ຕອນເຊົ້າຂອງວັນທີ 22 ກໍລະກົດ 2024 ທີ່ສະພາປະຊາຊົນແຂວງຫລວງນ້ຳທາ ທ່ານ ມີໄຊ ມີວິໄລ ກໍາມະການຄະນະປະຈໍາສະພາປະຊາຊົນແຂວງ, ເລຂາທິການສະພາປະຊາຊົນແຂວງ ຕາງໜ້າໃຫ້ສະມາຊິກສະພາປະຊາຊົນແຂວງ ໄດ້ຖະແຫລງຂ່າວ ເປີດກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຊຸດທີ II; ທ່ານໃຫ້ຮູ້ວ່າໃນກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຫລວງນໍ້າທາ ຊຸດທີ II ຈະໄຂຂຶ້ນໃນຕອນເຊົ້າຂອງວັນທີ 24 ກໍລະກົດ 2024 ເຊິ່ງຈະດຳເນີນເປັນເວລາ 2 ມື້ ວັນທີ 25 ກໍລະກົດ 2024 ຈື່ງສຳເລັດ; ປະຊຸມຄັ້ງນີ້ຈະໄດ້ຮັບຟັງການລາຍງານ ແລະ ພິຈາລະນາຮັບຮອງເອົາບັນດາເນື້ອໃນທີ່ສໍາຄັນພຶ້ນຖານຂອງແຂວງ ດັ່ງນີ້: ພິຈາລະນາ, ຮັບຮອງເອົາບົດລາຍງານ ກ່ຽວກັບການຈັດຕັ້ງປະບັດແຜນພັດທະນາເສດຖະ ກິດ-ສັງຄົມ ປະຈໍາ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2024 ຂອງແຂວງ;ພິຈາລະນາ, ຮັບຮອງເອົາບົດລາຍງານ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2024 ຂອງແຂວງ;ພິຈາລະນາ, ຮັບຮອງເອົາ ບົດລາຍງານກ່ຽວກັບວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງແຂວງ;ພິຈາລະນາ, ຮັບຮອງເອົາບົດລາຍງານ ກ່ຽວກັບການເຄື່ອນໄຫວວຽກງານ ແຕ່ກອງປະຊຸມສະໄໝສາມັນເທື່ອທີ 6 ຫາ ເທື່ອທີ 7 ແລະ ແຜນການເຄື່ອນໄຫວວຽກງານຮອດ ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງ.
ພ້ອມນັ້ນ ໃນນາມຄະນະປະຈຳສະພາປະຊາຊົນແຂວງ, ເລຂາທິການສະພາປະຊາຊົນແຂວງ ທ່ານຍັງໄດ້ ເຊີນຊວນບັນດາທ່ານ ພະນັກງານ, ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່ແມ່ພີ່ນ້ອງປະຊາຊົນບັນດາເຜົ່າທຸກຊັ້ນຄົນໃນທົ່ວແຂວງຫຼວງນໍ້າທາ ຈົ່ງຕິດຕາມການດໍາເນີນກອງປະຊຸມໃນຄັ້ງນີ້ ແລະ ໃນໄລຍະດຳເນີນກອງປະຊຸມສະພາປະຊາຊົນແຂວງ ເພື່ອຮັບເອົາຄຳຄິດຄຳເຫັນ ແລະ ຄຳສະເໜີໂດຍກົງຈາກປະຊາຊົນ ທີ່ຈະສົ່ງໄປຍັງກອງປະຊຸມ, ບັນດາທ່ານສາມາດໂທລະສັບເຂົ້າຫາສະພາປະຊາຊົນແຂວງຫລວງນ້ຳທາ ທີໝາຍເລກ 086 312 185.
ພາບ ແລະ ຂ່າວໂດຍ ນາງ ອຳພອນ ສີປະເສີດ