1. ເມືອງພຽງ ເປັນເມືອງທີ່ມີຊາຍແດນຕິດກັບປະເທດໃກ້ຄຽງ, ມີຄວາມຍາວ 90 ກິໂລແມັດ ຊຶ່ງດ້ານໜຶ່ງກໍເປັນເງື່ອນໄຂທີ່ດີໃຫ້ແກ່ການຄ້າຂາຍ, ແລກປ່ຽນສິນຄ້າ. ຄຽງຄູ່ກັນນັ້ນ ວຽກງານປ້ອງກັນຊາດ-ປ້ອງກັນຄວາມສະຫງົບ ກໍຈະຕ້ອງໄດ້ເພີ່ມທະວີຄວາມເອົາໃຈໃສ່ ເພື່ອສະກັດກັ້ນອິດທິກໍາລັງປໍລະປັກ, ຄົນບໍ່ດີ ທີ່ຈະນໍາໃຊ້ເຂດຊາຍແດນດັ່ງກ່າວ ກໍ່ອາດສະຍາກໍາປະເພດຕ່າງໆ ເປັນຕົ້ນ ການຄ້າຂາຍຢາເສບຕິດ, ການຄ້າຂາຍເຖືອນ, ການຄ້າມະນຸດ, ໂຄສະນາຂົນຂວາຍຊັກຈູງປະຊາຊົນເຂົ້າສາສະໜາ ແນໃສ່ແບ່ງແຍກພາຍໃນເຮົາ ແລະ ອື່ນໆ ຊຶ່ງຈະສົ່ງຜົນກະທົບຕໍ່ຄວາມສະຫງົບ, ຄວາມເປັນລະບຽບຮຽບຮ້ອຍຂອງສັງຄົມ, ເປັນຕົ້ນການກໍ່ອາດສະຍາກໍາປະເພດຕ່າງໆ, ສົ່ງຜົນກະທົບຕໍ່ການສ້າງສາພັດທະນາເສດຖະກິດ ຂອງປະເທດເຮົາ. ສະນັ້ນ, ຈຶ່ງສະເໜີໃຫ້ຄະນະພັກ, ອົງການປົກຄອງເມືອງ ເພີ່ມທະວີຄວາມເອົາໃຈໃສ່ ຈັດຕັ້ງຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຂອງພັກ, ນໍາພາວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ໜັກແໜ້ນ, ເຂັ້ມແຂງ, ສາມາດຕອບໂຕ້ ແລະ ແກ້ໄຂອາດສະຍາກໍາປະເພດຕ່າງໆຢ່າງວ່ອງໄວ, ທັນເວລາ ແລະ ເດັດຂາດ; ເອົາໃຈໃສ່ປັບປຸງສອງກໍາລັງໃຫ້ມີຄວາມເຂັ້ມແຂງ, ມີຄວາມຈົງຮັກພັກດີຕໍ່ປະຊາຊົນ, ຕໍ່ລະບອບໃໝ່.

