ທ່ານ ບຸນຕາ ເທບພະວົງ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຊົມເຊີຍຢ່າງສຸດໃຈຕໍ່ທ່ານ ບິລານ ອໍຣັງ ເຊັບ ດູຣານີ ທີ່ມາຮັບໜ້າທີ່ໃໝ່ຢູ່ ສປປລາວ; ສະແດງຄວາມຍ້ອງຍໍ, ຂອບໃຈ ແລະ ຕີລາຄາສູງຕໍ່ການປະກອບ ສ່ວນອັນໃຫຍ່ຫຼວງເຂົ້າໃນການເສີມຂະຫຍາຍການພົວພັນຮ່ວມມືລະຫວ່າງສະພາແຫ່ງຊາດລາວ ເວົ້າລວມ, ເວົ້າສະ ເພາະ ກຳມາທິການວັດທະນະທຳ-ສັງຄົມ ກັບ UNICEF. ດ້ວຍການຮ່ວມມື ແລະ ປະກອບສ່ວນໃນຕະຫຼອດໄລຍະຜ່ານມາ ເຮັດໃຫ້ການເຄື່ອນໄຫວວຽກງານຂອງກຳມາທິການ ມີບັນຍາກາດອັນໃໝ່ທີ່ດີຂຶ້ນ ແລະ ມີຜົນສໍາເລັດໃຫຍ່ຫຼວງກວ່າເກົ່າ ໂດຍສະເພາະການສ້າງ ແລະ ປັບປຸງກົດໝາຍ, ການຕິດຕາມກວດກາ, ການຕົກລົງບັນຫາສໍາຄັນຂອງຊາດ, ການສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ ແລະ ພະນັກງານ-ລັດຖະກອນຂອງກຳມາທິການ ລວມທັງການເຄື່ອນໄຫວວຽກງານຕ່າງປະເທດ; ພິເສດ ໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ IX ກຳມາທິການໄດ້ຮັບສື່ສິ່ງພິມຈໍານວນໜຶ່ງຈາກ UNICEF ເພື່ອແຈກຢາຍໃຫ້ແກ່ສະມາຊິກສະພາແຫ່ງຊາດໄວ້ເປັນຂໍ້ມູນ ເປັນຕົ້ນປຶ້ມບັນທຶກ, ແຜ່ນພັບມະຕິກອງປະຊຸມສະພາແຫ່ງຊາດ ແລະ ປັດຈຸບັນ UNICEF ໄດ້ສະໜັບສະໜູນດ້ານງົບປະມານ ແລະ ວິຊາການ ສ້າງຂະບວນການປຸກລະດົມນັກຮຽນນັກສຶກສາໃນທຸກຊັ້ນທຸກສາຍ ເຂົ້າມາຮຽນໃຫ້ຫຼາຍຂຶ້ນ ໃຫ້ທັງພາກລັດຖະບານ ແລະ ສະພາແຫ່ງຊາດ ພ້ອມກັນຕະລຸມບອນສ້າງຂະບວນການເອົານ້ອງກັບຄືນສູ່ໂຮງຮຽນ.

ທ່ານ ບິລານ ອໍຣັງ ເຊັບ ດູຣານີ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ແລະ ຍິນດີຕໍ່ການຮັບໜ້າທີ່ໃໝ່ຂອງປະທານກຳມາທິການວັດທະນະທຳ-ສັງຄົມ ເຊັ່ນກັນ; ຕີລາຄາສູງຕໍ່ການຮ່ວມມືຂອງ UNICEF ກັບ ສະພາແຫ່ງຊາດລາວ ໃນໄລຍະຜ່ານມາ ພ້ອມທັງໃຫ້ຄຳໝັ້ນສັນຍາວ່າຈະສືບຕໍ່ເອົາໃຈໃສ່ຊີ້ນໍາ-ນໍາພາວຽກງານຂອງ UNICEF ເພື່ອເສີມຂະຫຍາຍການຮ່ວມມື, ໃຫ້ການຊ່ວຍເຫຼືອ ແລະ ປະກອບສ່ວນຕາມຄວາມຮັບຜິດຊອບຂອງຕົນ ເຂົ້າໃນວຽກງານການພົວພັນຮ່ວມມືລະຫວ່າງສອງອົງການໃນຕໍ່ໜ້າ.

(ນາງ ໄຊໂສພາພອນ ມິ່ງມຸງຄຸນ)