(ສພຊ) – ໃນຕອນບ່າຍຂອງວັນທີ 21 ມິຖຸນາ 2024 ທີ່ສະພາແຫ່ງຊາດ, ທ່ານ ນາງ ທຸມມາລີ ວົງພະຈັນ ຄະນະປະຈຳສະພາແຫ່ງຊາດ, ປະທານກໍາມາທິການວັດທະນະທໍາ-ສັງຄົມ (ກວທສ) ໄດ້ຕ້ອນຮັບການເຂົ້າຢ້ຽມຂໍ່ານັບ ອຳລາຂອງທ່ານ ນາງ ດຣ. ເພຍ ເຣເບນໂລ ບຣິດໂຕ (Dr. Pia Rebello Britto) ຜູ້ຕາງໜ້າຈາກອົງການ UNICEF ປະຈໍາ ສປປລາວ.
ທ່ານ ນາງ ທຸມມາລີ ວົງພະຈັນ ໄດ້ກ່າວສະແດງຄວາມຍິນດີຕ້ອນຮັບ ແລະ ສະແດງຄວາມຊົມເຊີຍຢ່າງສຸດໃຈຕໍ່ທ່ານ ນາງ ດຣ. ເພຍ ເຣເບນໂລ ບຣິດໂຕ ທີ່ໄດ້ສໍາເລັດພາລະໜ້າທີ່ຢູ່ ສປປລາວ ພ້ອມທັງຕີລາຄາສູງຕໍ່ການພົບປະໃນຄັ້ງນີ້ ເຊິ່ງເປັນການປະກອບສ່ວນເສີມຂະຫຍາຍສາຍພົວພັນຮ່ວມມືລະຫວ່າງສະພາແຫ່ງຊາດ ເວົ້າລວມ, ເວົ້າສະເພາະ ກໍາມາທິການວັດທະນະທໍາ-ສັງຄົມ ກັບ ອົງການ UNICEF ໃຫ້ເປັນຮູບປະທໍາຍິ່ງໆຂຶ້ນ; ສະແດງຄວາມຊົມເຊີຍ, ຂອບໃຈ ແລະ ຕີລາຄາສູງຕໍ່ການປະກອບສ່ວນອັນໃຫຍ່ຫຼວງຂອງທ່ານ ນາງ ດຣ. ເພຍ ເຣເບນໂລ ບຣິດໂຕ ໃນການເສີມຂະຫຍາຍສາຍພົວພັນຮ່ວມມືລະຫວ່າງ ສປປລາວ ເວົ້າລວມ, ເວົ້າສະເພາະ ສະພາແຫ່ງຊາດ ກັບ ອົງການ UNICEF ຕະຫຼອດໄລຍະຜ່ານມາ ໂດຍສະເພາະແມ່ນການເຄື່ອນໄຫວວຽກງານຂອງສະພາແຫ່ງຊາດ ກໍຄືກໍາມາທິການວັດທະນະທໍາ-ສັງຄົມ ໄດ້ມີບັນຍາກາດອັນໃໝ່ທີ່ດີຂຶ້ນ ແລະ ມີຜົນສໍາເລັດໃຫຍ່ຫຼວງກວ່າເກົ່າ ໂດຍສະເພາະແມ່ນດ້ານການສ້າງ ແລະ ປັບປຸງນິຕິກໍາ, ດ້ານການຕິດຕາມກວດກາ, ດ້ານການຕົກລົງບັນຫາສໍາຄັນຂອງຊາດ, ດ້ານການສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ ແລະ ພະນັກງານ-ລັດຖະກອນຂອງກໍາມາທິການວັດທະນະທໍາ-ສັງຄົມ ລວມທັງການເຄື່ອນໄຫວວຽກງານຕ່າງປະເທດ ເຊິ່ງຜົນງານດັ່ງກ່າວ ຄະນະປະຈໍາສະພາແຫ່ງຊາດ, ກໍາມາທິການວັດທະນະທໍາ-ສັງຄົມ ໄດ້ຕີລາຄາສູງ, ຍ້ອງຍໍຊົມເຊີຍ ແລະ ຫວັງຢ່າງຍິ່ງວ່າຈະສືບຕໍ່ໃຫ້ການຮ່ວມມືຊ່ວຍເຫຼືອ ແລະ ປະກອບສ່ວນຕາມຄວາມຮັບຜິດຊອບຂອງທ່ານ ນາງ ດຣ. ເພຍ ເຣເບນໂລ ບຣິດໂຕ ເຂົ້າໃນການຊ່ວຍສະໜັບສະໜູນການພົວພັນຮ່ວມມືລະຫວ່າງສອງອົງການໃນຕໍ່ໜ້າ.
