(ສພຊ) – ກອງປະຊຸມປຶກສາຫາລື ແລະ ປະກອບຄໍາເຫັນໃສ່ຮ່າງມະຕິວ່າດ້ວຍການປະຕິບັດນະໂຍບາຍໃຫ້ແກ່ພະນັກງານ-ລັດຖະກອນພາຍໃນສະພາແຫ່ງຊາດ (ສພຊ) ໄດ້ຈັດຂຶ້ນໃນວັນທີ 18-19 ມັງກອນ 2025 ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ນາງ ອໍາໄພວອນ ລ້ອມບຸນແພງ ກຳມະການສຳຮອງສູນກາງພັກ, ເລຂາທິການສະພາແຫ່ງຊາດ; ມີທ່ານຮອງປະທານກຳມາທິການວຽກງານສະມາຊິກສະພາແຫ່ງຊາດ, ບັນດາທ່ານຮອງເລຂາທິການສະພາແຫ່ງຊາດ, ຄະນະກົມ, ຄະນະພະແນກ ແລະ ລັດຖະກອນວິຊາການ ຈາກພາກສ່ວນທີ່ກ່ຽວຂ້ອງຂອງ ສພຊ ເຂົ້າຮ່ວມ 50 ກວ່າທ່ານ.

ທ່ານ ນາງ ອໍາໄພວອນ ລ້ອມບຸນແພງ ມີຄໍາເຫັນວ່າ: ການປະຕິບັດນະໂຍບາຍໃຫ້ແກ່ພະນັກງານ-ລັດຖະກອນ ເປັນວຽກງານທີ່ມີຄວາມສໍາຄັນ, ລະອຽດອ່ອນ ຕິດພັນເຖິງສິດຜົນປະໂຫຍດຂອງພະນັກງານ-ລັດຖະກອນ ແລະ ຍາດພີ່ນ້ອງ ໂດຍສະເພາະແມ່ນນະໂຍບາຍດ້ານຕ່າງໆ ບໍ່ວ່າຈະເປັນນະໂຍບາຍດ້ານການຍົກລະດັບຄວາມຮູ້, ດ້ານສຸຂະພາບ; ພ້ອມກັນນີ້, ຍັງເປັນນະໂຍບາຍລວມຂອງພັກ-ລັດ ກໍານົດອອກໃນແຕ່ລະໄລຍະ. ຈຸດປະສົງຂອງກອງປະຊຸມຄັ້ງນີ້ ເພື່ອປຶກສາຫາລື ແລະ ປະກອບຄຳເຫັນໃສ່ຮ່າງມະຕິວ່າດ້ວຍການປະຕິບັດນະໂຍບາຍໃຫ້ແກ່ພະນັກງານ-ລັດຖະກອນພາຍໃນສະພາແຫ່ງຊາດ ມີຄວາມຊັດເຈນ, ຄົບຖ້ວນ ແລະ ຮັດກຸມ ເພື່ອນໍາເອົາຜົນຂອງການປະກອບຄໍາເຫັນ ໄປປັບປຸງ ແລະ ຂໍການລົງລາຍເຊັນຈາກຄະນະປະຈຳສະພາແຫ່ງຊາດ.

ບັນດາຜູ້ເຂົ້າຮ່ວມໄດ້ເປັນເຈົ້າການລົງເລິກຄົ້ນຄວ້າ, ປະກອບຄຳຄິດຄຳເຫັນເປັນແຕ່ລະມາດຕາຢ່າງກົງໄປກົງມາ ຕາມຄຳຖາມເຈາະຈີ້ມຂອງປະທານກອງປະຊຸມ ເພື່ອເຮັດໃຫ້ເອກະສານດັ່ງກ່າວມີຄວາມຄົບຖ້ວນ, ສົມບູນທາງດ້ານເນື້ອໃນ, ຖືກຕ້ອງ, ສອດຄ່ອງກັບສະພາບຄວາມເປັນຈິງ ສາມາດເປັນບ່ອນອີງໃນການຈັດຕັ້ງປະຕິບັດນະໂຍບາຍໃຫ້ແກ່ພະນັກງານ-ລັດຖະກອນຂອງສະພາແຫ່ງຊາດ ໃນສະເພາະໜ້າ ແລະ ຍາວນານ.

ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPS) ໂດຍຜ່ານກອງເລຂາຄຸ້ມ ຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບກັບງົບປະມານຂອງຄະນະເລຂາທິການສະພາແຫ່ງຊາດ.

(ສອນສັກ ວັນວິໄຊ)