ໃນລະຫວ່າງວັນທີ 18-20 ທັນວາ 2023 ທີ່ຫ້ອງຮັບແຂກຊັ້ນ 4 ຫ້ອງວ່າການແຂວງ, ທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ໄຊຍະບູລີ ໄດ້ຕ້ອນຮັບ ທ່ານ ສົມມາດ ພົລເສນາ ຮອງປະທານສະພາແຫ່ງຊາດ ພ້ອມຄະນະ.

ຈຸດປະສົງທີ່ມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງ ໄຊຍະບູລີ ເປັນຕົ້ນແມ່ນ: ເຂົ້າຮ່ວມກອງປະຊຸມກັບສະພາປະຊາຊົນແຂວງ ແລະ ບັນດາພະແນກການທີ່ກ່ຽວຂ້ອງຂອງແຂວງ ເພື່ອຮັບຟັງການລາຍງານກ່ຽວກັບ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ການຈັດສັນງົບປະມານໂຄງການລົງທຶນຂອງລັດ, ການຈັດຕັ້ງປະຕິບັດແຜນງົບປະມານແຫ່ງລັດ ແລະ ການແກ້ໄຂໜີ້ສິນຂອງແຂວງ, ສະພາບການອອກໃບຕາດິນ, ການຄຸ້ມຄອງໂຄງການຂຸດຄົ້ນແຮ່ທາດ, ການຄຸ້ມຄອງໂຄງການຕ້ານຕາຝັ່ງເຈື່ອນ, ການສົ່ງເສີມ ແລະ ພັດທະນາໂຮງຮຽນວິຊາຊີບ ແລະ ໂຮງຮຽນມັດທະຍົມສົມບູນຊົນເຜົ່າ, ພ້ອມດຽວກັນກໍ່ໄດ້ລາຍງານຕໍ່ທ່ານເຈົ້າແຂວງກ່ຽວກັບແຜນການເຄື່ອນໄຫວຢູ່ບັນດາເມືອງຂອງແຂວງໄຊຍະບູລີຕື່ມອີກ,

ໂອກາດດັ່ງກ່າວ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ກໍ່ໄດ້ລາຍງານສະພາບການພັດທະນາເສດຖະກິດຂອງແຂວງ ໂດຍສັງເຂບເຊິ່ງທ່ານໄດ້ກ່າວວ່າ: GDP ເຕີບໂຕໃນລະດັບ 5%, ສ້າງມູນຄ່າເພີ່ມໄດ້ 14.693 ຕື້ກີບ, ສະເລ່ຍຕໍ່ຫົວຄົນ ໄດ້ 2.081 ໂດລາສະຫະລັດ ຫຼື ເທົ່າກັບ 35.38 ລ້ານກີບ, ຮອດປະຈຸບັນເກັບລາຍຮັບໄດ້ 1,500 ຕື້ກວ່າກີບ, ເກີນແຜນ 8%, ສິນຄ້າສົ່ງອອກ 80 ລ້ານກວ່າໂດລາສະຫະລັດ, ນໍາເຂົາ 50 ລ້ານກວ່າໂດລາສະຫະລັດ, ການລົງທຶນຕ່າງໆໂດຍລວມແລ້ວແມ່ນໄດ້ຮັບການຈັດຕັ້ງປະຕິບັດຕາມແຜນການ ແລະ ສອດຄ່ອງຕາມລະບຽບກົດໝາຍ, ນອກນີ້ຍັງມີທຶນຂອງສູນກາງທີ່ມາຈັດຕັ້ງປະຕິບັດຢູ່ແຂວງ ແລະ ທຶນຊ່ວຍເຫຼືອລ້າຈໍານວນໜຶ່ງ, ພື້ນຖານໂຄງລ່າງກໍ່ໄດ້ຮັບການພັດທະນາເປັນກ້າວໆ.

ອີກເທື່ອໜື່ງໃນໂອກາດທີ່ທ່ານຮອງປະທານສະພາແຫ່ງຊາດ ພ້ອມດ້ວຍທີມງານ ດ້ວຍສົມທົບກັບບັນດາພະແນກການທີ່ກ່ຽວຂ້ອງລົງຕິດຕາມໂຄງການປ້ອງກັນຕາຝັ່ງເຈື່ອນ ຢູ່ຈຸດບ້ານພວນ, ຈຸດບ້ານຈອມແກ້ວ, ຈຸດບ້ານຄອນຕາປູ, ຈຸດບ້ານຖໍ້າ, ຈຸດກ້ອງຂົວມິດຕະພາບ ແລະ ຈຸດບ້ານເມືອງໝໍ ຢູ່ທີ່ທີ່ເມືອງແກ່ນທ້າວ.

ໂດຍ: ອິນທີ ຂຽວສີຟ້າ