ເພື່ອຍົກໃຫ້ເຫັນເຖິງຜົນງານດ້ານດີ, ດ້ານອ່ອນ, ຂໍ້ຄົງຄ້າງ, ບົດຮຽນທີ່ຖອດຖອນໄດ້, ປືກສາຫາລື ແລະ ແລກປ່ຽນບົດຮຽນໃນການກະກຽມ ແລະ ດໍາເນີນກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ອັດຕະປື ຊຸດທີ II, ຢ່າງກົງໄປກົງມາ, ພາວະວິໄສ ເພື່ອຮັບປະກັນໃຫ້ການກະກຽມ ແລະ ດໍາເນີນກອງປະຊຸມຂອງສະພາປະຊາຊົນແຂວງຄັ້ງຕໍ່ໄປມີປະສິດທິພາບສູງ.
ໃນວັນທີ 21 ກຸມພາ 2023 ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດກອງປະຊຸມຖອດຖອນບົດຮຽນການກະກຽມ ແລະ ດໍາເນີນກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ອັດຕະປື ຊຸດທີ II ໂດຍການເປັນປະທານຂອງທ່ານ ນາງ ມີນາພອນ ໄຊສົມພູ ປະທານສະພາປະຊາຊົນແຂວງ ມີບັນດາທ່ານ ຄະນະປະຈໍາສະພາປະຊາຊົນແຂວງ, ຄະນະກໍາມະການ, ຄະນະເລຂາທິການ, ສະມາຊິກສະພາປະຊາຊົນແຂວງ ແລະ ພະນັກງານ-ລັດຖະກອນພາຍໃນສະພາປະຊາຊົນແຂວງເຂົ້າຮ່ວມ.
ກອງປະຊຸມ, ທ່ານ ນາງ ແສງອາລຸນ ວົງສາທິການ ເລຂາທິການສະພາປະຊາຊົນແຂວງ ໄດ້ຜ່ານບົດສະຫຼຸບຕິລາຄາການກະກຽມ ແລະ ດໍາເນີນກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ອັດຕະປື ຊຸດທີ II ເຊິ່ງໄດ້ຍົກໃຫ້ເຫັນຜົນງານດ້ານດີ, ຂໍ້ຄົງຄ້າງໃນການກະກຽມ ແລະ ດໍາເນີນກອງປະຊຸມປະຊຸມຂອງບັນດາອະນຸກໍາມະການເຊັ່ນ: ອະນຸກໍາການເນື້ອໃນ, ອະນຸກໍາມະການກອງເລຂາ, ອະນຸກໍາມະການພິທີການ ແລະ ຮັບແຂກ, ອະນຸກໍາມະການບໍລິຫານ-ການເງີນ, ອະນຸກໍາມະການປະຊາສໍາພັນ ແລະ ສາຍດ່ວນ, ອະນຸກໍາມະການປ້ອງກັນຄວາມສະຫງົບ ແລະ ຮັກສາສຸຂະພາບ, ອະນຸກໍາມະການແກະຄໍາເຫັນຂອງຜູ້ແທນກອງປະຊຸມ ແລະ ອະນຸກໍາມະການປະເມີນ ແລະ ໃຫ້ຄະແນນ, ຈາກນັ້ນ, ກໍ່ໄດ້ຮັບຟັງຜ່ານແຜນການລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ແລະ ສະພາປະຊາຊົນແຂວງອັດຕະປື ຢູ່ 5 ເມືອງ ຕື່ມອີກ.
(ພາບ-ຂ່າວ: ວິນັດ ສພຂ)