2. ເມືອງພຽງ ມີເນື້ອທີ່ທັງໝົດ 282.600 ເຮັກຕາ, ເນື້ອທີ່ສ່ວນໃຫຍ່ເປັນທົ່ງພຽງ, ດິນມີຄວາມອຸດົມສົມບູນ, ເນື້ອທີ່ປ່າປົກຄຸ້ມມີເຖິງ 74% ຂອງເນື້ອທີ່ທັງໝົດ, ມີປະລິມານນໍ້າຝົນ 1.300 ມມຕໍ່ປີ. ຈາກຄວາມອຸດົມສົມບູນດັ່ງກ່າວ ເຮັດໃຫ້ມີແມ່ນໍ້າຫຼາຍສາຍທີ່ສາມາດສະໜອງນໍ້າໃຫ້ແກ່ການຜະລິດກະສິກໍາ, ການລ້ຽງສັດ; ເປັນເມືອງທີ່ມີທິວທັດທໍາມະຊາດສວຍງາມ, ເໝາະກັບການທ່ອງທ່ຽວຊົມທໍາມະຊາດ ແລະ ທ່ອງທ່ຽວດ້ານວັດທະນະທໍາ, ຈຶ່ງສະເໜີໃຫ້ ຄະນະພັກ, ອົງການປົກຄອງເມືອງ ເອົາໃຈໃສ່ຊຸກຍູ້ສົົ່ງເສີມ ແລະ ສ້າງເງື່ອນໄຂ ໃຫ້ປະຊາຊົນເຮັດການຜະລິດກະສິກໍາ, ການລ້ຽງສັດເປັນສິນຄ້າ ທີ່ມີມາດຕະຖານ, ມີຄຸນນະພາບ ເພື່ອສ້າງເປັນຜະລິດຕະພັນຂອງເມືອງພຽງ, ເປັນຂອງຕ້ອນຂອງຝາກສໍາລັບນັກທ່ອງທ່ຽວ ຊຶ່ງເປັນບ່ອນຮອງຮັບຜົນຜະລິິດຂອງປະຊາຊົນ, ເປັນການສ້າງວຽກເຮັດງານທໍາ, ສ້າງລາຍຮັບທີ່ໝັ້ນຄົງ ໃຫ້ແກ່ປະຊາ ຊົນບັນດາເຜົ່າ. ສະນັ້ນ, ຈຶ່ງສະເໜີໃຫ້ບັນດາສະຫາຍ ນໍາໃຊ້ທ່າແຮງດັ່ງກ່າວ ເຂົ້າໃນການສ້າງສາພັດທະນາເສດຖະກິດ-ສັງຄົມຂອງເມືອງພຽງ ໃຫ້ມີບາດກ້າວຫັນປ່ຽນທີ່ຕັ້ງໜ້າ. ເອົາໃຈໃສ່ຊຸກຍູ້ສົ່ງເສີມວິສາຫະກິດຂະໜາດນ້ອຍ ແລະ ກາງ ດ້ວຍການສ້າງເງື່ອນໄຂໃຫ້ສາມາດ ເຂົ້າເຖິງແຫຼ່ງທຶນ, ເຂົ້າເຖິງຕະຫລາດ ແລະ ການສົ່ງເສີມດ້ານອື່ນໆ ເຮັດໃຫ້ວິສາຫະກິດດັ່ງກ່າວມີຄວາມເຂັ້ມແຂງ ກາຍເປັນຖານລາຍຮັບງົບປະມານຂອງເມືອງ.

3. ເມືອງພຽງ ເປັນເມືອງບໍ່ໃຫຍ່, ພົນລະເມືອງບໍ່ຫຼາຍ (62. 449 ຄົນ), ຖານລາຍຮັບງົບປະມານບໍ່ໃຫຍ່ ແລະ ຖານລາຍຮັບບໍ່ທັນຫຼາຍ, ເຮັດໃຫ້ຕົວເລກງົບປະມານລາຍຮັບຍັງບໍ່ສູງ ແຕ່ມີທ່າແຮງດ້ານການ ທ່ອງທ່ຽວທໍາມະຊາດ, ເນື້ອທີ່ດິນທໍາການຜະລິດກະສິກໍາ ແລະ ທ່າແຮງດ້ານອື່ນໆຈໍານວນໜຶ່ງ ຈຶ່ງສະເໜີໃຫ້ຄະນະພັກ, ອົງການປົກຄອງເມືອງ ເອົາໃຈໃສ່ຄົ້ນຄວ້າວາງແຜນພັດທະນາເສດຖະກິດ-ສັງຄົມຂອງເມືອງຕົນ ໃຫ້ສອດຄ່ອງກັບທ່າແຮງບົ່ມຊ້ອນ, ຄົ້ນຄວ້າຈັດແບ່ງເຂດການຜະລິດ, ການລົງທຶຶນໃຫ້ລະອຽດ ເພື່ອສຸມທຶນຮອນ, ເຕັກນິກ, ວິຊາການ ເຂົ້າໃສ່ການລົງທຶນດັ່ງກ່າວ ໃຫ້ບັນລຸຜົນສໍາເລັດ ລວມທັງການດຶງດູດການລົງທຶນຂອງພາກເອກະຊົນໃຫ້ເພີ່ມຂຶ້ນ.

