ວັນທີ 19 ກັນຍາ 2022 ນີ້ສະພາປະຊາຊົນແຂວງຮັບຕ້ອນການມາເຄື່ອນໄຫວຢ້ຽມຢາມ ແລະ ມາເຮັດວຽກຢູ່ແຂວງຫົວພັນ ຂອງທ່ານ ສົມມາດ ພົລເສນາ ກໍາມະການສູນກາງພັກ ຮອງປະທານສະພາແຫ່ງຊາດ, ມີບັນດາທ່ານ ຮອງປະທານກຳມາທິການ, ຫົວໜ້າ,ຮອງຫົວໜ້າກົມສະພາແຫ່ງຊາດພ້ອມດ້ວຍວິຊາການໂດຍໃຫ້ການຕ້ອນຮັບ ຂອງທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8, ປະທານ ສະພາປະຊາຊົນແຂວງ ພ້ອມດ້ວຍຄະນະປະຈຳສະພາປະຊາຊົນແຂວງ, ການນຳຂອງແຂວງ,ຫົວໜ້າ, ຮອງຫົວໜ້າພະແນການທີ່ກ້ຽວຂອງແຂວງ.

       ໃນການມາເຄື່ອນໄຫວຢ້ຽມຢາມ ແລະ ເຮັດວຽກຄັ້ງນີ້ ຄະນະທີມງານຍັງໄດ້ຮັບຟັງການລາຍງານໂດຍສັງເຂບກ່ຽວກັບແຜນພັດທະນາເສດຖະກິດ – ສັງຄົມຂອງແຂວງ ຈາກທ່ານ ພອນສຸກ ອິນທະວົງຮອງ ເຈົ້າແຂວງ ແຂວງຫົວພັນ ແລະ ຂະແໜງການສ່ວນທີ່ກ່ຽວຂ້ອງແຂວງເປັນຕົ້ນ ຂົງເຂດຊັບພະຍາກອນທຳມະຊາດ ແລະ ສິ່ງແວດລ້ອມ, ໂຍທາທິການ ແລະ ການຂົນສົ່ງ, ກະສິກຳ ແລະ ປ່າໄມ້, ໂທລະຄົມມະນາຄົມ ແລະ ການສື່ສານ ແລະ ວຽກງານອື່ນໆຈາກນັ້ນບັນດາທ່ານ ຮອງປະທານກຳມາທິການ, ຫົວໜ້າ, ຮອງຫົວໜ້າກົມສະພາແຫ່ງຊາດ ໄດ້ພ້ອມກັນປະກອບຄຳຄິດຄຳເຫັນ ຕໍ່ບົດລາຍງານ ຂອງອົງການປົກຄອງແຂວງ ແລະ ຄຳຖາມເຈາະຈີ້ມ ຂອງຄະນະທ່ານປະທານກອງປະຊຸມ ຢ່າງກົງໄປກົງມາ ເພື່ອເປັນບ່ອນອີງໃນການຈັດຕັ້ງປະຕິບັດ ແລະ ເປັນຂໍ້ມູນໃຫ້ແກ່ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ.

         ໃນໂອກາດນີ້ ທ່ານ ຮອງປະທານສະພາແຫ່ງຊາດ ໄດ້ມີຄຳເຫັນໂອ້ລົມຕໍ່ກອງປະຊຸມ ກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ການນຳພາ-ຊີ້ນຳ ຂອງຄະນະພັກ, ຄະນະນຳ ຂອງແຂວງໃນການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ຂອງແຂວງ ມີຜົນສໍາເລັດຫຼາຍດ້ານ, ແຕ່ມີບາງດ້ານຍັງຈະໄດ້ສືບຕໍ່ ປັບປຸງແກ້ໄຂ ໂດຍສະເພາະ ການຕິດຕາມ ກວດກາ ບາງກິດຈະກຳ ຂອງໂຄງການກໍ່ສ້າງພື້ນຖານໂຄງລ່າງພາຍໃນແຂວງ, ໂຄງການອອກໃບຕາດິນທີ່ຕິດພັນກັບ 3 ປະເພດປ່າ ແລະ ບັນຫາອື່ນໆ ທີ່ຕິດພັນກັບການດຳລົງຊີວິດ ຂອງປະຊາຊົນບັນດາເຜົ່າ, ການໃຫ້ຄວາມຮູ້ດ້ານເຕັກນິກວິຊາການເແກ່ປະຊາຊົນ ໃນການປູກ,ລຽ້ງ ເພື່ອແກ້ໄຂຊີວິດການເປັນຢູ່ ຂອງປະຊາຊົນໃຫ້ນັບມື້ນັບດີຂຶ້ນ. ພ້ອມນັ້ນ ທ່ານພ້ອມດ້ວຍຄະນະທີມງານຍັງໄດ້ລົງຕິດຕາມ ກວດກາຢູ່ພາກສະໜາມຕົວຈິງເຊັ່ນ: ໂຄງການກໍ່ສ້າງໂຮງໝໍແຂວງ,ໂຄງການກໍ່ສ້າງສະໜາມບິນໜອງຄ້າງ ແລະ ການຂຸດຄົ້ນ, ປຸ່ງແຕ່ງ ແລະ ສົ່ງອອກ ແຮ່ເຫຼັກ ຂອງບໍລິສັດລາວເອັສພີຈີຊີເອັມຊີ ບໍ່ແຮ່ ຈຳກັດ ( GIMPEX) ຢູ່ບ້ານ ຕະເອົ່າ ເມືອງຊຳເໜືອ ແລະ ຂົວຂ້າມນ້ຳມ່າ ຈຸດບ້ານ ຊຽງຄູນ ເມືອງແອດ ແຂວງຫົວພັນຕື່ມອີກ.

ຂ່າວໂດຍ: ນັກຂ່າວ ສພຂ ຫົວພັນ