ເພື່ອຈັດຕັ້ງປະຕິບັດຕາມແຜນການເຄື່ອນໄຫວຂອງຄະນະປະຈໍາສະພາແຫ່ງຊາດ ແລະ ເພື່ອຍົກສູງພາລະບົດບາດໃນການຕິດຕາມກວດກາ ຂອງຄະນະປະຈໍາສະພາແຫ່ງຊາດ, ໃນຕອນແລງວັນທີ 20 ມີນາ 2024 ຢູ່ທີ່ຫ້ອງປະຊຸມສະພາປະຊະຊົນແຂວງບໍ່ແກ້ວ, ໄດ້ຈັດກອງປະຊຸມຕິດຕາມກວດກາ ການຈັດຕັ້ງປະຕິບັດຄໍາຕັດສິນຂອງສານ. ໂດຍການເປັນປະທານຂອງທ່ານ ພົທ. ສຸວອນ ເລືອງບຸນມີ ກຳມະການສູນກາງພັກ, ຮອງປະທານສະພາແຫ່ງຊາດ.

ເຂົ້າຮ່ວມກອງປະຊຸມມີ: ທ່ານ ຄໍາແພງ ວິລະພັນ ປະທານກໍາມາທິການຍຸຕິທໍາ ສະພາແຫ່ງຊາດ, ທ່ານ ຈອມສີ ລັດຕະນະປັນ ປະທານສະພາປະຊາຊົນແຂວງບໍ່ແກ້ວ, ທ່ານຮອງເຈົ້າແຂວງໆບໍ່ແກ້ວ ຜູ້ຊີ້ນຳວຽກງານຍຸຕິທຳ, ບັນດາທ່ານສະມາຊາຊິກສະພາແຫ່ງຊາດ ປະຈໍາເຂດເລືອກຕັ້ງ, ຮອງປະທານກໍາມາທິການ ພ້ອມດ້ວຍຄະນະ, ສະມາຊິກສະພາປະຊາຊົນແຂວງ, ອົງການ, ຄະນະພະແນກ, ແຂກເຊີນ ແລະ ວິຊາການຂະແໜງກ່ຽວຂ້ອງ.

ຕາມວາລະກອງປະຊຸມທ່ານ ສຸລິເດດ ບັນດາກອນ ຮອງຫົວໜ້າພະແນກຍຸຕິທໍາແຂວງ ໄດ້ຂຶ້ນລາຍງານກ່ຽວກັບການຈັດຕັ້ງຜັນຂະຫຍາຍກົດໝາຍວ່າດ້ວຍ ການຈັດຕັ້ງປະຕິບັດຄໍາຕັດສິນຂອງສານ ສະບັບປັບປຸງປີ 2021 ແລະ ສະພາບການຈັດຕັ້ງປະຕິບັດວຽກງານປະຕິບັດຄໍາຕັດສິນຂອງສານແຕ່ລະຂັ້ນ ທີ່ມີຄວາມຫຍຸ້ງຍາກ, ສາເຫດທີ່ເຮັດໃຫ້ມີການແກ່ຍາວ ແລະ ບໍ່ສາມາດປະຕິບັດໄດ້.

ໄດ້ຮັບຟັງການລາຍງານຈາກກອງບັນຊາການ ປກສ ແຂວງ ກ່ຽວກັບສະພາບການຈັດຕັ້ງປະຕິບັດດໍາລັດວ່າດ້ວຍ ຊັບສິນທີ່ຖືກຍຶດ, ອາຍັດ ແລະ ຮິບເປັນຂອງລັດ ສະບັບເລກທີ 280/ນຍ, ລົງວັນທີ 9 ສິງຫາ 2022.

ພ້ອມນັ້ນ, ບັນດາທ່ານທີ່ເຂົ້າຮ່ວມກອງປະຊຸມໄດ້ມີຄໍາຄິດຄໍາເຫັນເພີ່ມເຕີມ ຕາມຄໍາເຫັນເຈາະຈີ້ມຂອງປະທານກອງປະຊຸມ ແລະ ສະເໜີແລກປ່ຽນຄໍາຄິດເຫັນເຊິ່ງກັນ ແລະ ກັນ ຢ່າງກົງໄປກົງມາ ເພື່ອເປັນຂໍ້ມູນໃຫ້ແກ່ຄະນະປະຈໍາສະພາແຫ່ງຊາດ, ສະພາປະຊາຊົນແຂວງ ໃນການຕິດຕາມກວດກາ ຕາມພາລະບົດບາດ, ສິດ ແລະ ໜ້າທີ່ ຕາມທີ່ໄດ້ກໍານົດໄວ້ໃນກົດໝາຍ.