ວັນທີ 8 ເມສາ 2024 ທີ່ແຂວງຄຳມ່ວນ ສະຫາຍ ບຸນມີ ພິມມະສອນ ຮອງເລຂາພັກແຂວງ, ປະທານສະພາປະຊາຊົນແຂວງ ພ້ອມດ້ວຍບັນທ່ານການນໍາຂອງແຂວງ, ໄດ້ເປັນກຽດຕ້ອນຮັບການເຂົ້າອວຍພອນ ຂອງຄະນະກອງບັນຊາການທະຫານເຂດ 4 ສສ ຫວຽດນາມ, ນຳໂດຍ ສະຫາຍ ພັນເອກ ດວານ ຊວນ ເບື່ອງ ຮອງຫົວໜ້າກອງບັນຊາການທະຫານເຂດ 4 ພ້ອມດ້ວຍຄະນະ ອວຍພອນຕໍ່ການນຳພັກ  – ລັດ  ແຂວງຄຳມ່ວນ ເນື່ອງໃນໂອກາດບຸນປີໃໝ່ປະເພນີລາວ ພສ 2567 ທີ່ຈະມາເຖິງນີ້, ເພື່ອອວຍພອນໄຊອັນປະເສີດໃຫ້ການນຳພັກ – ລັດ ແລະ ພະນັກງານກໍາລັງປະກອບອາວຸດ ຕະຫລອດເຖິງປະຊາຊົນບັນດາເຜົ່າແຂວງຄຳມ່ວນ ທຸກທົ່ວໜ້າຈົ່ງມີສຸຂະພາບເຂັ້ມແຂງ, ມີຄວາມຜາສຸກ ພ້ອມພາກັນສ້າງສາພັດທະນາແຂວງຄຳມ່ວນ ໃຫ້ມີຄວາມຈະເລີນຮຸ່ງເຮືອງສີວິໄລຂຶ້ນໄປເລື້ອຍໆ.

ໂອກາດດັ່ງກ່າວ ສະຫາຍ ບຸນມີ ພິມມະສອນ ໃນນາມຕາງໜ້າການນຳຂອງແຂວງຄຳມ່ວນ, ໄດ້ສະແດງຄວາມຂອບໃຈມາຍັງ ສະຫາຍ ຮອງຫົວໜ້າກອງບັນຊາການທະຫານເຂດ 4 ພ້ອມຄະນະ ທີ່ໄດ້ນໍາເອົາຄໍາອວຍພອນອັນປະເສີດ, ຄວາມສາມັກຄີອັນສະໜິດແໜ້ນ ແລະ ມິດຕະພາບອັນອົບອຸ່ນຈາກຄະນະພັກ, ຄະນະບັນຊາ ແລະ ນາຍທະຫານກອງບັນຊາການທະຫານເຂດ 4 ມາສູ່ຄະນະພັກ, ຄະນະນໍາ ກໍ່ຄືນາຍທະຫານກອງບັນຊາການທະຫານແຂວງຄໍາມ່ວນ ພວກຂ້າພະເຈົ້າໃນຄັ້ງນີ້, ທັງເປັນການເສີມຂະຫຍາຍສາຍພົວພັນຮ່ວມມືທີ່ດີ ລະຫວ່າງ ສອງພັກ-ສອງລັດ, ສອງຊາດ ລາວ-ຫວຽດນາມ ກໍ່ຄືສອງກໍາລັງຂອງພວກເຮົາ. ໃນໄລະຍະຜ່ານມາສອງກໍາລັງພວກເຮົາກໍ່ໄດ້ມີການພົວພັນຮ່ວມມື, ແລກປ່ຽນບົດຮຽນ, ຊ່ວຍເຫຼືອເຊິ່ງກັນ ແລະ ກັນດ້ວຍດີຕະຫຼອດມາ ໂດຍສະເພາະແມ່ນຂົງເຂດກໍາລັງປ້ອງກັນຊາດ, ປ້ອງກັນຄວາມສະຫງົບ ແຂວງຄໍາມ່ວນ ແລະ ທະຫານເຂດ 4 ໄດ້ເອົາໃຈໃສ່ໃນການເຄື່ອນໄຫວແລກປ່ຽນບົດຮຽນໃນດ້ານຕ່າງໆ ເປັນຕົ້ນການຕ້ານສະກັດກັ້ນພວກກຸ່ມຄົນທີ່ບໍ່ດີມາເຄື່ອນໄຫວຕາມບໍລິເວນຊາຍແດນ ຫລື ການອອກ-ເຂົ້າເມືອງ ທີ່ຜິດກົດໝາຍ ຜ່ານມາເຫັນວ່າ ສອງກຳລັງໄດ້ມີການປະສານສົມທົບ ແລະ ເຮັດໄດ້ດີຫລາຍ ເຮັດໃຫ້ບໍລິເວນຊາຍແດນສອງແຂວງມີຄວາມສະຫງົບເປັນລະບຽບຮຽບຮ້ອຍເປັນຢ່າງດີ. ເນື່ອງໃນໂອກາດທີ່ບັນດາສະຫາຍມາເຄື່ອນໄຫວຄັ້ງນີ້ ຂ້າພະເຈົ້າຂໍຕາງໜ້າການນໍາຂອງແຂວງ, ກໍາລັງປະກອບອາວຸດ ແລະ ປະຊາຊົນຊາວແຂວງຄໍາມ່ວນ ຂໍຝາກຄໍາອວຍພອນ ຜ່ານພວກສະຫາຍໄປຍັງ ຄະນະພັກ, ຄະນະນໍາກອງບັນຊາການ, ທົ່ວກອງບັນຊາການທະຫານເຂດ 4  ໃນໂອກາດບຸນປີໃໝ່ລາວທີ່ກໍາລັງຈະມາເຖິງ ຈົ່ງມີສຸຂະພາບເຂັ້ມແຂງ, ແຂງແຮງ ແລະ ອວຍພອນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຂອງສອງຊາດລາວ-ຫວຽດນາມ ເວົ້າລວມ, ເວົ້າສະເພາະ ສອງກໍາລັງພວກເຮົາ ຈົ່ງໝັ້ນຄົງທະນົງແກນຕະຫຼອດໄປ.

#https://www.khammouanenews.com/ #ແຂວງຄໍາມ່ວນ