ສະຫາຍ ພູທອນ ຫຼວງວິໄລ ໄດ້ລາຍງານສະພາບຂອງໂຮງຮຽນໂດຍຫຍໍ້ວ່າ: ປີ 1998 ຄະນະປະຈຳພັກແຂວງຫຼວງພະບາງ ໄດ້ຕົກລົງສ້າງຕັ້ງສູນເຝິກອົບຮົມການເມືອງແຂວງ ເຊິ່ງການຊີ້ນຳ-ນຳພາແມ່ນຂຶ້ນກັບຄະນະໂຄສະນາ-ອົບ ຮົມແຂວງ, ມີສຳນັກງານທີ່ຕັ້ງຢູ່ບ້ານມ້າ ຫຼື ເຂດນາດູ່ ນະຄອນຫຼວງພະບາງ ເພື່ອເຮັດໜ້າທີ່ຕົ້ນຕໍກ່ຽວກັບການເຝິກອົບ ຮົມທິດສະດີມາກ-ເລນິນ, ແນວທາງຂອງພັກ ລະບົບ 45 ວັນ ໃຫ້ແກ່ພະນັກງານ, ສະມາຊິກພັກ ແລະ ກຳລັງປະກອບອາວຸດ; ມາຮອດວັນທີ 27 ຕຸລາ 2001 ໄດ້ປ່ຽນຊື່ມາເປັນໂຮງຮຽນການເມືອງ ແລະ ການປົກຄອງແຂວງ, ມາຮອດວັນທີ 21 ກໍລະກົດ 2003 ກົມການເມືອງສູນກາງພັກ ໄດ້ອອກມະຕິຕົກລົງວ່າດ້ວຍການໂອນຄວາມຮັບຜິດຊອບການຊີ້ນຳ-ນຳ ພາດ້ານວິຊາການຂອງບັນດາໂຮງຮຽນການເມືອງ-ການປົກຄອງທ້ອງຖິ່ນທົ່ວປະເທດ (ໃນເມື່ອກ່ອນແມ່ນຂຶ້ນກັບການຊີ້ນຳ-ນຳພາຂອງຄະນະໂຄສະນາ-ອົບຮົມສູນກາງພັກ) ໃຫ້ມາຂຶ້ນກັບສະຖາບັນການເມືອງ-ການປົກຄອງແຫ່ງຊາດ ເຊິ່ງໜ້າທີ່ການເມືອງຂອງໂຮງຮຽນການເມືອງ ແລະ ການປົກຄອງແຂວງຫຼວງພະບາງໃນໄລຍະນີ້ ແມ່ນສຸມໃສ່ສ້າງລະບົບບຳລຸງ-ກໍ່ສ້າງພະນັກງານນຳພາ-ຄຸ້ມຄອງທັງລະບົບຊັ້ນກາງ ແລະ ຊັ້ນສູງ ຢ່າງເປັນລະບົບ, ເອົາການຄົ້ນຄວ້າທິດສະດີ ແລະ ສະ ຫຼຸບພຶດຕິກຳ ຕິດພັນກັບການຮຽນ-ການສອນເທື່ອລະກ້າວ. ພາຍໃຕ້ການນໍາພາ-ຊີ້ນຳອັນຖືກຕ້ອງ ແລະ ໃກ້ຊິດຕິດແທດຂອງຄະນະປະຈຳພັກແຂວງ ແລະ ສະຖາບັນການເມືອງ-ການປົກຄອງແຫ່ງຊາດ ບວກໃສ່ການນຳພາໂດຍກົງຂອງກຳມະ ການພັກແຂວງ, ອະດີດຫົວໜ້າໂຮງຮຽນການເມືອງ ແລະ ການປົກຄອງແຂວງ, ປັດຈຸບັນ ພວມດຳເນີນການຮຽນການສອນຫຼັກສູດເຝິກອົບຮົມຄະນະພັກບ້ານ-ນາຍບ້ານ ລະບົບ 10 ວັນ, ຫຼັກສູດຂັ້ນຕົ້ນ 3 ເດືອນ ແລະ ຂັ້ນກາງ 6 ເດືອນ ອັນໄດ້ເຮັດໃຫ້ວຽກງານແຕ່ລະດ້ານ ໄດ້ຮັບການປັບປຸງ ປະກອບສ່ວນສຳຄັນໃຫ້ແກ່ການຍົກລະດັບທິດສະດີການເມືອງ-ການປົກຄອງ ໃຫ້ແກ່ພະນັກງານ-ລັດຖະກອນ, ນາຍທະຫານ-ຕຳຫຼວດ ຢູ່ຂັ້ນແຂວງ, ເມືອງ ແລະ ບ້ານ ຢ່າງມີຄຸນນະ ພາບສູງຂຶ້ນເລື້ອຍໆ ຕາມແຕ່ລະຫຼັກສູດດ້ວຍຫຼາຍຮູບການ, ວິທີການ ແລະ ມີໄລຍະເວລາແຕກຕ່າງກັນ ທັງມີເນື້ອໃນຫຼາຍຮູບຫຼາຍສີ ເໝາະສົມກັບໜ້າທີ່ການເມືອງໃນໄລຍະໃໝ່.

ໂອກາດນີ້, ຄະນະນັກສຶກສາທິດສະດີການເມືອງຂັ້ນຕົ້ນ ຊຸດທີ II ຂອງ ສພຊ ໄດ້ມອບອຸປະກອນກິລາຈຳນວນໜຶ່ງ ແລະ ຮ່ວມແຂ່ງຂັນກິລາບານເຕະຊາຍ, ບານສົ່ງຍິງ ແລະ ເປຕັງ ເພື່ອເປັນການສ້າງຄວາມສາມັກຄີລະຫວ່າງຄູ-ອາຈານ, ນັກສຶກສາທິດສະດີການເມືອງຂັ້ນຕົ້ນຂອງທັງສອງພາກສ່ວນ. ນອກນັ້ນ, ຍັງໄດ້ພົບປະແລກປ່ຽນບົດຮຽນຢູ່ຫ້ອງວ່າການປົກຄອງແຂວງ ພ້ອມທັງຮັບຟັງການລາຍງານໂດຍຫຍໍ້ສະພາບເສດຖະກິດ-ສັງຄົມ, ທ່າແຮງ, ຂໍ້ສະດວກ, ຂໍ້ຫຍຸ້ງຍາກໃນການພັດທະນາແຂວງ; ພົບປະແລກປ່ຽນບົດຮຽນຢູ່ບ້ານເມືອງຂາຍ (ບ້ານ 3 ສ້າງ) ພ້ອມທັງຮັບຟັງການລາຍງານໂດຍຫຍໍ້ສະພາບການດຳລົງຊີວິດຂອງປະຊາຊົນ, ຂໍ້ສະດວກ ແລະ ຂໍ້ຫຍຸ້ງຍາກໃນການເຮັດວຽກງານ 3 ສ້າງ ແລະ ໄດ້ມອບອຸປະກອນກິລາຈຳນວນໜຶ່ງ; ຢ້ຽມຊົມການຜະລິດກະສິກຳບ້ານນາຊາວ ພ້ອມທັງຮັບຟັງການລາຍງານໂດຍຫຍໍ້ສະພາບການຜະລິດກະສິກຳ; ພົບປະແລກປ່ຽນບົດຮຽນຢູ່ວິທະຍາໄລກະສິກຳປາກເຊືອງ ແລະ ໄດ້ມອບອຸປະກອນກິລາຈຳນວນໜຶ່ງ; ພ້ອມນັ້ນ, ຄະນະຍັງໄດ້ຢ້ຽມຢາມສະຖານທີ່ທ່ອງທ່ຽວວັດທະນະທຳຈຳນວນໜຶ່ງຂອງແຂວງອີກດ້ວຍ.

(ຂ່າວ-ພາບ: ກົງທະນູຄໍາ ພິພັດເສລີ)