(ສພຊ) ວັນທີ 9 ກຸມພາ 2022 ໄດ້ເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ (ສພຊ) ຊຸດທີ IX ແລະ ກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນນະຄອນຫຼວງວຽງຈັນ (ສປນວ) ຊຸດທີ II ຢູ່ທີ່ກະຊວງການຕ່າງປະເທດ ນຳໂດຍທ່ານ ຮສ.ປອ ລິນຄໍາ ດວງສະຫວັນ ກໍາມະການສໍາຮອງສູນກາງພັກ, ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1ນະຄອນຫລວງວຽງຈັນ; ທ່ານ ໄຊຄໍາ ອຸ່ນມີໄຊ  ຮອງປະທານຄະນະກວດກາສູນກາງພັກ, ຮອງປະທານອົງການກວດກາລັດ, ຮອງຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ທັງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງ; ທ່ານ ນາງ ສົມປະເສີດ ສີຫາລາດ ສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສະມາຊິກສະພາປະຊາຊົນນະຄອນຫລວງວຽງຈັນ ຊຸດທີ II, ຮອງປະທານອົງການແນວລາວສ້າງຊາດ ນະຄອນຫລວງ ໂດຍການຕ້ອນຮັບຂອງທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ, ມີບັນດາທ່ານຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າ ພະແນກ ຕະຫລອດຮອດວິຊາການຂອງກະຊວງເຂົ້າຮ່ວມຢ່າງພ້ອມພຽງ.

ໃນການເຄື່ອນໄຫວຄັ້ງນີ້, ໄດ້ຮັບຟັງການລາຍງານສະພາບລວມຂອງກະຊວງການຕ່າງປະເທດໂດຍຫຍໍ້; ຈາກນັ້ນ, ບັນດາທ່ານຜູ້ແທນປະຊາຊົນ ໄດ້ຜັດປ່ຽນກັນເຜີຍແຜ່ຜົນສຳເລັດກອງປະຊຸມຂອງສະພາທັງສອງຂັ້ນ ແລະ ໄດ້ຮັບເອົາຄຳຄິດຄຳເຫັນ ຄຳສະເໜີຂອງພະນັກງານ ເພື່ອນຳໄປສະເໜີພາກສ່ວນກ່ຽວຂ້ອງພິຈາລະນາແກ້ໄຂໃນຕໍ່ຫນ້າ ເປັນຕົ້ນການສະເໜີໃຫ້ມີການຄົ້ນຄວ້າຫາຕະຫຼາດເພື່ອຮອງຮັບສິນຄ້າຫັດຖະກໍາ, ຊຸກຍູ້ສົ່ງເສີມໃຫ້ມີການນໍາໃຊ້ຜະລິດຕະພັນພາຍໃນຂອງລາວໃຫ້ຫລາຍຂຶ້ນ, ການຄຸ້ມຄອງ ແລະ ສົ່ງເສີມການນໍາໃຊ້ເງິນກີບ, ເພີ່ມທະວີການຕິດຕາມກວດກາການຈັດຕັ້ງປະຕິບັດຄໍາຕັດສິນຂອງສານ ແລະ ບັນຫາອື່ນໆອີກຈໍານວນໜຶ່ງ.