ໃນວັນທີ 14 ພະຈິກ 2023 ນີ້. ທີ່ຫ້ອງປະຊຸມສະພາປະຊາຊົນແຂວງ ໄດ້ມີພິທິປະກາດຮັບຮອງເອົາການຍົກຍ້າຍ ແລະ ແຕ່ງຕັ້ງ ພະນັກງານ-ລັດຖະກອນ ເຂົ້າໃສ່ກົງຈັກການຈັດຕັ້ງ ແລະ ບຸກຄະລາກອນຂອງສະພາປະຊາຊົນແຂວງ, ໂດຍການເຂົ້າຮ່ວມຂອງທ່ານ ແຫວນຄໍາ ປະທຸມມະແສງ ຄະນະປະຈໍາສະພາປະຊາຊົນແຂວງ, ປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ມີບັນດາທ່ານຄະນະປະຈໍາ, ຄະນະກຳມະການ, ຄະນະເລຂາທິການ,ຫົວໜ້າຂະແໜງ-ຮອງຂະແໜງ ແລະ ພະນັກງານວີຊາການພາຍໃນ ສະພາປະຊາຊົນແຂວງ ເຂົ້າຮ່ວມ.
ກອງປະຊຸມ ໄດ້ຜ່ານມະຕິຂອງຄະນະປະຈໍາສະພາປະຊາຊົນແຂວງ ວ່າດ້ວຍການຮັບຮອງເອົາການຍົກຍ້າຍ ແລະ ແຕ່ງຕັ້ງ ພະນັກງານ-ລັດຖະກອນ ເຂົ້າໃສ່ກົງຈັກການຈັດຕັ້ງ ແລະ ບຸກຄະລາກອນຂອງສະພາປະຊາຊົນແຂວງ ເຊິ່ງໃນນັ້ນ ໄດ້ຮັບຮອງເອົາການຍົກຍ້າຍ ແລະ ແຕ່ງຕັ້ງ ທ່ານ ນ. ອາລຸນນີີ ໄຊຍະຈັກ ຮອງຂະແໜງຍຸຕິທໍາ ເປັນຫົວໜ້າຂະແໜງ ປກຊ-ປກສ; ທ່ານ ນ. ພຸດທະວີ ຫຼວງອາໄພ ວີຊາການຂະແໜງຍຸຕິທໍາ ເປັນຮອງຫົວໜ້າຂະແໜງ ປກຊ-ປກສ ແລະ ທ່ານ ນ. ພວງຈັນ ຂຸນພິນິດ ວີຊາການຂະແໜງບໍລິຫານ ແລະ ການເງີນ ເປັນຮອງຫົວໜ້າຂະແໜງຍຸຕິທໍາ.
ໃນໂອກາດນີ້ ທ່ານ ແຫວນຄໍາ ປະທຸມມະແສງ ໄດ້ກ່າວມີຄໍາເຫັນໂອ້ລົມ ຕໍ່ການປະກາດຍົກຍ້າຍແຕ່ງຕັ້ງໜ້າທີ່ໃນຄັ້ງນີ້ແມ່ນເພື່ອຕອບສະໜອງຄວາມຮຽກຮ້ອງຕ້ອງການໃນການຈັດຕັ້ງປະຕິບັດວຽກງານໃນໄລຍະໃຫ່ມ ຮັບປະກັນໃນການເປັນເສນາທິການໃຫ້ແກ່ສະພາປະຊາຊົນແຂວງ ຕາມພາລະບົດບາດຂອງຕົນ ແລະ ຄວາມຮຽກຮ້ອງຕ້ອງການຂອງໜ້າທີ່ການເມືອງຂອງພັກ ເພື່ອຍົກສູງບົດບາດການນໍາພາໃນຂະແໜງການທີ່ຈຳເປັນ ໃຫ້ມີຜົນສໍາເລັດອັນໃໝ່ ພ້ອມນັ້ນ ທ່ານຍັງໄດ້ເນັ້ນໜັກໃຫ້ຜູ້ທີ່ໄດ້ຮັບການແຕ່ງຕັ້ງໜ້າທີ່ໃໝ່ ຄັ້ງນີ້ ຈົ່ງສືບຕໍ່ເພີ່ມທະວີການປະຕິບັດໜ້າທີ່ ທີ່ພັກ-ລັດມອບໝາຍໃຫ້ມີຜົນສໍາເລັດ, ເພີ່ມທະວີຄວາມສາມັກຄີໃນໝູ່ຄະນະໃຫ້ໜັກແໜ້ນ, ແບ່ງວຽກໃຫ້ບຸກຄົນຮັບຜິດຊອບຢ່າງຈະແຈ້ງ ພ້ອມກັນສູ້ຊົນ ນໍາພາ-ຊີ້ນໍາ ວຽກງານໃຫ້ປະສົບຜົນສໍາເລັດ.
ວິນັດ