ເພື່ອເປັນການປະກອບສ່ວນ ໃນການສ້າງສາ ແລະ ພັດທະນາແຂວງຫຼວງພະບາງ ທັງເປັນການຊ່ວຍອໍານວຍຄວາມສະດວກໃນການປະຕິບັດໜ້າທີ່ວຽກງານໃຫ້ແກ່ ສະມາຊິກສະພາປະຊາຊົນແຂວງ ໃນຖານະທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ, ໃນວັນທີ 03–04 ມີນາ 2024 ທີ່ຜ່ານມານີ້, ທ່ານ ອາດສະພັງທອງ ສີພັນດອນ ກໍາມະການສູນກາງພັກ, ເຈົ້າຄອງນະຄອນຫຼວງວຽງຈັນ, ພ້ອມດ້ວຍຄະນະ ໄດ້ເດີນທາງຢ້ຽມຢາມ ແລະ ເຮັດວຽກຢູ່ແຂວງຫຼວງພະບາງ ໃນໂອກາດນີ້ ທ່ານຍັງໄດ້ຕາງໜ້າໃຫ້ ທ່ານ ບຸນຍັງ ວໍລະຈິດ ອາດີດເລຂາທິການໃຫຍ່ ອາດີດປະທານປະເທດແຫ່ງ ສປປ ລາວ ມອບເງິນເບື້ອງຕົ້ນ ຈໍານວນ 1.000.000.000 ກີບ( ໜຶ່ງຕື້ ກີບ )ໃຫ້ ສະພາປະຊາຊົນແຂວງ ນໍາໃຊ້ເຂົ້າໃນການທະລຸ ແລະ ກໍ່ສ້າງເສັ້ນທາງ ແຕ່ບ້ານ ກະຕ່າງສະເລື່ອງ, ເມືອງໂພນໄຊ ຫາ ບ້ານ ປາກແຟນ, ເມືອງ ຊຽງເງິນ ແຂວງຫຼວງພະບາງ, ມອບເງິນປະກອບສ່ວນຊຸກຍູ້ວຽກງານໃຫ້ສະພາປະຊາຊົນແຂວງ ຈໍານວນ 100.000.000ກີບ(ໜຶ່ງຮ້ອຍລ້ານກີບ) ແລະ ມອບ ຜ້າຫົ່ມ ຈໍານວນ 200 ຜືນ ລວມມູນຄ່າ 30.000.000 ກີບ( ສາມສິບລ້ານກີບ ) ໃຫ້ປະຊາຊົນ ບ້ານ ປາກແຟນ ເມືອງຊຽງເງິນ ແຂວງຫຼວງພະບາງ

ໃຫ້ກຽດຮັບໂດຍ ທ່ານ ວົງສະຫວັນ ເທບພະຈັນ ຮອງເລຂາຄະນະບໍລິຫານງານພັກແຂວງ ປະທານສະພາປະຊາຊົນແຂວງ ພ້ອມດ້ວຍຄະນະ, ໃນໂອກາດດັ່ງກ່າວນີ້ ທ່ານຍັງໄດ້ສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງສູງມາຍັງ ທ່ານ ບຸນຍັງ ວໍລະຈິດ ອາດີດເລຂາທິການໃຫຍ່ ອາດີດປະທານປະເທດແຫ່ງ ສປປ ລາວ, ທ່ານ ອາດສະພັງທອງ ສີພັນດອນ ກໍາມະການສູນກາງພັກ, ເຈົ້າຄອງນະຄອນຫຼວງວຽງຈັນ, ພ້ອມດ້ວຍຄະນະ ທີ່ໄດ້ຊຸກຍູ້ຊ່ວຍເຫຼືອ ແຂວງຫຼວງພະບາງ ກໍຄື ສະພາ ແລະ ປະຊາຊົນພາຍໃນແຂວງຫຼວງພະບາງ. ການປະກອບສ່ວນໃນຄັ້ງນີ້, ເປັນການປະກອບສ່ວນທີ່ສໍາຄັນ ແລະ ມີຄຸນຄ່າທີ່ສຸດ ຕໍ່ການພັດທະນາເສດຖະກິດ-ສັງຄົມ ຂອງແຂວງ ແລະ ການດໍາລົງຊີວິດຂອງປະຊາຊົນ.

​​​​​​ຂ່າວ: ນາງ ຄໍາຫຼ້າ ພອນພິລາ

ພາບ: ບຸນລັດ ສີວິໄລ