(ສພຊ) ໃນວັນທີ 17 ກຸມພາ 2023 ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບ ອົງການປົກຄອງແຂວງໄຊຍະບູລີ ໃນໂອກາດດັ່ງກ່າວ ທ່ານ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາຕໍ່ ອົງການປົກຄອງ ແຂວງໄຊຍະບູລີ 10 ຂໍ້ ດັ່ງນີ້:
(1) ສະເໜີໃຫ້ ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີຄວາມເອົາໃຈໃສ່ນໍາພາວຽກງານ ປົກຮັກສາຄວາມສະຫງົບໃຫ້ແກ່ແຂວງຂອງຕົນ; ຈັດຕັ້ງຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຢ່າງທົ່ວເຖິງ ແລະ ເລິກເຊິ່ງ; ສ້າງ ແລະ ປັບປຸງຕາໜ່າງປ້ອງກັນຊາດ-ປ້ອງກັນຄວາມສະຫງົບ ຢູ່ທ້ອງ ຖິ່ນຮາກຖານ ໃຫ້ເຂັ້ມແຂງ, ໜັກແໜ້ນ; ສະກັດກັ້ນອາດສະຍາກໍາຕ່າງໆຢ່າງທັນການ, ເດັດຂາດ ແລະ ເຂັ້ມງວດ; ເອົາໃຈໃສ່ການຄຸ້ມຄອງຄົນຕ່າງປະເທດ ໃຫ້ເຂັ້ມງວດຕາມກົດໝາຍ.
(2) ສະເໜີໃຫ້ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີການນໍາພາ-ຊີ້ນໍາຂະແໜງການທີ່ກ່ຽວຂ້ອງຂອງແຂວງ ຄົ້ນຄວ້າວາງແຜນ ແລະ ຈັດແບ່ງເຂດການຜະລິດກະສິກໍາໃຫ້ເໝາະສົມ, ຄົ້ນຄວ້າກໍານົດທ່າແຮງບົ່ມຊ້ອນທາງດ້ານການຜະລິດກະສິກໍາຂອງແຂວງ ເພື່ອສຸມທຶນຮອນ, ເຕັກນິກວິຊາການ ເຂົ້າໃສ່ການຜະລິດເປັນສິນຄ້າຂອງປະ ຊາຊົນ ເປັນຕົ້ນ ການປູກເຂົ້າ, ພືດຜັກ, ໄມ້ໃຫ້ໝາກ, ການປູກໄມ້ອຸດສາຫະກໍາ, ການປູກຜັກປອດສານພິດ, ການປູກຫຍ້າເພື່ອລ້ຽງສັດ; ການລ້ຽງສັດໃຫຍ່ເປັນສິນຄ້າ, ການລ້ຽງປາ ແລະ ອື່ນໆ ເພື່ອສ້າງອາຊີບ ແລະ ລາຍຮັບອັນໝັ້ນຄົງໃຫ້ພໍ່ແມ່ປະຊາຊົນ; ສົ່ງເສີມການຜະລິດກະສິກໍາເປັນກຸ່ມ, ເປັນຟາມ, ສະຫະກອນແບບໃໝ່ ເພື່ອຂະຫຍາຍຖານການຜະລິດໃຫ້ກວ້າງໃຫຍ່ ແລະ ມີຜົນຜະລິດຈໍານວນຫຼາຍ, ມີທ່າແຮງໃນການເຂົ້າເຖິງແຫຼ່ງທຶນ ແລະ ການເຂົ້າເຖິງຕະຫຼາດທີ່ມີປະສິດທິພາບ.
(3) ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ເອົາໃຈໃສ່ນໍາພາຊີ້ນໍາ ໃນການປົກປັກຮັກສາແຫຼ່ງທ່ອງທ່ຽວໃຫ້ຍືນຍົງ ແລະ ພັດທະນາຄຸນຄ່າຂອງແຫຼ່ງທ່ອງທ່ຽວ ໃຫ້ຄົງຢູ່ຍາວນານກັບປະເທດລາວເຮົາຕະຫຼອດໄປ. ທ່າແຮງອີກດ້ານໜຶ່ງທີ່ສົ່ງເສີມການຜະລິດເປັນສິນຄ້າຂອງປະຊາຊົນ ຕິດພັນກັບການທ່ອງທ່ຽວດັ່ງກ່າວ, ຈະຕ້ອງໄດ້ຊຸກຍູ້ສົ່ງເສີມການຜະລິດກະສິກໍາ ເປັນຕົ້ນ ການລ້ຽງສັດໃຫຍ່, ການລ້ຽງປາ, ການປູກຕົ້ນໄມ້ກິນໝາກ, ການປູກຜັກປອດສານພິດ ຂອງວິສາຫະກິດຂະໜາດນ້ອຍ ແລະ ຂະໜາດກາງ, ຂອງຄອບຄົວ ດ້ວຍການເຮັດສັນຍາຜູກພັນກັບໂຮງແຮມ, ຮ້ານອາຫານ ໃນການຕອບສະໜອງຜະລິດຕະພັນກະສິກໍາ ໃຫ້ແກ່ການບໍລິການທ່ອງທ່ຽວຢ່າງເປັນລະບົບ, ກົມກຽວ.
(4) ເພື່ອຍົກສູງປະສິດທິພາບຂອງການສຶກສາ ໃຫ້ສາມາດຕອບສະໜອງກັບຄວາມຮຽກຮ້ອງຕ້ອງການ ໃນໄລຍະໃໝ່ນັ້ນ. ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ເອົາໃຈໃສ່ ລົງເລິກຕິດຕາມກວດກາເບິ່ງຄຸນນະພາບການສຶກສາຢູ່ໂຮງຮຽນ, ສະຖາບັນການສຶກສາຕ່າງໆ ໃຫ້ຮັບປະກັນດ້ານມາດຕະຖານຕາມກົດໝາຍກໍານົດ; ການພັດທະນາການສຶກສາຂອງຂະແໜງວິຊາສະເພາະດ້ານຕ່າງໆ ໃຫ້ສອດຄ່ອງກັບຄວາມຮຽກຮ້ອງຕ້ອງການຂອງການພັດທະນາ, ສາມາດສ້າງວຽກເຮັດງານທໍາໃຫ້ແກ່ລູກຫຼານ ທີ່ຮຽນຈົບວິຊາສະເພາະຂະແໜງຕ່າງໆ ໃຫ້ມີວຽກເຮັດງານທໍາ, ແກ້ໄຂການໄປອອກແຮງານຢູ່ປະເທດໃກ້ຄຽງ; ສຶກສາອົບຮົມ ໃຫ້ລູກຫຼານເຫັນໄດ້ທ່າແຮງດ້ານເສດຖະກິດຂອງປະເທດເຮົາ ເພື່ອຫັນມາເປັນເຈົ້າຂອງວິສາຫະກິດຂະໜາດນ້ອຍ, ຂະໜາດກາງ ໃນການຜະລິດກະສິກໍາເປັນສິນຄ້າ ສະໜອງໃຫ້ຕະຫຼາດພາຍໃນ, ສ້າງລາຍຮັບທີ່ໝັ້ນຄົງ ທັງໄດ້ດໍາລົງຊີວິດຮ່ວມກັບຄອບຄົວ.
(5) ວຽກງານການກໍ່ສ້າງຮາກຖານການເມືອງ ການກໍ່ສ້າງຮາກຖານການເມືອງ ແມ່ນມີຄວາມສໍາຄັນຫຼາຍ ສະນັ້ນ ຈະຕ້ອງໄດ້ເພີ່ມທະວີຄວາມເອົາໃຈໃສ່ ວຽກງານການກໍ່ສ້າງຮາກຖານການເມືອງ, ລົງໃກ້ຊິດຕິດແທດກັບພໍ່ແມ່ປະຊາຊົນ. ຄືດັ່ງບົດຮຽນຂອງພັກເຮົາ ໄດ້ຢັ້ງຢືນໃຫ້ເຫັນວ່າ ຫາກທ້ອງຖິ່ນໃດ ມີຄວາມຕິດພັນກັບຮາກຖານຢ່າງແໜ້ນແຟ້ນ, ຮູ້ຖືເອົາປະຊາຊົນເປັນກົກ ແລະ ຮູ້ເຮັດເພື່ອຜົນປະໂຫຍດຂອງປະຊາຊົນ ຢູ່ບ່ອນນັ້ນ ແມ່ນໄດ້ຮັບການສະໜັບສະໜູນຈາກປະຊາຊົນ ແລະ ຮາກຖານການເມືອງ ກໍຈະໜັກແໜ້ນ, ຂະບວນການຂອງມະຫາຊົນ ກໍຈະຟົດຟື້ນ; ການກໍ່ສ້າງຮາກຖານການເມືອງໃຫ້ໄດ້ຮັບຜົນສໍາເລັດ ສິ່ງສໍາຄັນຕ້ອງຖືວຽກງານປ້ອງກັນຊາດ-ປ້ອງກັນຄວາມສະຫງົບ ຕິດພັນກັບການພັດທະນາເສດຖະກິດ-ສັງຄົມ ເຊິ່ງເປັນວຽກງານທີ່ມີຄວາມກ່ຽວພັນກັນຢ່າງສະໜິດແໜ້ນ; ສະເໜີໃຫ້ ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີຄວາມເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອເປັນເງື່ອນໄຂຂອງການສ້າງສາພັດທະນາແຂວງ; ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ຕ້ອງກໍາແໜ້ນຮາກຖານການເມືອງຂອງແຂວງ, ຮັບຮູ້ໄດ້ເຖິງບັນຫາທີ່ຈະເປັນຊ່ອງວ່າງ ເປັນຕົ້ນ ພະຍາດອາດຍາສິດຂອງພະນັກງານ, ຄວາມບໍ່ສົມດຸນໃນການພັດທະນາ ລະຫວ່າງ ສູນກາງ ແລະ ທ້ອງຖິ່ນ, ປາກົດການຫຍໍ້ທໍ້ໃນກົງຈັກລັດ, ການສໍ້ລາດບັງຫຼວງ ແລະ ອື່ນໆ, ບັນຫາດັ່ງກ່າວ ຕ້ອງມີທິດທາງໃນການແກ້ໄຂຢ່າງເປັນຮູບປະທໍາ.
(6) ວຽກງານການພັດທະນາຊົນນະບົດ ການພັັດທະນາຊົນນະບົດ ແລະ ແກ້ໄຂຄວາມທຸກຍາກ ແມ່ນຍຸດທະສາດສໍາຄັນ ໃນການສ້າງຄວາມໝັ້ນຄົງ ໃຫ້ແກ່ລະບອບປະຊາທິປະໄຕປະຊາຊົນ, ປົວແປງຊີວິດການເປັນຢູ່ ແລະ ຍົກລະດັບຄຸນນະພາບຊີວິດຂອງປະຊາຊົນ ເລີ່ມແຕ່ຮາກຖານ ໃຫ້ນັບມື້ດີຂຶ້ນ ເຊິ່ງເນື້ອແທ້ແມ່ນການເຮັດໃຫ້ການພັດທະນາ ລະຫວ່າງຕົວເມືອງ ກັບຊົນນະບົດ, ທົ່ງພຽງ ກັບພູດອຍ ໃຫ້ຫຍັບເຂົ້າໃກ້ກັນ ເຊິ່ງຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ກໍໄດ້ມີຈຸດສຸມທີ່ກໍານົດເປັນແຜນການແລ້ວ ຈຶ່ງສະເໜີໃຫ້ສຸມໃສ່ສູ້ຊົນຈັດຕັ້ງປະຕິບັດ; ການລົງທຶນຂອງລັດເຂົ້າໃນການກໍ່ສ້າງໂຄງລ່າງພື້ນຖານ ເປັນຕົ້ນ ຖະໜົນຫົນທາງ, ການຈັດສັນບ່ອນທໍາມາຫາກິນ ຕິດພັນກັບການພັດທະນາຊົນນະບົດ ແລະ ແກ້ໄຂຄວາມທຸກຍາກ. ເຖິງວ່າທຶນຮອນ, ງົບປະມານ ມີຈໍາກັດ ແຕ່ພັກ-ລັດ ກໍໄດ້ຈັດສັນໃຫ້ແກ່ວຽກງານດັ່ງກາວ ຈຶ່ງສະເໜີໃຫ້ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ເອົາໃຈໃສ່ຕິດຕາມ, ກວດກາ ແລະ ຄຸ້ມຄອງການນໍາໃຊ້ທຶນຮອນດັ່ງກ່າວ ໃຫ້ຕິດພັນກັບການພັດທະນາແທ້ ແລະ ນໍາຜົນປະໂຫຍດຕົວຈິງມາໃຫ້ປະຊາຊົນ; ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ເອົາໃຈໃສ່ນໍາພາຂະແໜງການທີ່ກ່ຽວຂ້ອງຄົ້ນຄວ້າ ຈັດສັນທີ່ດິນເພື່ອນໍາໃຊ້ເຂົ້າໃນການຜະລິດກະສິກໍາເປັນສິນຄ້າປະເພດຕ່າງໆ ຢ່າງມີປະສິດທິຜົນ ເພື່ອສຸມທຶນຮອນ, ເຕັກນິກ ແລະ ນໍາພາປະຊາຊົນ ເຮັດການຜະລິດ ເພື່ອສ້າງອາຊີບ, ສ້າງລາຍຮັບປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ.