ໂອກາດດັ່ງກ່າວ, ທ່ານ ນາງ ດຣ. ເພຍ ເຣເບນໂລ ບຣິດໂຕ ກໍໄດ້ກ່າວສະແດງຄວາມຂອບໃຈເປັນຢ່າງສູງຕໍ່ທ່ານ ນາງ ທຸມມາລີ ວົງພະຈັນ ທີ່ໃຫ້ການຕ້ອນຮັບຢ່າງອົບອຸ່ນ ພ້ອມທັງໄດ້ມອບປຶ້ມບັນທຶກຈໍານວນ 450 ຫົວ ແລະ ພິມແຜ່ນພັບມະຕິ (ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດຍຸດທະສາດປົກປ້ອງສັງຄົມແຫ່ງຊາດ ໄລຍະປີ 2020-2023 ສະບັບເລກທີ 97/ສພຊ, ລົງວັນທີ 18 ກໍລະກົດ 2023 ແລະ ມະຕິຕົກລົງຂອງລັດຖະບານ ວ່າດ້ວຍນະໂຍບາຍ ແລະ ມາດຕະການແກ້ໄຂບັນຫາການຂາດແຄນຄູສອນ, ການປະລະການຮຽນ ແລະ ການສົ່ງເສີມເຂົ້າຮຽນວິຊາຊີບ ສະບັບເລກທີ 09/ລບ, ລົງວັນທີ 17 ກໍ ລະກົດ 2023) ຈໍານວນມະຕິລະ 500 ຫົວ ທີ່ອົງການ UNICEF ປະຈໍາ ສປປລາວ ໄດ້ສະໜັບສະໜູນການອອກແບບ ແລະ ຈັດພິມ ເນື່ອງໃນໂອກາດການສະເຫຼີມສະຫຼອງຄົບຮອບ 50 ປີ ແຫ່ງການຮ່ວມມືລະຫວ່າງລັດຖະບານ ແຫ່ງ ສປປລາວ ກັບ ອົງການ UNICEF ເພື່ອມອບໃຫ້ແກ່ສະມາຊິກສະພາໃນຂອບເຂດທົ່ວປະເທດ; ພ້ອມດຽວກັນນັ້ນ, ທ່ານ ນາງ ທຸມມາລີ ວົງພະຈັນ ກໍໄດ້ມອບໃບຍ້ອງຍໍຂອງຄະນະປະຈໍາສະພາແຫ່ງຊາດ ໃຫ້ແກ່ທ່ານ ນາງ ດຣ. ເພຍ ເຣເບນໂລ ບຣິດໂຕ ທີ່ໄດ້ປະກອບສ່ວນອັນໃຫຍ່ຫຼວງເຂົ້າໃນການເສີມສ້າງສາຍພົວພັນມິດຕະພາບ ແລະ ການຮ່ວມມືລະຫວ່າງ ສປປລາວ ກັບ ອົງການ UNICEF ໃຫ້ໄດ້ຮັບການພັດທະນາຍິ່ງໆຂຶ້ນ ເວົ້າລວມ, ເວົ້າສະເພາະລະ ຫວ່າງອົງການນິຕິບັນຍັດກັບອົງການຈັດຕັ້ງສາກົນ.
(ຂ່າວ-ພາບ: ສອນສັກ ວັນວິໄຊ)