ຕອນເຊົ້າວັນອັງຄານທີ 22 ມີນາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ, ໄດ້ປະຖະກະຖາມູນເຊື້ອແຫ່ງການນໍາພາຂອງພັກປະຊາຊົນປະຕິວັດລາວຄົບຮອບ 67 ປີ(22/3/ 1955-22/3/2022) ໃຫ້ກຽດປະຖະກະຖາໂດຍສະຫາຍ ຄໍາດີ ວົງລ້ອມ ຮອງເລຂາພັກແຂວງ, ປະທານ ສພຂ, ເຂົ້າຮ່ວມມີສະຫາຍ ທອງຄານ ວັດສະດາກອນ ເລ ຂາໜ່ວຍພັກ ສພຂ, ມີຄະນະໜ່ວຍພັກ, ສະມາຊິກພັກສົມບູນ, ສຳຮອງ ແລະ ມະຫາຊົນ ພາຍໃນ ສພຂ ເຂົ້າຮ່ວມຢ່າງພ້ອມພຽງ.
ການປະຖະກະຖາໃນຄັ້ງນີ້ ໄດ້ຮັບຟັງການກຳເນີດຂອງພັກປະຊາຊົນປະຕິວັດລາວ ເຊິ່ງປະທານໃຫ້ຮູ້ວ່າ: ຢູ່ໃນກອງປະຊຸມໃຫຍ່ຄັ້ງທີ II ຂອງພັກກອມມູນິດອິນດູຈີນ ປີ 1951 ໄດ້ມີມະຕິຕົກລົງໃຫ້ແຕ່ລະປະເທດສ້າງຕັ້ງພັກເອກະ ລາດຂອງຕົນຂຶ້ນ, ບົນພື້ນຖານນັ້ນ ບັນດາສະຫາຍສະມາຊິກພັກກອມມູນິດອິນດູຈີນທີ່ເປັນຄົນລາວກໍໄດ້ຈັດຕັ້ງ”ຄະນະກຳມະການປະຊາຊົນລາວ” ຂຶ້ນເພື່ອສືບຕໍ່ນຳພາການປະຕິວັດຢູ່ລາວ.
ພາຍຫຼັງທີ່ໄດ້ກະກຽມໄດ້ໄລຍະໜຶ່ງ ກໍ່ໄດ້ເປີດກອງປະຊຸມໃຫຍ່ຜູ້ແທນທົ່ວປະເທດສ້າງຕັ້ງພັກປະຕິວັດຂອງຕົນຂຶ້ນ ວັນທີ 22 ມີນາ 1955 ທີ່ບ້ານນາແມວ, ເມືອງວຽງໄຊ, ແຂວງຫົວພັນ ຊຶ່ງເປັນເຂດທີ່ໝັ້ນຂອງການປະຕິວັດໃນເວລານັ້ນ ເຂົ້າ ຮ່ວມກອງປະຊຸມໃຫຍ່ຄັ້ງປະຫວັດສາດມີຜູ້ແທນສົມບູນ 20 ສະຫາຍ ຕາງໜ້າໃຫ້ສະມາຊິກພັກ 400 ສະຫາຍ, ກອງປະຊຸມໃຫຍ່ໄດ້ເປັນເອກະພາບໃສ່ຊື່ວ່າ: “ພັກປະຊາຊົນລາວ” ໂດຍແມ່ນປະທານ ໄກສອນ ພົມວິຫານ ເປັນເລຂາທິການໃຫຍ່ຂອງພັກປະຊາຊົນລາວ ແລະ ພ້ອມດຽວກັນນັ້ນຍັງໄດ້ຮັບຟັງບັນດາເອກະສານສໍາຄັນຕ່າງໆຂອງພັກອີກຈຳນວນໜຶ່ງ.
ຈຸດປະສົງແມ່ນເພື່ອທົບທວນຄືນມູນເຊື້ອ ແລະ ໄຊຊະນະປະຫວັດສາດຂອງພາລະກິດແຫ່ງການຕໍ່ສູ້ປົດປ່ອຍຊາດໃນເມື່ອກ່ອນ ແລະ ຜົນສໍາເລັດໃນພາລະກິດປົກປັກຮັກສາ ແລະ ພັດທະນາປະເທດຊາດ ພາຍໃຕ້ການນໍາພາຂອງພັກເຮົາ ແລະ ມູນເຊື້ອການນໍາພາຂອງອົງຄະນະພັກແຂວງໃນໄລຍະຜ່ານມາ; ເພື່ອເພີ່ມທະວີການສຶກສາອົບຮົມການ ເມືອງແນວຄິດໃຫ້ສະມາຊິກພັກ, ພະນັກງານ-ລັດຖະກອນ, ນັກຮົບ ແລະ ປະຊາຊົນບັນດາເຜົ່າພາຍໃນແຂວງ ໃຫ້ມີນໍ້າໃຈຮັກຊາດ, ສືບທອດມູນເຊື້ອສາມັກຄີປອງດອງປະຊາຊົນບັນດາເຜົ່າ, ນໍ້າໃຈຕໍ່ສູ້ອັນອົງອາດກ້າຫານຂອງກອງທັບ, ປະ ຊາຊົນເຮົາ ແລະ ເພື່ອປຸກລະດົມນ້ໍາໃຈຮັກຊາດ, ຮັກລະບອບໃໝ່, ເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ເຊີດຊູບົດບາດການນໍາພາຂອງພັກ ໄປພ້ອມກັບການປຸກລະດົມຂະບວນການແຂ່ງຂັນ “ ຮັກຊາດ ແລະ ພັດທະນາ ” ໂດຍຕິດພັນກັບການປະກອບສ່ວນຍູ້ແຮງຂະບວນການດ້ານຕ່າງໆ ໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງວາງອອກ.
ພາບ, ຂ່າວ: ແສງພອນ ອິນນະລົງ.