(7) ວຽກງານ 3 ສ້າງ: ວຽກງານສາມສ້າງ ເປັນວຽກງານທີ່ມີຄວາມສໍາຄັນ ໃນການສ້າງຄວາມເຂັ້ມແຂງໃຫ້ແກ່ທ້ອງຖິ່ນຮາກຖານ ເພື່ອເສີມຂະຫຍາຍສິດເປັນເຈົ້າຂອງທ້ອງຖິ່ນຮາກຖານ ດ້ວຍການມອບສິດມອບຄວາມຮັບຜິດຊອບ ໃນການບໍລິຫານລັດ ແລະ ການຄຸ້ມຄອງເສດຖະກິດ-ສັງຄົມ ເພື່ອຍົກສູງຄວາມສາມາດໃນການກຸ້ມຕົນເອງໃຫ້ນັບມື້ຫຼາຍຂຶ້ນ ເພື່ອບັນລຸຜົນສໍາເລັດດັ່ງກ່າວ ສິ່ງທີ່ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ເອົາໃຈໃສ່ ແມ່ນການຫັນພະນັກງານ, ຫັນງົບປະມານໄປເພີ່ມໃຫ້ທ້ອງຖິ່ນ ເປັນຕົ້ນ ແມ່ນຂັ້ນເມືອງ ແລະ ນໍາພາເຮັດຕົວຈິງຢູ່ຮາກຖານບ້ານ.
(8. ການເຄື່ອນໄຫວວຽກງານຂອງສະພາປະຊາຊົນແຂວງ ການເຄື່ອນໄຫວວຽກງານຂອງ ສະພາປະຊາຊົນແຂວງໄຊຍະບູລີ ໃນໄລຍະຜ່ານມາກໍມີຜົນສໍາເລັດຫຼາຍດ້ານ ແລະ ສາມາດສ້າງປະສົບການນັບມື້ດີຂຶ້ນ. ເຖິງແນວໃດກໍຕາມ ເພື່ອຕອບສະໜອງກັບຄວາມຮຽກຮ້ອງຕ້ອງການ ຂອງວຽກງານໃນຕໍ່ໜ້າ ຈຶ່ງສະເໜີໃຫ້ ຄະນະພັກແຂວງໄຊຍະບູລີ ເພີ່ມທະວີຄວາມເອົາໃຈໃສ່ນໍາພາຊີ້ນໍາ ເຮັດໃຫ້ການປະຕິບັດໜ້າທີ່ຂອງສະພາປະຊາຊົນແຂວງ ໃນການເປັນຕົວແທນໃຫ້ແກ່ປະຊາ ຊົນບັນດາເຜົ່າຂອງແຂວງ ມີຄຸນນະພາບ ແລະ ປະສິດທິຜົນສູງຂຶ້ນ.
ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ເປັນອົງການທີ່ ຄະນະປະຈໍາສະພາແຫ່ງຊາດສ້າງຕັ້ງ ແລະ ປະຕິບັດໜ້າທີ່ວຽກງານຢູ່ທ້ອງຖິ່ນ ເພື່ອຕິດຕາມຊຸກຍູ້ການຈັດຕັ້ງປະຕິບັດກົດໝາຍ, ມະຕິ ຂອງສະພາແຫ່ງຊາດ ຢູ່ເຂດເລືອກຕັ້ງຕ່າງໆໃນທົ່ວປະເທດ ເພື່ອເຮັດໃຫ້ການປະຕິບັດໜ້າທີ່ຂອງ ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 7 ແຂວງໄຊຍະບູລີ ໄດ້ຮັບຜົນສໍາເລັດດ້ວຍປະສິດທິຜົນສູງນັ້ນ, ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ຈະຕ້ອງເຮັດໜ້າທີ່ໃນການເກັບກໍາ, ສັງລວມເອົາບັນຫາຕ່າງໆ ກ່ຽວກັບການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມຂອງທ້ອງຖິ່ນ ນໍາໄປສະເໜີຕໍ່ກອງປະຊຸມສະພາແຫ່ງຊາດ ເພື່ອພິຈາລະນາ, ຊອກຫາວິທີການແກ້ໄຂ.
