ຕອນແລງຂອງວັນທີ 12 ມັງກອນ 2024 ທີ່ສະໂມສອນຂອງແຂວງຫລວງນ້ຳທາ ທ່ານ ມີໄຊ ມີວິໄລ ກໍາມະການຄະນະປະຈໍາສະພາປະຊາຊົນແຂວງ, ເລຂາທິການສະພາປະຊາຊົນແຂວງ ຕາງໜ້າໃຫ້ສະມາຊິກສະພາປະຊາຊົນແຂວງ ໄດ້ຖະແຫລງຂ່າວຜົນສຳເລັດກອງປະຊຸມສະໄໝສາມັນເທື່ອທີ6 ຂອງສະພາປະຊາຊົນແຂວງຊຸດທີ2 ທ່ານໃຫ້ຮູ້ວ່າ ກອງປະຊຸມສະພາປະຊາຊົນແຂວງຄັ້ງທີິ6 ໄດ້ດຳເນີນມາເປັນເວລາ 3 ວັນເຕັມ ແລະ ໄດ້ປິດລົງຢ່າງເປັນທາງການດ້ວຍຜົນສຳເລັດຕາມລະດັບຄາດໝາຍຂອງຕອນແລງວັນທີ 12 ມັງກອນ 2024

ຊຶ່ງໃນກອງປະຊຸມຄັ້ງນີ້ ໄດ້ຄົ້ນຄວ້າ,ພິຈາລະນາ, ຮັບຮອງເອົາບັນຫາສໍາຄັນຕ່າງໆຂອງແຂວງ ແລະ ໄດ້ອອກມະຕິຮັບຮອງເອົາ 6 ສະບັບຄື: ຮ່າງມະຕິກອງປະຊຸມວ່າດ້ວຍ ການຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມ ປະຈໍາປີ 2023 ແລະ ທິດທາງແຜນການປະຈໍາປີ 2024 ຂອງແຂວງ; ຮ່າງມະຕິກອງປະຊຸມວ່າດ້ວຍ ການຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນງົບປະ ມານແຫ່ງລັດ ປະຈໍາປີ 2023 ແລະ ທິດທາງແຜນການປະຈໍາປີ 2024 ຂອງແຂວງ; ຮ່າງມະຕິກອງປະຊຸມວ່າດ້ວຍ ການຮັບຮອງເອົາບົດລາຍງານ ຂອງອົງການກວດກາລັດແຂວງ ແລະ ອົງການກວດສອບແຫ່ງລັດປະຈໍາພາກເໜືອ; ຮ່າງມະຕິກອງປະຊຸມວ່າດ້ວຍ ການຮັບຮອງເອົາບົດລາຍງານ ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ; ຮ່າງມະຕິກອງປະຊຸມວ່າດ້ວຍ ການຮັບຮອງເອົາ ບົດສະຫຼຸບການ ຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2023 ແລະ ແຜນການ ປະຈໍາປີ 2024 ຂອງສະພາປະຊາ ຊົນແຂວງ; ຮ່າງມະຕິກອງປະຊຸມວ່າດ້ວຍ ການຮັບຮອງເອົາ ຂໍ້ຕົກລົງຂອງເຈົ້າ ແຂວງວ່າດ້ວຍ ການຄຸ້ມຄອງການຈັດງານ ແລະ ງານບຸນປະເພນີຕ່າງໆຢູ່ບັນດາເມືອງ; ຮັບຟັງບົດລາຍງານການຈັດຕັ້ງປະຕິບັດ ສອງວາລະແຫ່ງຊາດ ຂອງແຂວງຫຼວງນໍ້າທາ

ທ່ານມີໄຊ ມີວິໄລ ກໍາມະການຄະນະປະຈໍາສະພາປະຊາຊົນແຂວງ, ເລຂາທິການສະພາປະຊາຊົນແຂວງ ຕາງໜ້າໃຫ້ສະມາຊິກສະພາປະຊາຊົນແຂວງ ຍັງໄດ້ກ່າວສະແດງຄວາມຂອບໃຈ ແລະ ຊົມເຊີຍມາຍັງທຸກພາກສ່ວນທີ່ໃຫ້ການຕິດຕາມການດຳເນີນກອງປະຊຸມໃນຄັ້ງນີ້.

ໂດຍ ນາງ ວັນນີ ແຝງບົວວັນ