(ສພຊ) – ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໃນຕອນເຊົ້າວັນທີ 28 ພະຈິກນີ້ ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ; ຫຼັງຈາກຮັບຟັງການລາຍງານຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ກ່ຽວກັບການຈັດຕັ້ງປະຕິບັດແຜນ ການເຄື່ອນໄຫວວຽກງານປະຈຳປີ 2024 ແລະ ແຜນການປີ 2025 ຈາກທ່ານ ປອ. ນາງ ວຽງທອງ ສີພັນດອນ ປະທານສານປະຊາຊົນສູງສຸດ ແລະ ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ຕາມລຳດັບ, ທ່ານ ນາງ ທຸມມາລີ ວົງພະຈັນ ປະທານກຳມາທິການຍຸຕິທຳ ຕາງໜ້າຄະນະປະຈໍາສະພາແຫ່ງຊາດ ໄດ້ປະກອບຄຳເຫັນຕໍ່ສອງບົດລາຍງານດັ່ງກ່າວ ໂດຍສະເໜີບາງມາດຕະການເພີ່ມຕື່ມເພື່ອຮັບປະກັນໃຫ້ທິດທາງແຜນການໄດ້ຮັບການຈັດຕັ້ງປະຕິບັດມີຜົນສຳເລັດຕາມທີ່ໄດ້ກຳນົດໄວ້ ດັ່ງນີ້:

ຕໍ່ກັບສານປະຊາຊົນສູງສຸດ

1. ເພີ່ມທະວີຄວາມຮັບຜິດຊອບນຳພາ-ຊີ້ນຳຂອງສານປະຊາຊົນສູງສຸດ ຕໍ່ສານປະຊາຊົນທ້ອງຖິ່ນ ແລະ ສານທະຫານ ໃນການຜັນຂະຫຍາຍທິດທາງແຜນການປີ 2025 ໃຫ້ເປັນແຜນງານ, ໂຄງການລະອຽດ ເພື່ອຈັດຕັ້ງປະຕິບັດ ລວມທັງການສະຫຼຸບລາຍງານໃຫ້ເປັນປົກກະຕິ ແນໃສ່ບັນລຸຄາດໝາຍທີ່ໄດ້ວາງໄວ້;

2. ເອົາໃຈໃສ່ຄົ້ນຄວ້າ ແລະ ປັບປຸງກົງຈັກການຈັດຕັ້ງຂອງສານປະຊາຊົນແຕ່ລະຂັ້ນ ໃຫ້ເປັນລະບົບຄົບຊຸດ, ສຶກສາອົບຮົມການເມືອງ-ແນວຄິດ, ຈັນຍາບັນ, ຈັນຍາທໍາ ໃຫ້ແກ່ຜູ້ພິພາກສາ, ພະນັກງານ-ລັດຖະກອນ ຂອງສານປະຊາຊົນ ຕິດພັນກັບການບໍາລຸງ, ຍົກລະດັບຄວາມຮູ້ຄວາມສາມາດດ້ານວິຊາສະເພາະ, ທັກສະໃນການຄົ້ນຄວ້າຄະດີ ກໍຄືຄວາມເປັນແບບຢ່າງໃນການເຄົາລົບ ແລະ ປະຕິບັດກົດໝາຍຢ່າງເຂັ້ມງວດ, ຮັບປະກັນໃຫ້ການປະຕິບັດພາລະບົດບາດ, ສິດ ແລະ ໜ້າທີ່ຂອງສານປະຊາຊົນແຕ່ລະຂັ້ນ ມີປະສິດທິພາບ ແລະ ປະສິດທິຜົນ;

3. ຍົກສູງຄຸນນະພາບໃນການດໍາເນີນຄະດີຂອງສານປະຊາຊົນ ເປັນຕົ້ນສານຂັ້ນຕົ້ນ ແລະ ສານຂັ້ນອຸທອນ ໂດຍສຸມໃສ່ຄົ້ນຄວ້າປັບປຸງກົນໄກ, ຮູບການ ແລະ ວິທີການ ໃນການກວດກາຄໍາຕັດສິນ ແລະ ຄໍາພິພາກສາຂອງສານທີ່ມີການລະເມີດກົດໝາຍ, ຄໍາຕັດສິນ ຫຼື ຄໍາພິພາກສາ ທີ່ມີເນື້ອໃນບໍ່ຈະແຈ້ງ ຫຼື ມີເນື້ອໃນຂັດກັນ ເຊິ່ງເປັນສາເຫດເຮັດໃຫ້ການຈັດຕັ້ງປະຕິບັດຄໍາຕັດສິນຂອງສານມີຄວາມຫຍຸ້ງຍາກ ຫຼື ບໍ່ສາມາດຈັດຕັ້ງປະຕິບັດໄດ້ ໃຫ້ມີຜົນສໍາເລັດຢ່າງເປັນຮູບປະທໍາ;

