(ສພຊ) ວັນທີ 08 ກຸມພາ 2024 ທີ່ຫ້ອງຮັບແຂກສະພາແຫ່ງຊາດ, ທ່ານ ຮສ. ປອ. ລິນຄໍາ ດວງສະຫວັນ ກຳມະການຄະນະປະຈຳສະພາແຫ່ງຊາດ, ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ໄດ້ຕ້ອນຮັບທ່ານ Gusty Grass ປະທານຄະນະກຳມາທິການດ້ານການຕ່າງປະເທດ ແລະ ເອີຣົບ, ການຊ່ວຍເຫຼືອຕ່າງປະເທດ, ການຄ້າພາຍນອກ ແລະ ພາກພື້ນ ສະພາຜູ້ແທນລາຊະດອນລຸກຊຳບວກ ພ້ອມດ້ວຍຄະນະ ໃນໂອກາດມາຢ້ຽມຢາມ ແລະ ເຮັດວຽກ ຢູ່ ສປປລາວ.

ທ່ານ ຮສ. ປອ. ລິນຄໍາ ດວງສະຫວັນ ໄດ້ສະແດງຄວາມຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ການພົບປະຄັ້ງນີ້ ເຊິ່ງຈະເປັນໂອກາດດີທີ່ຈະໄດ້ປຶກສາຫາລື ແລະ ຊຸກຍູ້ເສີມຂະຫຍາຍສາຍພົວພັນ ແລະ ການຮ່ວມມືລະຫວ່າງສອງປະເທດ ລາວ-ລຸກຊໍາບວກ ກໍຄືສອງອົງການນິຕິບັນຍັດ ທີ່ມີມູນເຊື້ອດີງາມມາແຕ່ດົນນານ ນັບຕັ້ງແຕ່ ສປປລາວ ແລະ ລຸກຊຳບວກ ໄດ້ສ້າງຕັ້ງສາຍພົວພັນການທູດນຳກັນໃນວັນທີ 25 ກັນຍາ 1997 ໃຫ້ໄດ້ຮັບການພັດທະນາ ແລະ ຂະຫຍາຍຕົວຢ່າງຕໍ່ເນື່ອງ. ທ່ານປະທານ ກສຕສ ໄດ້ລາຍງານຫຍໍ້ສະພາບລວມກ່ຽວກັບການພົວພັນຮ່ວມມືລະຫວ່າງສະພາແຫ່ງຊາດລາວ ກັບ ສະພາຜູ້ແທນລາຊະດອນລຸກຊຳບວກ ໄດ້ຮັບການເສີມຂະຫຍາຍດີຂຶ້ນຢ່າງຕໍ່ເນື່ອງ ເຊິ່ງໄລຍະຜ່ານມາໄດ້ມີການ​ແລກປ່ຽນຢ້ຽມຢາມຄະນະ​ຜູ້​ແທນລະດັບສູງຂອງສອງສະພາ, ລະດັບຂັ້ນກຳມາທິການ, ຄະນະເລຂາ ທິການ ແລະ ລະດັບວິຊາການ ລວມທັງມີການ​ແລກປ່ຽນ​ບົດຮຽນ​ ​ແລະ ​ຂໍ້​ມູນ​ຂ່າວສານ,​ ມີການສະໜັບສະໜູນເຊິ່ງກັນ ແລະກັນໃນເວທີພາກພື້ນ ແລະ ສາກົນຢ່າງປົກກະຕິ; ພ້ອມດຽວກັນນັ້ນ, ທ່ານປະທານ ກສຕສ ຖືໂອກາດນີ້ສະ ແດງຄວາມຂອບໃຈຕໍ່ລັດຖະບານ ແລະ ປະຊາຊົນລຸກຊໍາບວກ ທີ່ໄດ້ໃຫ້ການຊ່ວຍເຫຼືອແກ່ ສປປລາວ ເປັນຕົ້ນການຊ່ວຍເຫຼືອເພື່ອການພັດທະນາຊົນນະບົດ, ການພັດທະນາດ້ານສາທາລະນະສຸກ ແລະ ການສຶກສາ ເຊິ່ງເປັນການປະກອບສ່ວນໃນການພັດທະນາເສດຖະກິດ-ສັງຄົມຂອງ ສປປລາວ ໃຫ້ຂະຫຍາຍຕົວເປັນກ້າວໆ.

ທ່ານ Gusty Grass ໄດ້ສະແດງຄວາມຂອບໃຈຕໍ່ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງ ແວດລ້ອມ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ໃຫ້ຄຳໝັ້ນວ່າຈະສືບຕໍ່ຊຸກຍູ້, ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງສອງປະເທດ ກໍຄືສອງອົງການນິຕິບັນຍັດ ທີ່ມີມາແລ້ວນັ້ນ ໃຫ້ສືບຕໍ່ໄດ້ຮັບການເສີມຂະຫຍາຍ ແລະ ເປັນຮູບປະທຳຍິ່ງໆຂຶ້ນໄປ ລວມທັງຈະສືບຕໍ່ຊຸກຍູ້ ແລະ ສົ່ງເສີມໃຫ້ຂະແໜງການທີ່ກ່ຽວຂ້ອງ ຂອງລັດຖະບານສອງປະເທດ ຈັດຕັ້ງປະຕິບັດບັນດາສັນຍາ, ສົນທິສັນຍາ ແລະ ຂໍ້ຕົກລົງຕ່າງໆທີ່ໄດ້ລົງນາມຮ່ວມກັນ ໂດຍສະເພາະຂະແໜງການທີ່ສອງປະເທດມີທ່າແຮງ ເຊັ່ນ: ການພັດທະນາຊົນນະບົດ, ການສຶກສາ, ສາທາລະນະສຸກໃຫ້ໄດ້ຮັບປະສິດທິຜົນສູງເປັນກ້າວໆ.