(ສພຊ) ວັນທີ 16 ກຸມພາ 2022 ທ່ານ ຮສ.ປອ ລິນຄໍາ ດວງສະຫວັນປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1 ນະຄອນຫລວງວຽງຈັນ ພ້ອມດ້ວຍຄະນະ ໄດ້ສືບຕໍ່ເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ (ສພຊ) ຊຸດທີ IX ແລະ ກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນນະຄອນຫຼວງວຽງຈັນ (ສປນວ) ຊຸດທີ II ຢູ່ທີ່ກະຊວງຖະແຫຼງຂ່າວວັດທະນະທໍາ ແລະ ທ່ອງທ່ຽວ ໂດຍການຕ້ອນຮັບຂອງທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວວັດທະນະທໍາ ແລະ ທ່ອງທ່ຽວ ພ້ອມດ້ວຍພາກສ່ວນທີ່ກ່ຽວຂ້ອງ.

        ໃນການເຄື່ອນໄຫວຄັ້ງນີ້, ໄດ້ຮັບຟັງການລາຍງານສະພາບລວມໂດຍຫຍໍ້ຂອງກະຊວງຖະແຫຼງຂ່າວວັດທະນະທໍາ ແລະ ທ່ອງທ່ຽວ; ຈາກນັ້ນ, ບັນດາທ່ານຜູ້ແທນໄດ້ຜັດປ່ຽນກັນເຜີຍແຜ່ຜົນສຳເລັດກອງປະຊຸມຂອງ ສພຊ, ສປນວ ແລະ ຮັບຟັງຄຳຄິດຄຳເຫັນ, ຄຳສະເໜີ ເປັນຕົ້ນ ສະເໜີໃຫ້ມີການສົ່ງເສີມການທ່ອງທ່ຽວ, ບັນຫາຄວາມຫຍຸ້ງຍາກໃນການຊື້ປີ້ລົດໄຟ, ການຄຸ້ມຄອງເສັ້ນທາງດ່ວນ, ການຈັດຕັ້ງປະຕິບັດວຽກງານ 6 ສ ແລະ ບັນຫາສໍາຄັນອີກຈໍານວນໜຶ່ງ ເຊິ່ງບັນດາຜູ້ແທນຈະໄດ້ນໍາເອົາຄໍາສະເໜີດັ່ງກ່າວໄປສະເໜີຕໍ່ໃຫ້ພາກສ່ວນກ່ຽວຂ້ອງພິຈາລະນາແກ້ໄຂໃນຕໍ່ໜ້າ.