(ສພຊ) – ລະຫວ່າງ ວັນທີ 05-09 ພຶດສະພາ 2024 ທ່ານ ມະນີໂສ ຊາມຸນຕີ ຮອງປະທານກໍາມາທິການເສດ ຖະກິດ, ເຕັກໂນໂລຊີ ແລະ ສິ່ງແວດລ້ອມ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາການຈັດຕັ້ງປະຕິບັດນະ ໂຍບາຍ ແລະ ນິຕິກຳທີ່ຕິດພັນກັບການນຳເຂົ້າ, ປຸງແຕ່ງນໍ້າມັນເຊື້ອໄຟ ເພື່ອສະໜອງການຊົມໃຊ້ພາຍໃນ, ການຄ້າຊາຍແດນ ແລະ ປັດໄຈການຜະລິດ ຢູ່ເມືອງເງິນ, ເມືອງຫົງສາ ແລະ ເມືອງແກ່ນທ້າວ ແຂວງໄຊຍະບູລີ.

ໂອກາດດັ່ງກ່າວ, ທ່ານ ມະນີໂສ ຊາມຸນຕີ ພ້ອມດ້ວຍຄະນະ ກໍໄດ້ເຂົ້າພົບທ່ານຮອງເຈົ້າແຂວງ ເພື່ອລາຍງານຈຸດ ປະສົງໃນການເຄື່ອນໄຫວວຽກງານ ແລະ ຮ່ວມເຮັດວຽກກັບສະພາປະຊາຊົນແຂວງ. ຈາກນັ້ນ, ໄດ້ຈັດກອງປະຊຸມຮ່ວມກັບຂະແໜງການທີ່ກ່ຽວຂ້ອງຂອງເມືອງ ແລະ ພະແນກການທີ່ກ່ຽວຂ້ອງຂອງແຂວງ ໂດຍການເປັນປະທານຮ່ວມຂອງທ່ານ ມະນີໂສ ຊາມຸນຕີ ແລະ ທ່ານ ເພັງນິລັນ ຄຳພັນເພັງ ປະທານສະພາປະຊາຊົນແຂວງ ເພື່ອຮັບຟັງການລາຍງານກ່ຽວກັບການຈັດຕັ້ງປະຕິບັດນະໂຍບາຍ ແລະ ນິຕິກຳທີ່ຕິດພັນກັບການຈັດຕັ້ງປະຕິບັດນະໂຍບາຍ, ການນຳເຂົ້າ, ປຸງແຕ່ງນໍ້າມັນເຊື້ອໄຟ ເພື່ອສະໜອງການຊົມໃຊ້ພາຍໃນ, ການຄ້າຊາຍແດນ ແລະ ປັດໄຈການຜະລິດ ພ້ອມທັງຮັບຟັງການລາຍງານສະພາບຂໍ້ສະ ດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດມະຕິຂອງຄະນະປະຈຳສະພາແຫ່ງຊາດ ສະບັບເລກທີ 103/ຄປຈ, ລົງວັນທີ 09 ພຶດສະພາ 2022 ວ່າດ້ວຍການຮັບຮອງມາດຕະການຮັກສາສະຖຽນລະພາບຂອງລາຄານໍ້າມັນເຊື້ອໄຟ ໃນສະ ພາບລາຄາມີການເໜັງຕີງຂຶ້ນສູງ ໂດຍສະເພາະການຊຸກຍູ້ສົ່ງເສີມ ແລະ ການຄຸ້ມຄອງການນຳເຂົ້າ ເພື່ອສະໜອງການຊົມ ໃຊ້ພາຍໃນປະເທດ ຮັບປະກັນສະຖຽນລະພາບໃນການສະໜອງນໍ້າມັນເຊື້ອໄຟໃຫ້ມີຄວາມພຽງພໍ ແລະ ຕໍ່ເນື່ອງ ໃນຕໍ່ໜ້າ ແລະ ໄລຍະຍາວ, ຫຼີກລ່ຽງຄວາມສ່ຽງທີ່ຈະເກີດສະພາບຂາດແຄນນໍ້າມັນເຊື້ອໄຟ ແລະ ມີສະຖຽນລະພາບທາງດ້ານລາຄາ; ການຈັດຕັ້ງປະຕິບັດວຽກງານການຄ້າຊາຍແດນ ແລະ ການຄຸ້ມຄອງການນຳເຂົ້າ ແລະ ສົ່ງອອກສິນຄ້າຢູ່ດ່ານຊາຍແດນ, ກົນໄກການຈັດຕັ້ງປະຕິບັດກ່ຽວກັບການຊຳລະ/ຮັບຊຳລະຈາກການນຳເຂົ້າ-ສົ່ງອອກສິນຄ້າ ຮັບປະກັນການຕິດຕາມການຊຳລະຂອງບັນດາຫົວໜ່ວຍທຸລະກິດທີ່ເຮັດການຄ້າກັບຕ່າງປະເທດ ໃຫ້ເຂົ້າສູ່ລະບົບ ແລະ ສາມາດກວດສອບໄດ້; ການຈັດຕັ້ງປະຕິບັດມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ກາງສະໄໝ 5 ປີ ຄັ້ງທີ IX (2021-2025) ແລະ ແຜນການທ້າຍສະໄໝ ຮອດປີ 2025, ການຈັດຕັ້ງປະຕິບັດແຜນປະຈຳປີ 2023 ແລະ ທິດທາງແຜນການປະຈຳປີ 2024 ສະບັບເລກທີ 119/ສພຊ, ລົງວັນທີ 21 ພະຈິກ 2023. ຫຼັງຈາກນັ້ນ, ໄດ້ແລກປ່ຽນຄໍາຄິດຄໍາເຫັນຢ່າງກົງໄປກົງມາ ເພື່ອຊອກໃຫ້ເຫັນດ້ານດີທີ່ຄວນເສີມຂະຫຍາຍ ແລະ ດ້ານຂໍ້ຄົງຄ້າງທີ່ຕ້ອງໄດ້ຊອກຫາວິທີແກ້ໄຂ ເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວ ມີຄວາມຖືກຕ້ອງ, ສອດຄ່ອງກັບກົດໝາຍ ແລະ ບັນລຸຕາມຄາດໝາຍທີ່ວາງໄວ້.

ຕອນທ້າຍຂອງກອງປະຊຸມ, ທ່ານ ມະນີໂສ ຊາມຸນຕີ ໄດ້ມີຄໍາເຫັນຊີ້ນໍາໃຫ້ແຕ່ລະຂະແໜງການ ເພີ່ມທະວີ ແລະ ເອົາໃຈໃສ່ຈັດຕັ້ງປະຕິບັດວຽກງານຂອງຕົນ ໃຫ້ມີປະສິດທິພາບ ແລະ ປະສິດທິຜົນກວ່າເກົ່າ ເປັນຕົ້ນແມ່ນການຄຸ້ມຄອງການນຳເຂົ້າ, ຈຳໜ່າຍນໍ້າມັນເຊື້ອໄຟ ແລະ ການຊຳລະ: ມອບໃຫ້ພາກສ່ວນກ່ຽວຂ້ອງຂອງແຂວງ ປະສານສົມທົບກັບສູນກາງ, ເມືອງທີ່ມີດ່ານຊາຍແດນຕິດກັບປະເທດເພື່ອນບ້ານ ແລະ ຜູ້ປະກອບການ ໃຫ້ເອົາໃຈໃສ່ຈັດຕັ້ງປະຕິບັດນະໂຍ ບາຍ ແລະ ນິຕິກຳທີ່ກ່ຽວຂ້ອງກັບການຄຸ້ມຄອງການນຳເຂົ້ານໍ້າມັນເຊື້ອໄຟ ແລະ ການສົ່ງເສີມການຜະລິດປຸງແຕ່ງນໍ້າມັນເຊື້ອໄຟພາຍໃນ, ການແຈກຢາຍນໍ້າມັນເຊື້ອໄຟໃນການສະໜອງການຊົມໃຊ້ພາຍໃນທ້ອງຖິ່ນ ພ້ອມທັງເອົາໃຈໃສ່ຄຸ້ມຄອງການນຳເຂົ້າ ແລະ ສົ່ງອອກສິນຄ້າ, ການຊໍາລະ/ຮັບຊຳລະ ຈາກການນໍາເຂົ້າ-ສົ່ງອອກຢູ່ດ່ານຊາຍແດນ; ການສົ່ງເສີມປັດໄຈການຜະ ລິດ ແລະ ການຜະລິດພາຍໃນເພື່ອຫຼຸດຜ່ອນການນຳເຂົ້າ: ມອບໃຫ້ພາກສ່ວນກ່ຽວຂ້ອງຂອງແຂວງ ປະສານສົມທົບກັບເມືອງທີ່ມີທ່າແຮງ, ສະຫະກອນ, ຜູ້ຜະລິດກະສິກຳ ແລະ ຊາວກະສິກອນ ເອົາໃຈໃສ່ຈັດຕັ້ງປະຕິບັດນະໂຍບາຍ ແລະ ນິຕິກຳໃຕ້ກົດໝາຍທີ່ຕິດພັນ ເພື່ອຊຸກຍູ້ສົ່ງເສີມການຜະລິດກະສິກຳທີ່ເປັນທ່າແຮງຂອງປະເທດ ເພື່ອຫຼຸດຜ່ອນການນຳເຂົ້າ ແລະ ສົ່ງ ເສີມຜະລິດເປັນສິນຄ້າສົ່ງອອກ ດ້ວຍການສະໜອງປັດໄຈການຜະລິດ ເປັນຕົ້ນເຕັກນິກວິຊາການ, ແນວພັນພືດ, ແນວພັນສັດ, ຝຸ່ນ ແລະ ອາຫານສັດ ທີ່ມີຄຸນນະພາບ ແລະ ຈັດສັນກຳນົດເຂດທີ່ດິນກະສິກຳໃຫ້ມີຄວາມຊັດເຈນ, ຄຸ້ມຄອງທີ່ດິນກະ ສິກຳ, ຊົນລະປະທານ ແລະ ສົ່ງເສີມການຕັ້ງກຸ່ມ, ສະຫະກອນການຜະລິດ ໃຫ້ເກີດດອກອອກຜົນ ແລະ ຍືນຍົງ.

ພ້ອມກັນນີ້, ຄະນະຍັງໄດ້ເດີນທາງໄປເບິ່ງເຂດພື້ນທີ່ຕົວຈິງສາງເກັບນໍ້າມັນຂອງບໍລິສັດນໍາເຂົ້ານໍ້າມັນເຊື້ອໄຟ ຢູ່ເມືອງເງິນ, ເມືອງແກ່ນທ້າວ; ຈຸດກໍ່ສ້າງຝາຍເກັບນໍ້າຫ້ວຍໃຫຍ່, ຮັບຟັງການລາຍງານສະພາບການປູກຝັງລ້ຽງສັດ ແລະ ການຜະລິດຝຸ່ນ ຂອງກຸ່ມກະສິກອນ, ປະຊາຊົນ ຢູ່ເມືອງຫົງສາ; ໂຄງການກໍ່ສ້າງອ່າງເກັບນໍ້ານໍ້າຊ້າງ ເມືອງແກ່ນທ້າວ; ລົງຕິດຕາມຢູ່ດ່ານນໍ້າເງິນ ເມືອງເງິນ, ດ່ານສາກົນ ເມືອງແກ່ນທ້າວ ແລະ ເບິ່ງຟາມລ້ຽງສັດຈຳນວນໜຶ່ງ.