(ສພຊ) – ເພື່ອເຮັດໃຫ້ວຽກງານຕິດຕາມກວດກາການປະເມີນຜົນການຈັດຕັ້ງປະຕິບັດຂໍ້ຕົກລົງຂອງເຈົ້າ ແຂວງ, ເຈົ້າຄອງນະຄອນຫຼວງ ມີເນື້ອໃນຄົບຖ້ວນສົມບູນ, ສາມາດນໍາໄປຈັດຕັ້ງປະຕິບັດມີຄວາມເປັນເອກະພາບກັນໃນຂອບເຂດທົ່ວປະເທດ; ລະຫວ່າງວັນທີ 23-24 ພຶດສະພາ 2024 ທີ່ແຂວງວຽງຈັນ, ກໍາມາທິການກົດໝາຍ ໄດ້ຈັດກອງປະຊຸມລະດົມແນວຄິດໃສ່ຮ່າງມະຕິຂອງຄະນະປະຈໍາສະພາແຫ່ງຊາດ ແລະ ຮ່າງປຶ້ມຄູ່ມືກ່ຽວກັບການຕິດຕາມກວດກາການປະເມີນຜົນການຈັດຕັ້ງປະຕິບັດຂໍ້ຕົກລົງຂອງເຈົ້າແຂວງ, ເຈົ້າຄອງນະຄອນຫຼວງ ພາຍໃຕ້ການເປັນປະທານຂອງທ່ານ ອໍາໄພ ຈິດມານົນ ຮອງປະທານກໍາມາທິການກົດໝາຍ ໂດຍມີບັນດາທ່ານຮອງປະທານ ແລະ ເລຂາທິການສະພາປະຊາຊົນແຂວງ, ນະຄອນຫຼວງ, ບັນດາທ່ານປະທານຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ, ຫົວໜ້າຂະແໜງ, ພະນັກງານ-ລັດຖະກອນ ໃນ 6 ແຂວງ ຄື: ຫຼວງພະບາງ, ຊຽງຂວາງ, ວຽງຈັນ, ບໍລິຄໍາໄຊ, ຄໍາມ່ວນ ແລະ ໄຊສົມບູນ ພ້ອມດ້ວຍຄະນະກົມ ແລະ ພະນັກງານ-ລັດຖະກອນ ຈໍານວນໜຶ່ງຂອງກົມຕິດຕາມກວດກາ, ໂຄສະນາ ແລະ ຕີຄວາມໝາຍກົດໝາຍ ລວມຜູ້ເຂົ້າຮ່ວມທັງໝົດ 56 ທ່ານ ຍິງ 15 ທ່ານ.
ບັນດາຜູ້ເຂົ້າຮ່ວມໄດ້ພ້ອມກັນປະກອບຄໍາເຫັນຢ່າງມີຈຸດສຸມ, ຫຼາກຫຼາຍ ທີ່ສອດຄ່ອງກັບການຈັດຕັ້ງປະ ຕິບັດຕົວຈິງຂອງສະພາປະຊາຊົນຂັ້ນແຂວງ (ສພຂ) ເພື່ອເຮັດໃຫ້ຮ່າງມະຕິຂອງຄະນະປະຈໍາສະພາແຫ່ງຊາດ ແລະ ຮ່າງປຶ້ມຄູ່ມືດັ່ງກ່າວ ສາມາດນໍາໄປຈັດຕັ້ງປະຕິບັດໃຫ້ມີຄວາມຊັດເຈນ, ຮັດກຸມ ແລະ ເອກະພາບຕໍ່ກັບວຽກງານດັ່ງກ່າວ ເຊິ່ງເປັນວຽກງານໜຶ່ງທີ່ມີຄວາມໝາຍ ແລະ ຄວາມສໍາຄັນໃນການປະຕິບັດພາລະບົດບາດດ້ານການຕິດ ຕາມກວດກາການປະເມີນຜົນການຈັດຕັ້ງປະຕິບັດຂໍ້ຕົກລົງຂອງເຈົ້າແຂວງ, ເຈົ້າຄອງນະຄອນ ຂອງ ສພຂ.
ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກມູນນິທິ ເວສທ໌ມິນສ໌ເທີ ເພື່ອປະຊາທິປະໄຕ (Westminster Foundation for Democracy-WFD) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບ​ກັບງົບປະມານ​ຂອງ​ຄະນະ​ເລຂາທິການ​ສະພາ​ແຫ່ງ​ຊາດ.
(ກົມຕິດຕາມກວດກາ, ໂຄສະນາ ແລະ ຕີຄວາມໝາຍກົດໝາຍ)