ວັນທີ່ 25 ສິງຫາ 2023 ສະພາປະຊາຊົນແຂວງ ໄດ້ເຄື່ອນໄຫວຕິດຕາມກວດກາ ຜົນກະທົບຕໍ່ປະຊາຊົນ ຂອງບໍລິສັດຂຸດຄົ້ນແຮ່ຄໍາຕົກຂ້ອນ NKB ຢູ່ເມືອງປາກແບງ, ນຳໂດຍ ທ່ານ ຄໍາເຜີຍ ງອນວັນຄໍາ ກໍາມະການປະຈໍາພັກແຂວງ, ຮອງປະທານສະພາປະຊາຊົນແຂວງ, ຕ້ອນຮັບໂດຍທ່ານ ຄໍາສະພອນ ໄຊຍະວົງ ກໍາມະການພັກແຂວງ, ເຈົ້າເມືອງປາກແບງ, ມີທ່ານ ທອງໄຊ ທໍ່ຈົງເລ່ຍຈີ ປະທານຄະນະກໍາມະການເສດຖະກິດ, ແຜນການ ແລະ ການເງິນ ພ້ອມດ້ວນຄະນະ, ມີສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງປາກແບງ, ບັນດາທ່ານຫົວໜ້າຫ້ອງການທີ່ກ່ຽວຂ້ອງຂັ້ນເມືອງເຂົ້າຮ່ວມ.

ການລົງເຄື່ອນໄຫວຕິດຕາມກວດກາຄັ້ງນີ້, ໄດ້ຮັບຟັງການລາຍງານໂດຍສັງເຂບຈາກ ທ່ານ ໄຊຍະສິນ ສຸພັນທອງ ຮອງເຈົ້າເມືອງປາກແບງ ແລະ ຫ້ອງການກ່ຽວຂ້ອງ ກ່ຽວກັບການຂຸດຄົ້ນແຮ່ຄຳຕົກຂ້ອນຢູ່ຫ້ວຍແຊງຄຳ ບ້ານສຸກໄຊ, ເມືອງປາກແບງ ຂອງບໍລິສັດ NKB ກໍ່ສ້າງເຄຫາສະຖານຈໍາກັດຜູ້ດຽວ ທ່ານໃຫ້ຮູ້ວ່າ: ໂຄງການການດັ່ງກ່າວ ໄດ້ຮັບອະນຸຍາດໃຫ້ຂຸດຄົ້ນຄຳຕົກຂ້ອນ(ແບບທົດລອງ)ຈາກລັດຖະບານ ສປປ ລາວ ໃນເນື້ອທີ່ທັງໝົດ 4,3 ເຮັກຕາ ຕາມສັນຍາສຳປະທານ 3 ປີ ເຊິ່ງການຈັດຕັ້ງປະຕິບັດວຽກງານແມ່ນໄດ້ແກ້ໄຂ, ຊົດເຊີຍ ເນື້ອທີ່ດິນໃຫ້ແກ່ປະຊາຊົນສຳເລັດແລ້ວ ແລະ ໄດ້ດຳເນີນການຂຸດຄົ້ນສຳເລັດແລ້ວໃນເນື້ອທີ່ 3,4 ເຮັດຕາ, ສາມາດຜະລິດເປັນຄຳແທ່ງໄດ້ 2,5 ກິໂລ, ໂຄງການດັ່ງກ່າວຈະສິ້ນສຸດໃນທ້າຍເດືອນສິງຫາ 2023 ນີ້.

     

ຫລັງຈາກນັ້ນ, ຄະນະທິມງານໄດ້ມີຄໍາເຫັນເຈາະຈິ້ມ ແລະ ແລກປ່ຽນກັບຫ້ອງການກ່ຽວຂ້ອງ ແລະ ໃນຕອນບ່າຍຂອງວັນດຽວກັນ ໄດ້ລົງເຄື່ອນໄຫວພົບປະປະຊາຊົນບ້ານສຸກໄຊ ເພື່ອຮັບຟັງຄໍາຄິດຄໍາເຫັນເພີ່ມຕື່ມຈາກປະຊົນ ກ່ຽວກັບການຈັດຕັ້ງປະຕິບັດວຽກງານຕ່າງໆ ຂອງບໍລິສັດ, ຂະແໜງການ, ຫ້ອງການກ່ຽວຂ້ອງ ເພື່ອຮັບປະກັນຄວາມຖືກຕ້ອງສອດຄອງຕາມລະບຽບຫລັກການ ຕ່າງຝ່າຍຕ່າງໄດ້ຮັບຜົນປະໂຫຍດ, ພ້ອມນັ້ນ, ຍັງໄດ້ລົງພື້ນທີ່ຕົວຈິງຢູ່ເຂດຂຸດຄົ້ນດັ່ງກ່າວຕື່ມອີກ.