​​​4. ເອົາໃຈໃສ່ການພັດທະນາຊັບພະຍາກອນມະນຸດ ໃຫ້ສອດຄ່ອງກັບຄວາມຮຽກຮ້ອງຕ້ອງການ ຂອງການສ້າງສາພັດທະນາເສດຖະກິດ ພາຍໃນເມືອງຂອງເຮົາ ເປັນຕົ້ນ ຊຸກຍູ້ສົ່ງເສີມການສ້າງນັກວິຊາການດ້ານການປູກຝັງ-ລ້ຽງສັດ ເພື່ອເຮັດໃຫ້ການຜະລິດກະສິກໍາພາຍໃນເມືອງຂອງເຮົາຂະຫຍາຍຕົວ ແລະ ມີຄວາມເຂັ້ມແຂງ; ສຶກສາອົບຮົມໃຫ້ປະຊາຊົນຮັກສາມູນເຊື້ອ ຄວາມສາມັກຄີປອງດອງ, ນໍ້າໃຈຮັກຊາດ ແລະ ເສຍສະຫລະເພື່ອຜົນປະໂຫຍດສ່ວນລວມ; ສ້າງສະຕິເຄົາລົບກົດໝາຍ, ການປະຕິບັດພັນທະຂອງປະຊາຊົນ; ເພີ່ມທະວີການຝຶກອົບຮົມສີມືແຮງງານ ໃຫ້ມີຄຸນນະພາບ, ປະຊາຊົນມີວຽກເຮັດງານທໍາ, ມີລາຍຮັບ ແລະມີຊີວິດການເປັນຢູ່ທີ່ໝັ້ນຄົງດີຂຶ້ນ.

5. ເມືອງພຽງ ເປັນເມືອງທີ່ມີຊາຍແດນຕິດກັບ ປະເທດໃກ້ຄຽງ, ໃນເງື່ອນໄຂການພັດທະນາເສດຖະ ກິດຂອງເມືອງພຽງ ຍັງບໍ່ທັນເຂັ້ມແຂງນີ້ ຊາວໜຸ່ມທີ່ເປັນລູກຫຼານ ມັກມີແນວຄິດໄປອອກແຮງງານຢູ່ຕ່າງ ປະເທດ ຊຶ່ງມີຄວາມເປັນຫ່ວງ ແລະ ມີຄວາມສ່ຽງຫຼາຍດ້ານ. ສະນັ້ນ, ຈຶ່ງສະເໜີໃຫ້ບັນດາສະຫາຍ ເພີ່ມທະວີຄວາມເອົາໃຈໃສ່ ການສຶກສາອົບຮົມໃຫ້ລູກຫຼານ ເຫັນໄດ້ທ່າແຮງບົ່ມຊ້ອນທາງດ້ານເສດຖະກິດຂອງປະເທດເຮົາ ເປັນຕົ້ນ ເຮົາມີທີ່ດິິນອັນອຸດົມສົມບູນ, ເໝາະກັບການຜະລິດກະສິກໍາເປັນສິນຄ້າ, ເຮົາມີຕະຫຼາດພາຍໃນ ແລະ ຕ່າງປະເທດຮອງຮັບ. ສະນັ້ນ, ລູກຫຼານເຮົາ ຄວນຫັນປ່ຽນແນວຄິດການໄປອອກແຮງງານຢູ່ຕ່າງປະເທດ ມາເປັນເຈົ້າຂອງວິສາຫະກິດຂະໜາດນ້ອຍ ແລະ ກາງ ຢູ່ປະເທດເຮົາ ເພື່ອເຮັດການຜະລິດກະສິກໍາເປັນສິນຄ້າ ທັງມີກຽດສັກສີ, ທັງມີລາຍຮັບຫຼາຍພໍສົມຄວນ ທັງຈະເຮັດໃຫ້ລູກຫຼານເຮົາ ບໍ່ຕົກຢູ່ໃນຄວາມສ່ຽງ, ໄດ້ຢູ່ນໍາຄອບຄົວຢ່າງອົບອຸ່ນ.

6. ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ແກ້ໄຂບັນຫາຢາເສບຕິດ ເປັນວຽກງານທີີ່ຮີບດ່ວນ ທີ່ອົງຄະນະພັກ, ອົງການປົກຄອງທຸກຂັ້ນ ຕະລອດຮອດພະນັກງານ, ທະຫານ, ຕໍາຫຼວດ ກໍຄື ປະຊາຊົນບັນດາເຜົ່າ ຕ້ອງໄດ້ພ້ອມພຽງກັນຈັດຕັ້ງປະຕິບັດດ້ວຍຄວາມຮັບຜິດຊອບສູງ ແລະ ເປັນວິທີທາງດຽວ ທີ່ຈະນໍາພາປະເທດຊາດ ໃຫ້ຫຼຸດພົ້ນຈາກວິກິດການທາງດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດ ໃຫ້ບັນລຸຜົນສໍາເລັດ ຈຶ່ງສະເໜີມາຍັງຄະນະພັກ, ອົງການປົກຄອງເມືອງ ເພີ່ມທະວິການນໍາພາຊີ້ນໍໍາ ຈັດຕັ້ງປະຕິບັດວາລະແຫ່ງຊາດຢ່າງຕັ້ງໜ້າ ແລະ ຖືເປັນພັນທະຂອງພົນລະເມືອງທຸກຄົນ ເປັນຕົ້ນ ການປະຕິບັດນະໂຍບາຍປະຢັດມັດທະຍັດງົບປະມານຂອງລັດ, ຫຼີກລ່ຽງການສ້າງແຜນການລົງທຶນຂອງລັດ ເກີນຄວາມສາມາດໃນການຊໍາລະສະສາງ ຊຶ່ງຈະເກີດໜີ້ສິນໃນອະນາຄົດ; ການຂຸດຄົ້ນແຫຼ່ງລາຍຮັບ ແລະ ຊຸກຍູ້ສົ່ງເສີມປະຊາຊົນເຮັດການຜະລິດ ເພື່ອສ້າງຖານລາຍຮັບ ໃໝ່, ການແກ້ໄຂບັນຫາຮົ່ວໄຫຼຂອງງົບປະມານ ແລະ ອື່ນໆ. ການສະກັດກັ້ນ ແລະ ແກ້ໄຂບັນຫາຢາເສບຕິດ ກໍເປັນວຽກງານທີ່ສໍາຄັນ ຊຶ່ງບັນຫາດັ່ງກ່າວ ເປັນໄພອັນຕະລາຍຕໍ່ໍ່ໍ່ປະເທດຊາດ, ເປັນປະກົດການຫຍໍ້ທໍ່ຂອງສັງຄົມ ຈຶ່ງສະເໜີໃຫ້ເອົາໃຈໃສ່ສະກັດກັ້ນບັນຫາຢາເສບຕິດ ຊຶ່ງຈະສົ່ງຜົນກະທົບຕໍ່ລູກຫຼານ ທີ່ເປັນອະນາຄົດຂອງປະເທດຊາດພວກເຮົາ.

