້ອມກັນສະຫຼຸບຕີລາຄາ ແລະ ທົບທວນຄືນການຈັດຕັ້ງປະຕິບັດບົດບັນທຶກຊ່ວຍຈໍາ, ການພົວພັນຮ່ວມມື, ການຊ່ວຍເຫຼືອເຊິ່ງກັນ ແລະ ກັນໃນໄລຍະຜ່ານມາ ແລະ ວາງແຜນການຮ່ວມມືກັນໃນຕໍ່ໜ້າ. ພ້ອມນີ້ທ່ານຮອງເລຂາພັກແຂວງເຊກອງ ຍັງໄດ້ອວຍພອນໃຫ້ປະທານແນວໂຮມແຫ່ງຊາດຫວຽດນາມແຂວງເທື່ອທຽນເຫວ້ ພ້ອມຄະນະ ຈົ່ງປະສົບຜົນສໍາເລັດໃນການມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງເຊກອງໃນຄັ້ງນີ້.

ໃນໂອກາດດຽວກັນ, ທ່ານ ຫງວຽນ ນາມ ຕ໋ຽນ ກໍໄດ້ສະແດງຄວາມຂອບໃຈມາຍັງການນໍາແຂວງເຊກອງ ໂດຍສະເພາະແມ່ນທ່ານຮອງເລຂາພັກແຂວງ ທີ່ໃຫ້ການຕ້ອນຮັບຢ່າງອົບອຸ່ນ. ພ້ອມທັງລາຍງານການມາເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບຄະນະກໍາມະການແນວລາວສ້າງຊາດແຂວງເຊກອງຄັ້ງນີ້ ເພື່ອທົບທວນຄືນການພົວພັນຮ່ວມມື, ການຊ່ວຍເຫຼືອເຊິ່ງກັນ ແລະ ກັນຂອງແນວໂຮມແຫ່ງຊາດຫວຽດນາມແຂວງເທື່ອທຽນເຫວ້ ກັບ ແນວລາວສ້າງຊາດແຂວງເຊກອງໃນໄລຍະຜ່ານມາ ແລະ ວາງແຜນການຮ່ວມມືໃນຕໍ່ໜ້າ ໃຫ້ນັບມື້ເຂົ້າສູ່ລວງເລິກ ແລະ ແໜ້ນແຟ້ນຍິ່ງຂຶ້ນ.

(ຂ່າວ-ພາບ: ສັນຍາ)