(ສພຊ) ຫ້ອງການສຶກສາທິການ ແລະ ກິລາເມືອງວາປີ ຈັດກອງປະຊຸມ ສຳມະນາຄູ ກະກຽມຄວາມພ້ອມໃຫ້ແກ່ການໄຂສົກຮຽນໃໝ່ ປະຈຳປີ 2022, ໃນຄັ້ງວັນທີ 17 ສິງຫາ 2022 ນີ້ ຢູ່ທີ່ສະໂມສອນເມືອງວາປີ ໂດຍການເປັນປະທານກອງປະຊຸມຂອງ ທ່ານ ນາງ ຄຳບາງ ໃສຍະມາ ກຳມະການພັກເມືອງ ຫົວໜ້າຫ້ອງການສຶກສາທິການແລະກິລາເມືອງ ແລະໃຫ້ກຽດເຂົ້າຮ່ວມຂອງທ່ານ ບຸນຍູ້ ຈັນທິລັງສີ ກຳມະການພັກແຂວງ ເລຂາພັກເມືອງ-ເຈົ້າເມືອງວາປີ ແລະ ເຂົ້າຮ່ວມຂອງທ່ານ ນາງ ທອງໃບ ໄຊຍະສານ ປະທານຄະນະກຳມະການວັດທະນະທຳ-ສັງຄົມແລະບັນດາເຜົ່າ (ຄວສຜ) ສະພາປະຊາຊົນແຂວງ, ທ່ານ ນາງ ພູວຽງ ອິນທະສອນ ຮອງຫົວໜ້າພະແນກສຶກສາທິການ ແລະ ກິລາແຂວງ, ມີອຳນວຍການ, ບັນດາທ່ານຄູ-ອາຈານ ໂຮງຮຽນອະນຸບານ, ປະຖົມ-ມັດທະຍົມ ເຂົ້າຮ່ວມທັງໝົດ 460 ກວ່າທ່ານ.
ການສຳມະນາໃນຄັ້ງນີ້ ເພື່ອໃຫ້ຄູ-ອາຈານ ໄດ້ຮັບຮູ້ ແລະ ເຂົ້າໃຈ ສາມາດກຳແໜ້ນຕໍ່ກັບບັນດາບັນຄາດໝາຍ ແລະ ມາດຕະການຕ່າງໆ ທີ່ຈະຕ້ອງໄດ້ສຸມໃສ່ໃຫ້ບັນລຸຕາມແຜນການທີ່ວາງໄວ້ ໃນສົກປີ 2022, ພ້ອມທັງປູກຈິດສຳນຶກໃຫ້ຄູ່-ອາຈານ ມີຈັນຍາບັນ, ຮັກສາວິໄນ ແລະ ຂໍ້ຫ້າມຕ່າງໆ ມີຄວາມຊື່ສັດຕໍ່ໜ້າທີ່ວຽກງານ ຮັບຜິດຊອບ.
ໃນທີ່ປະຊຸມບັນດາຄູ-ອາຈານທີ່ເຂົ້າຮ່ວມໄດ້ຮັບຟັງການລາຍງານ ການຈັດຕັ້ງປະຕິບັດແຜນພັດທະນາຂະແໜງການສຶກສາ ແລະ ກິລາ ປະຈຳສົກຮຽນ 2021-2022, ຮັບຟັງເອກະສານຂໍ້ຕົກລົງ ວ່າດ້ວຍຈັນຍາບັນ, ຂໍ້ຫ້າມ ແລະ ການລົງວິໄນຕໍ່ຄູ ແລະ ບຸກຄະລາກອນ, ພ້ອມນັ້ນກໍ່ຍັງໄດ້ຮັບຟັງການເຜີຍແຜ່ ເອກະສານກ່ຽວກັບ 2 ວາລະແຫ່ງຊາດ ວ່າດ້ວຍການແກ້ໄຂບັນຫາທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ; ໃນໂອກາດດຽວກັນ ທ່ານ ນາງ ທອງໃບ ໄຊຍະສານ ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ສພຂ ໃຫ້ກຽດເຜີຍແຜ່ມະຕິກອງປະຊຸມ ສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດບັນດາຄາດໝາຍຂະແໜງການສຶກສາທິການ ແລະ ກິລາ, ການປັບປຸງຄຸນນະພາບລະບົບການຮຽນ-ການສອນ ທຸກຊັ້ນ ທຸກສາຍ ໃນໄລຍະໃໝ່ ແລະ ການຄຸ້ມຄອງວຽກງານກິລາ-ກາຍຍະກຳ;
ຫຼັງຈາກນັ້ນ, ກໍ່ໄດ້ສົນທະນາແລກປ່ຽນບັນຫາ ແລະ ສິ່ງທ້າທ້າຍ ກັບບັນດາຄູ-ອາຈານ ຢ່າງມີບັນຍາກາດຟົດຟື້ນ ແລະ ເປັນເຈົ້າການ ເຂົ້າໃນ 7 ຫົວຂໍ້ ຄື:
1.ການເຂົ້າຮຽນຂອງນ້ອງນັກຮຽນ ທີ່ຍັງບໍ່ທັນຟົດຟື້ນ ແລະ ການຮຽນ-ການສອນ ຍັງບໍ່ທັນມີຄຸນນະພາບ.
2.ການຕອບສະໜອງຄູ ສຳລັບສາຍອະນຸບານ-ຫ້ອງກຽມບໍ່ພຽງພໍ.
3.ຊຸມຊົນ ສັງຄົມ ບາງບ້ານໃຫ້ການຮ່ວມມືຕໍ່ຂະແໜງການສຶກສາບໍ່ທັນກວ້າງຂວາງ ແລະໜັກແໜ້ນ.
4.ຄວາມເປັນເຈົ້າການຂອງອຳນວຍການ ແລະ ຄູສອນຈຳນວນໜຶ່ງຂາດຄວາມເປັນເຈົ້າການໃນການປະຕິບັດໜ້າທີ່.
5.ການລົງຕິດຕາມ, ຊຸກຍູ້ຂອງຫ້ອງການສຶກສາທິການ ແລະ ກິລາ ຍັງບໍ່ທັນເປັນລະບົບຕໍ່ເນື່ອງ ຍ້ອນງົບປະມານມີຈຳກັດ.
6.ການປະສານງານລະຫວ່າງໂຮງຮຽນກັບຄະນະພັດທະນາການສຶກສາຂັ້ນບ້ານ ແລະ ຊຸມຊົນ ທີ່ຍັງບໍ່ທັນໄດ້ດີເທົ່າທີ່ຄວນ.
7.ມີບາງຄອບຄົວຮອດລະດູການຜະລິດ ເອົາລູກຫລານ ອອກໄປອາໃສ ຢູ່ໄຮ່-ສວນ ເຮັດໃຫ້ລູກຫລານ ຮຽນບໍ່ຄົບຫຼັກສູດ ແລ້ວກໍ່ປະລະການຮຽນ.
ພາບ-ຂ່າວ: ດີລຳພົນ ພົມະຈັນ