7. ການສ້າງຮາກຖານການເມືອງ: ໃນສະພາບແວດລ້ອມຂອງພາກພື້ນ ແລະ ສາກົນທີ່ຜັນແປໄປຢ່າງສະຫຼັບຊັບຊ້ອນ ໄດ້ສົ່ງຜົນກະທົບຕໍ່ຊີວິດການເປັນຢູ່ ຂອງປະຊາຊົນບັນດາເຜົ່າ. ຕໍ່ໜ້າສະພາບການດັ່ງກ່າວນັ້ນ ການສ້າງຮາກຖານການເມືອງ ເປັນວຽກງານທີ່ມີຄວາມສໍາຄັນຫຼາຍ, ເປັນສະໜາມຮົມ ລະຫວ່າງ ພວກເຮົາ ກັບ ອິດທິກໍາລັງປໍລະປັກ, ຖ້າເຮົາປະຮາກຖານຍາມໃດ ຮາກຖານຂອງພວກເຮົາກໍຈະຖືກແຊກແຊງ ເພື່ອແບ່ງແຍກ, ປັ່ນປວນ, ມ້າງເພທໍາລາຍ. ສະນັ້ນ, ຄະນະພັກ, ອົງການປົກຄອງເມືອງພຽງ ຈະຕ້ອງໄດ້ເພີ່ມທະວີຄວາມເອົາໃຈໃສ່ ວຽກງານການກໍ່ສ້າງຮາກຖານການເມືອງ, ລົງໃກ້ຊິດຕິດແທດກັບພໍ່ແມ່ປະຊາຊົນ ຢ່າງແທດເຖິງ. ຖ້າຄະນະພັກ, ອົງການປົກຄອງເມືອງ ມີຄວາມຕິດພັນກັບຮາກຖານຢ່າງແໜ້ນແຟ້ນ, ຮູ້ຖືເອົາປະຊາຊົນເປັນກົກ ແລະ ຮູ້ເຮັດເພື່ອຜົນປະໂຫຍດຂອງປະຊາຊົນນັ້ນ, ອົງການປົກຄອງເມືອງ ກໍຈະໄດ້ຮັບການສະໜັບສະໜູນຈາກປະຊາຊົນ ແລະ ຮາກຖານການເມືອງກໍຈະໜັກແໜ້ນ, ຂະບວນການຂອງມະຫາຊົນ ກໍຈະຟົດຟື້ນ.

8. ການກະກຽມກອງປະຊຸມໃຫຍ່ 3 ຂັ້ນ ກໍເປັນວຽກງານໜຶ່ງທີ່ມີຄວາມສໍາຄັນ ຊຶ່ງອົງຄະນະພັກເມືອງພຽງ ຈະໄດ້ນໍາພາບັນດາຮາກຖານພັກຈັດຕັ້ງປະຕິບັດ ເພື່ອສຸມໃສ່ບັນດາວຽກງານຕ່າງໆ ດັ່ງນີ້:

– ການສ້າງຂະບວນການ ເພື່ອຍູ້ແຮງຂະບວນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ່ XI, ມະຕິ, ຄໍາສັ່ງ ຂອງພັກ ກໍຄື ມະຕິກອງປະຊຸມໃຫຍ່ຂອງອົງຄະນະພັກແຂວງ, ມະຕິກອງປະຊຸມໃຫຍ່ອົງຄະນະພັກເມືອງ ໃຫ້ບັນລຸຕາມຄາດໝາຍທີ່ວາງອອກ ຕິດພັນກັບຂະບວນການ ແຂ່ງຂັນຮັກຊາດ ແລະ ພັດທະນາ; ຫັນພະນັກງານ-ສະມາຊິກພັກຂອງຂະແໜງການຕ່າງໆ ລົງກໍ່ສ້າງຮາກຖານການເມືອງ ໃຫ້ກວ້າງຂວາງ, ທົ່ວເຖິງ; ປຸກລະດົມປະຊາຊົນບັນດາເຜົ່າ ເຂົ້າຮ່ວມຂະບວນການວຽກງານແຕ່ລະດ້ານ ໃຫ້ເປັນຂະບວນການຟົດຟື້ນ ແລະ ຕໍ່ເນື່ອງ; ຜ່ານຂະບວນການດັ່ງກ່າວ ເພື່ອເລືອກເຟັ້ນເອົາພະນັກງານ-ສະມາຊິກພັກ ຜູ້ທີ່ດີເດັ່ນ, ມີມາດຕະຖານ, ເງື່ອນໄຂຄົບຖ້ວນ ປະກອບເຂົ້າໃນຄະນະພັກຂັ້ນຕ່າງໆ; ປຸກລະດົມຂົນຂວາຍ ແລະ ນໍາພາມະຫາຊົນ ເຂົ້າຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບຮອບດ້ານ ແນໃສ່ຮັບປະກັນໃຫ້ທ້ອງຖິ່ນ, ຮາກຖານ ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ; ຍູ້ແຮງຂະບວນການພັດທະນາເສດຖະກິດ ໃຫ້ເປັນຂະບວນຟົດຟື້ນ, ຕໍ່ເນື່ອງ ດ້ວຍການຂຸດຄົ້ນທ່າແຮງບົ່ມຊ້ອນທາງດ້ານເສດຖະກິດຂອງເມືອງ ໃຫ້ມີປະສິດທິຜົນ;

– ການເລືອກເຟັ້ນບຸກຄະລາກອນ ກະກຽມໃຫ້ແກ່ການດໍາເນີນກອງປະຊຸມໃຫຍ່ 3​ ຂັ້ນ ເພື່ອປະກອບເຂົ້າໃນຄະນະບໍລິຫານງານພັກແຕ່ລະຂັ້ນ ຕ້ອງຮັບປະກັນໃຫ້ຖືກຕ້ອງຕາມມາດຕະ ຖານ, ເງື່ອນໄຂທີ່ໄດ້ກໍານົດໄວ້; ຕິດພັນກັບແຜນກໍານົດພະນັກງານນໍາພາ-ຄຸ້ມຄອງຂອງເມືອງ; ດ້ານໂຄງປະກອບ ຕ້ອງສູ້ຊົນໃຫ້ມີເພດຍິງ, ຊົນເຜົ່າ ມີຈໍານວນເພີ່ມຂຶ້ນ; ການເລືອກເຟັ້ນບຸກຄະລາກອນ ຕ້ອງປະຕິບັດຕາມຫຼັກການ ລວມສູນປະຊາທິປະໄຕ, ຕົກລົງເປັນໝູ່ຄະນະ; ໂຄງປະກອບດ້ານບຸກຄະລາກອນ ຕ້ອງຮັບປະກັນ 3 ຮຸ່ນ, ໃນນີ້ ຮຸ່ນກາງ ແລະ ຮຸ່ນໜຸ່ມ ໃຫ້ກວມເອົາອັດຕາສ່ວນຫຼາຍ. ສໍາລັບໂຄງປະກອບຄະນະບໍລິຫານງານພັກເມືອງ ໃຫ້ເອົາໃຈໃສ່ເລືອກເຟັ້ນເອົາ ເລຂາພັກຮາກຖານບ້ານ ແລະ ເລຂາໜ່ວຍພັກບ້ານ ທີ່ມີມາດຕະຖານ, ເງື່ອນໄຂຄົບຖ້ວນສະໝັກເຂົ້າໃນຄະນະພັກຊຸດໃໝ່ ໃຫ້ມີຈໍານວນເພີ່ມຂຶ້ນ.

– ການກະກຽມດ້ານເນື້ອໃນ ໃຫ້ແກ່ກອງປະຊຸມໃຫຍ່ 3​ ຂັ້ນ ໂດຍສະເພາະ ບົດລາຍງານການເມືອງ ຕ້ອງຕີລາຄາຮອບດ້ານຕໍ່ຜົນສໍາເລັດ ການຈັດຕັ້ງປະຕິບັດມະຕິກອງປະຊຸມໃຫຍ່, ການປັບປຸງພາຍໃນພັກ ຢູ່ຂັ້ນຂອງຕົນ ໃນ 5 ປີຜ່ານມາ; ການຕີລາຄາຕ້ອງໃຫ້ເລິກເຊີ່ງ, ພາວະວິໃສ, ກົງໄປກົງມາ ແລະ ຖືກຕ້ອງຕາມຄວາມເປັນຈິງ. ການກໍານົດທິດທາງແຜນການ ໃຫ້ສອດຄ່ອງກັບແນວທາງນະໂຍບາຍຂອງພັກ, ວິໄສທັດ ແລະ ຍຸດທະສາດການພັດທະນາເສດຖະກິດ-ສັງຄົມຂອງແຂວງ; ບົດສໍາຫຼວດການນໍາພາລວມຂອງຄະນະພັກແຕ່ລະຂັ້ນ ຕ້ອງສ່ອງແສງໃຫ້ເຫັນ ການຊີ້ນໍາ-ນໍາພາຮອບດ້ານຂອງຄະນະພັກ ໃນການປະຕິບັດແນວທາງນະໂຍບາຍຂອງພັກ, ກົດລະບຽບຂອງພັກ, ມະຕິກອງປະຊຸມໃຫຍ່ຂອງອົງຄະນະພັກເມືອງ ໃນໄລຍະ 5 ປີຜ່ານມາ.