4. ເອົາໃຈໃສ່ສ້າງ ແລະ ປັບປຸງກົນໄກການປະສານສົມທົບລະຫວ່າງສານປະຊາຊົນກັບພາກສ່ວນທີ່ກ່ຽວຂ້ອງ ໃນການແກ້ໄຂຜົນການຕິດຕາມກວດກາຂອງສະພາແຫ່ງຊາດ ໂດຍສະເພາະການແກ້ໄຂຄໍາຮ້ອງທຸກ, ຄໍາຮ້ອງຂໍຄວາມເປັນທໍາຂອງປະຊາຊົນ ທີ່ສະພາແຫ່ງຊາດ ແລະ ສະພາປະຊາຊົນຂັ້ນທ້ອງຖິ່ນ ເຫັນດີໃຫ້ກວດກາ ແລະ ແກ້ໄຂ ໃຫ້ມີຄວາມເຂັ້ມງວດ ແລະ ເດັດຂາດ ຕາມກົດໝາຍກໍານົດໄວ້.

ຕໍ່ກັບອົງການໄອຍະການປະຊາຊົນສູງສຸດ

1. ເອົາໃຈໃສ່ຊີ້ນຳການຜັນຂະຫຍາຍທິດທາງແຜນການປີ 2025 ໃຫ້ເປັນແຜນວຽກລະອຽດ ພ້ອມທັງຊີ້ນໍາ ແລະ ຕິດຕາມຊຸກຍູ້ອົງການໄອຍະການປະຊາຊົນທ້ອງຖິ່ນ ແລະ ອົງການໄອຍະການທະຫານ ໃນການຈັດຕັ້ງປະຕິບັດໃຫ້ສໍາເລັດຕາມຄາດໝາຍທີ່ໄດ້ວາງໄວ້;

2. ເພີ່ມທະວີການປະສານສົມທົບກັບພາກສ່ວນກ່ຽວຂ້ອງ ໃນການປັບປຸງກົງຈັກການຈັດຕັ້ງຂອງອົງການໄອຍະການປະຊາຊົນແຕ່ລະຂັ້ນ, ບໍາລຸງກໍ່ສ້າງພະນັກງານໄອຍະການປະຊາຊົນ ໃຫ້ມີຄຸນທາດການເມືອງ, ຄຸນສົມບັດສິນທຳປະຕິວັດໜັກແໜ້ນ, ມີຈັນຍາບັນ-ຈັນຍາທຳ, ມີຄວາມຮູ້ຄວາມສາມາດດ້ານວິຊາສະເພາະໃຫ້ເປັນມືອາຊີບ;

3. ຍົກສູງຄຸນນະພາບໃນການຄົ້ນຄວ້າພິຈາລະນາແກ້ ໄຂຄະດີ, ການສັ່ງຟ້ອງຜູ້ຖືກຫາຂຶ້ນສານ ແລະ ສານຕັດສິນເອົາຕາມຄໍາຖະແຫຼງຂອງອົງການໄອຍະການປະຊາຊົນ ໃຫ້ບັນລຸຄາດໝາຍ;

4. ສືບຕໍ່ຄົ້ນຄວ້າປັບປຸງກົດໝາຍ ແລະ ນິຕິກຳໃຕ້ກົດໝາຍ ຕາມຂອບເຂດຄວາມຮັບຜິດຊອບຂອງຕົນ ໃຫ້ແທດເໝາະກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່;

5. ສືບຕໍ່ປັບປຸງກົນໄກ ແລະ ວິທີການໃນການຕິດຕາມກວດກາການປະຕິບັດກົດໝາຍຂອງອົງການສືບສວນ-ສອບສວນ, ການສັ່ງຟ້ອງຜູ້ຖືກຫາຂຶ້ນສານ, ການຕິດຕາມກວດກາການປະຕິບັດຄໍາຕັດສິນຂອງສານ ແລະ ການປະຕິບັດກົດໝາຍໃນສະຖານທີ່ກັກຕົວ, ສະຖານທີ່ກັກຂັງ, ສູນດັດສ້າງ, ຄ້າຍດັດສ້າງ ໂດຍສຸມໃສ່ແກ້ໄຂບັນຫາການກັກຂັງຜູ້ຖືກຫາ ແລະ ນັກໂທດ ທີ່ຖືກກັກຂັງເກີນກໍານົດເວລາທີ່ກົດໝາຍກໍານົດໄວ້;

6. ເພີ່ມທະວີການຈັດຕັ້ງປະຕິບັດກົນໄກການປະສານງານຮ່ວມກັບພາກສ່ວນທີ່ກ່ຽວຂ້ອງ ເພື່ອເຮັດໃຫ້ການເຄື່ອນໄຫວວຽກງານຂອງອົງການໄອຍະການປະຊາຊົນ ມີປະສິດທິພາບ, ມີປະສິດທິຜົນ ແນໃສ່ຍົກສູງຄວາມຮັບຜິດຊອບການເມືອງ ຕາມພາລະບົດບາດ, ສິດ ແລະ ໜ້າທີ່ ທີ່ໄດ້ກຳນົດໄວ້ໃນລັດຖະທໍາມະນູນ ແລະ ກົດໝາຍ ໃຫ້ນັບມື້ດີຂຶ້ນ.