(ສພຊ) – ເພື່ອເປັນການເສີມຂະຫຍາຍການຮ່ວມມືທາງດ້ານວິຊາການ ໂດຍສະເພາະດ້ານເສດຖະກິດມະຫາພາກ, ຄະນະຜູ້ແທນຂອງອົງການພັດທະນາສາກົນສະຫະ ລັດອາເມລິກາ (The United States Agency for International Development – USAID) ນໍາໂດຍທ່ານ ພອລ ເພລວາ (Paul Pelva) ຮອງຫົວໜ້າຫ້ອງການເສດ ຖະກິດຂອງອົງການພັດທະນາສາກົນສະຫະລັດອາເມລິກາ ປະຈໍານະຄອນຫຼວງວໍຊິງຕັນ ດີຊີ ໄດ້ເຂົ້າຢ້ຽມຂ່ໍານັບ ແລະ ເຮັດວຽກກັບທ່ານ ປອ. ລີເບີ ລີບົວປາວ ປະທານກຳມາທິ ການແຜນການ, ການເງິນ ແລະ ການກວດສອບ (ກຜງສ) ທັງເປັນປະທານຄະນະມິດຕະພາບລັດຖະສະພາລາວ-ອາ ເມລິກາ ເມື່ອວັນທີ 05 ພະຈິກນີ້ ເພື່ອປຶກສາຫາລືກ່ຽວກັບການຮ່ວມມືໃນໄລຍະຜ່ານມາ, ການແນະນຳບົດຮຽນໃນການແກ້ໄຂບັນຫາຄວາມຫຍຸ້ງຍາກດ້ານເສດຖະກິດ-ການເງິນ ແລະ ການຮ່ວມມືໃນຕໍ່ໜ້າ; ທ່ານປະທານ ກຜງສ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຂອບໃຈຕໍ່ການຊ່ວຍເຫຼືອສະພາແຫ່ງຊາດຂອງອົງການຜ່ານຄູ່ຮ່ວມພັດທະນາ ພ້ອມນີ້ຍັງໄດ້ຍົກໃຫ້ເຫັນພາລະບົດບາດຂອງກຳມາທິການ ກໍຄືສະພາແຫ່ງຊາດ ໃນການພິຈາລະນາຮັບຮອງແຜນພັດທະນາເສດຖະກິດ-ສັງຄົມ ແລະ ບັນຫາສຳຄັນຕ່າງໆ ລວມທັງແຈ້ງສະພາບພົ້ນເດັ່ນຂອງການພັດ ທະນາເສດຖະກິດ-ສັງຄົມ ສປປລາວ ໂດຍສັງເຂບ.

ທ່ານ ພອລ ເພລວາ ໄດ້ສະແດງຄວາມຂອບໃຈຕໍ່ການຕ້ອນຮັບ ແລະ ລາຍງານກ່ຽວກັບການຈັດຕັ້ງປະຕິບັດໂຄງການໃນໄລຍະຜ່ານມາ ໂດຍສະເພາະພາລະບົດບາດ ແລະ ການເຄື່ອນໄຫວຂອງອົງການເພື່ອການພັດທະນາສາກົນຂອງສະຫະລັດອາເມລິກາ ເຊິ່ງແມ່ນອົງການຂອງລັດຖະບານອາເມລິກາ ທີ່ໃຫ້ການຊ່ວຍເຫຼືອດ້ານມະນຸດສະທຳ, ການລຶບລ້າງຄວາມທຸກຍາກ, ການສົ່ງເສີມການປົກຄອງແບບປະຊາທິປະໄຕ, ການສ້າງໂອກາດທາງດ້ານເສດຖະກິດ, ການພັດທະນາແບບຍືນຍົງ, ການຊ່ວຍເຫຼືອດ້ານສຶກສາ-ສາທາ ແລະ ອື່ນໆ; ພ້ອມນີ້ ຍັງໄດ້ສະເໜີທິດ ທາງແຜນການຮ່ວມມືໃນຕໍ່ໜ້າໃຫ້ຮັບຊາບ.

ການພົບປະໃນຄັ້ງນີ້ ເປັນສ່ວນໜຶ່ງຂອງການຢ້ຽມ ຢາມ ສປປລາວ ໃນລະຫວ່າງວັນທີ 4-8 ພະຈິກ 2024 ນອກຈາກສະພາແຫ່ງຊາດແລ້ວ ຍັງໄດ້ພົບປະ ແລະ ເຮັດວຽກກັບບັນດາກະຊວງ, ອົງການ ແລະ ຂະແໜງການຕ່າງໆ ຂອງ ສປປລາວ ເຊິ່ງເປັນການປະກອບສ່ວນເສີມສ້າງສາຍພົວພັນ ແລະ ການຮ່ວມມືທີ່ດີນຳກັນລະຫວ່າງ ລາວ ແລະ ສະຫະລັດອາເມລິກາ ກໍຄືການພົວພັນຮ່ວມມືລະ ຫວ່າງສອງອົງການນິຕິບັນຍັດ ລາວ-ອາເມລິກາ ໃຫ້ເປັນຮູບປະທຳຫຼາຍຂຶ້ນ.

ທ່ານ ປອ. ລີເບີ ລີບົວປາວ ໄດ້ສະແດງຄວາມຂອບໃຈ ແລະ ອວຍພອນໃຫ້ຄະນະຈົ່ງປະສົບຜົນສຳເລັັດໃນການເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປລາວ ພ້ອມທັງສະເໜີໃຫ້ສືບຕໍ່ໃຫ້ການຊ່ວຍເຫຼືອແກ່ ສປປລາວ ແລະ ໃຫ້ຄຳໝັ້ນສັນຍາວ່າ ຈະນຳໃຊ້ການຊ່ວຍເຫຼືອເຂົ້າໃນການພັດທະນາຢ່າງມີປະສິດທິພາບ ແລະ ປະສິດທິຜົນ.