ໃນວັນທີ 21 ກັນຍາ 2023 ທ່ານ ນາງ ວຽນວິໄລ ດີລະພັນຄະນະປະຈໍາພັກແຂວງ,     ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 6 ທັງເປັນ  ກໍາມະການສັງກັດ ຄະນະກໍາມະການເສດຖະກິດ, ແຜນການ ແລະ ການເງິນ, ພ້ອມດ້ວຍຄະນະ ໄດ້ລົງຕິດຕາມກວດກາ ການຈັດຕັ້ງປະຕິບັດ ການຄຸ້ມຄອງການປູກຫຍ້າລ້ຽງສັດ ຢູ່ເມືອງ ໂພນໄຊ.

ການລົງຕິດຕາມກວດກາໃນຄັ້ງນີ້ ໄດ້ເຮັດວຽກຮ່ວມກັບ ອົງການປົກຄອງເມືອງ ໂພນໄຊ ຢູ່ທີ່ຫ້ອງປະຊຸມຫ້ອງວ່າການເມືອງ. ໂອກາດນີ້ ທ່ານ ແກ່ນຈັນ ພິລາວັນ ຮອງເຈົ້າເມືອງ ໄດ້ຂື້ນລາຍງານ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງເມືອງ ແລະ ການຈັດຕັ້ງປະຕິບັດ ມະຕິ ເລກທີ 06/ສພຂ, ລົງວັນທີ 02 ມີນາ 2022 ແລະ ຂໍ້ຕົກລົງຂອງທ່ານເຈົ້າແຂວງ ເລກທີ234/ຈຂ.ຫຼບ, ລົງວັນທີ 12 ເມສາ 2022 ວ່າດ້ວຍການຄຸ້ມຄອງການປູກຫຍ້າລ້ຽງສັດ, ໄດ້ຕອບຄໍາຖາມເຈາະຈິ້ມແລະ ລາຍງານການຈັດຕັ້ງປະຕິບັດ ການປູກຫຍ້າລ້ຽງສັດ ຂອງປະຊາຊົນຢູ່ໃນເມືອງໂພນໄຊຢູ່ໃນໄລຍະຜ່ານມາ ແລະລົງເຮັດວຽກຮ່ວມກັບປະຊາຊົນ (ຄອບຄົວຕົວແບບ) ຈໍານວນ 02 ບ້ານ ຄື: ບ້ານ ດອນໄຊ ແລະ ບ້ານ ຫ້ວຍໂນະ ພ້ອມທັງລົງກວດກາສະຖານທີ່ປູກຫຍ້າຕົວຈິງ.

​ໃນຕອນທ້າຍ ທ່ານ ນາງ ວຽນວິໄລ ດີລະພັນ ຍັງໄດ້ເນັ້ນໜັກ ອົງການປົກຄອງເມືອງໂພນໄຊ ສືບຕໍ່ ສຶກສາອົບຮົມ ການເມືອງແນວຄິດ ໃຫ້ແກ່ພະນັກງານ, ທະຫານ, ຕໍາຫຼວດ ຕະຫຼອດຮອດປະຊາຊົນບັນດາເຜົ່າ ເຊື່ອໝັ່ນຕໍ່ການນໍາພາ-ຊີ້ນໍາ ຂອງພັກ-ລັດ ວາງອອກ, ສືບຕໍ່ຈັດຕັ້ງປະຕິບັດ 02 ວາລະແຫ່ງຊາດ ໃຫ້ໄດ້ຮັບຜົນດີ ແລະ ຕິດຕາມກວດກາ ພ້ອມທັງ ເຜີຍແຜ່ໃຫ້ປະຊາຊົນໄດ້ຮັບຮູ້ ນິຕິກໍາທີ່ກ່ຽວພັນກັບການປູກຫຍ້າລ້ຽງສັດ ກໍ່ຄື ມະຕິ ເລກທີ 06/ສພຂ, ລົງວັນທີ 02 ມີນາ 2022 ແລະ ຂໍ້ຕົກລົງຂອງທ່ານເຈົ້າແຂວງເລກທີ 234/ຈຂ.ຫຼບລົງວັນທີ 12 ເມສາ 2022 ວ່າດ້ວຍການຄຸ້ມຄອງການປູກຫຍ້າລ້ຽງສັດ ໃຫ້ຈັດຕັ້ງປະຕິບັດຢ່າງມີຈຸດສຸມແລະ ຂັ້ນຕອນ. ສໍາຄັນແມ່ນໃຫ້ລຽງບູລິມະສິດຂອງແຕ່ລະໜ້າວຽກເພື່ອໃຫ້ມີປະສິດທິພາບ ແລະ ປະສິດທິພົນສູງສຸດ ໃນການຈັດຕັ້ງປະຕິບັດວຽກງານໃຫ້ສໍາເລັດຕາມຈຸດປະສົງ ແລະ ຄາດໝາຍທີ່ວາງໄວ້. ໂອກາດດຽວກັນນັ້ນ ຍັງໄດ້ຖືໂອກາດນີ້ ຮັບຟັງຄໍາຄິດ, ຄໍາເຫັນ, ຄໍາສະເໜີ ຈາກພໍ່ແມ່ປະຊາຊົນ ຕໍ່ວຽກງານ ຄຸ້ມຄອງລັດ, ຄຸ້ມຄອງເສດຖະກິດ–ສັງຄົມ ຂອງເມືອງຕື່ມອີກ.

​​​​​​​ຂຽນຂ່າວໂດຍ: ນາງ ຈັນທິມາ ສໍພັນໄຊແກ້ວ