(9) ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ມາຮອດປັດຈຸບັນ ກໍເປັນປີສຸດທ້າຍແລ້ວ ເຊິ່ງໃນທ້າຍປີ 2023 ກໍຈະໄດ້ສະຫຼຸບຕີລາຄາການຈັດຕັ້ງປະຕິບັດ. ສະນັ້ນ, ຈຶ່ງສະເໜີໃຫ້ ຄະນະພັກ, ສະພາປະຊາຊົນແຂວງ, ອົງການປົກຄອງແຂວງໄຊຍະບູລີ ເພີ່ມທະວີການໂຄສະນາເຜີຍແຜ່ຢ່າງກວ້າງຂວາງ ແລະ ຖືເອົາວາລະແຫ່ງຊາດ ເປັນພາລະກິດທົ່ວປວງຊົນ ສະມາຊິກພັກ, ພະນັກງານ-ລັດຖະກອນ ກໍຄື ພໍ່ແມ່ປະຊາຊົນບັນດາເຜົ່າ ຈະຕ້ອງໄດ້ຮ່ວມແຮງຮ່ວມໃຈກັນຈັດຕັ້ງປະຕິບັດ.
(10) ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ບັນຫາຢາເສບຕິດ ເປັນໄພອັນຕະລາຍຕໍ່ສັງຄົມ, ເປັນສາເຫດຂອງການເກີດອາດສະຍາກໍາປະເພດຕ່າງໆ ໂດຍເຫັັນໄດ້ຄວາມເປັນໄພອັນຕະລາຍດັ່ງກ່າວ ລັດຖະບານ ຈຶ່ງໄດ້ກໍານົດການແກ້ໄຂບັນຫາຢາເສບຕິດ ເປັນວາລະແຫ່ງຊາດ ເຊິ່ງບັນດາອົງການຈັດຕັ້ງພັກ-ລັດ ກໍຄືປະຊາຊົນບັນດາເຜົ່າ ຕ້ອງໄດ້ພ້ອມກັນຈັດຕັ້ງປະຕິບັດ. ເອົາໃຈໃສ່ປຸກລະດົມຂົນຂວາຍໃຫ້ ພໍ່ແມ່ປະຊາຊົນບັນດາເຜົ່າ ເຫັນໄດ້ຜົນຮ້າຍຂອງບັນຫາຢາເສບຕິດ ທີ່ມີຕໍ່ປະເທດຊາດ, ສັງຄົມ, ຄອບຄົວ ກໍຄືສຸຂະພາບຂອງລູກຫລານ. ສະນັ້ນ, ທຸກພາກສ່ວນໃນສັງຄົມ ຈະຕອ້ງໄດ້ພ້ອມກັນເຂົ້າຮ່ວມໃນການຈັດຕັ້ງປະຕິບັດວາລະແຫ່ງຊາດ, ບໍ່ປະໃຫ້ແຕ່ສອງກໍາລັງເປັນຜູ້ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ; ຖືເອົາການແກ້ໄຂບັນຫາຢາເສບຕິດ ຕິດພັນກັບວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ, ການສົ່ງເສີມການຜະລິດ, ສ້າງວຽກເຮັດງານທໍາ, ການສ້າງລາຍໄດ້ແກ່ປະຊາຊົນ, ປັບປຸງຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນ,
ພ້ອມນັ້ນປະທານສະພາແຫ່ງຊາດພ້ອມດ້ວຍພັນລະຍາໄດ້ມອບເງີນຈຳນວນ 100.000.000 ລ້ນກີບໃຫ້ແຂວງໄຊຍະບູລີເພື່ອຮັບໃຊ້ວຽກງານມະຫາກຳບຸນຊ້າງ ຄັ້ງທີ 16, ເຄື່ອງຄອມພິວເຕີຈຳນວນ 5 ຊຸດໃຫ້ສະພາປະຊາຊົນແຂວງ ແລະອຸປະກອນການແພດອີກຈຳນວນນື່ງ.